(تخاريف 1) ... سلامه يبحث عن سياره ... PAYOO

**PAYOO** · 21-05-2007 07:55 AM

البطل:- مواطن مصري مطحون أسمه "سلامه"
بعد عناء السنين وبهدلته مع العربيات القديمه المكسره قرر يطلع إلي تحت البلاطه ويخرج تحويشة العُمر ويقتني عربيه جديده

البطله:- سيارة من السيارات المنتشره في مصر وبنت حلال برضه زي "سلامه" وأسمها لسه مانعرفوش عشان "سلامه" لسه ماخترهاش

------------------------------

"سلامه" بعد طول تفكير وبعد سؤال القريب والغريب قرر انه يرتبط بسياره بنت حلال زيه عشان ترحمه من البهدله إللي أتبهدلها مع السيارات القديمه المطحونه

"سلامه" نزل المعارض والتوكيلات وبدأ يتفرج على العربيات عربيه عربيه
وفي مره من المرات نزلت معاه أساعده في اختيار عربيه مناسبه له ولاحظت أنه بيعمل حاجات غريبه وتصرفاته الغريبه دي خلت أصحاب المعارض تقلق منه قوي لأنه كان بيقرب من كل عربيه و يهمس وكأنه بيوشوشها !!!!
طبعا الناس أفتكرته مجنون لأنه بيكلم العربيه وانا عن نفسي مافهمتش هوه بيعمل أيه وبيحاول يكلم العربيه ليه ؟؟

وسألته وقال لي انه لازم يكون فيه ألفه بينه وبين العربيه إللي هايرتبط بيها ولازم لما يكلمها ترد عليه

طبعاً أنا ندمت على أني سألته السؤال ده ، وندمت أكتر أني نزلت معاه أصلا

بس فضوللي خلاني أسأله سؤال تاني
سألته ليه يا "سلامه" بتعتبر إن علاقتك بالعربيه علاقة أرتباط ؟ مع أنك ممكن كل فتره تقتني عربيه مختلفه ؟
قال لي :- لاااااا أنا مش زي بقيت الناس أنا مقدرش كل شويه أغير عربيه وأخسر فيها فلوس ، وكمان أنا وعربيتي بيبقى في عِشره بيننا و ألفه و مودة و .... و..... (فضل يكلمني عن العِشره وكانه رايح يتجوز)

المهم في اليوم ده مالقيناش حاجه مناسبه له خالص لأني أكتشفت أنه حاطت ميزانيه للسياره أول عن أخر 30ألف جنيه ومافيش عربيه جديده بالسعر ده

وتركت "سلامه" يكمل مشوار البحث عن سيارته إللي بيحلم بيها ومن وقت للتاني بقى يجي لي يحكيلي على إللي بيحصل
---------------------------------

تعالوا نشوف مع بعض "سلامه" وصل لأيه ؟؟؟

"سلامه" في يوم وهو بيدور على بنت الحلال لقى عربيه "فيرنا" لونها أبيض في أبيض ، وقف قدمها زي الصنم وماتحركش وظل يتخيل نفسه الفارس إللي راكب فرس أبيض وبدأ يقرب منها بشويش خطوه خطوه وهوه متحفز وبيترعش وكأنه رايح يلمس واحده ست (والعايذ بالله) وأول ما حط أيده على الكبوت سمع الـ"فيرنا" بتقوله:- عيب كده يا "سلامه" ماتلمسنيش إلا لما نرتبط رسمي"سلامه" شال أيده بسرعه وهو مكسوف وقالها :- أسف جدا يا "فيرنا" بس أنا معرفش اتقدم لمين واطلب أيدك من مين ؟؟
قالتله:- عندك خالي "غبور" أتقدمله وأطلب أيدي منه وهوه إن شاء الله هايوافق وهايجهزني أحسن جهاز بس على قد ما هاتدفع من مَهر
قال لها:- طب ومَهرك كام يا " فيرنا "؟؟
قالت له:- أتكلم مع خالي "غبور" في الأمور دي أنا مابتكلمش مع حد في الأمور دي
قال لها :- هو أنت مصريه يا " فيرنا " ؟
قالت له:- لا أنا اصلي (كوري) وتجميعي (مصري) وفي شوية حاجات فيا مصري
قال لها :- يعني كوريه مصريه؟
قالت له:- أيون أنا كورية الأصل مصرية الفرع ، عجبتك بقى ولا لأه ؟
قال لها :- أنتي تعجبي الباشا يا حلوه انتي يا بيضه يا سكر يا....
برقت له ونورت النور العالي وقالتله:-أيه ده يا "سلامه" انت هاتخليني أغير فكرتي عنك ولا أيه ؟ انت بتعاكسني ولا أيه؟
قال لها :- لا والله يا " فيرنا " مش قصدي معاكسه ولا حاجه لا سمح الله ، أنا هاروح حالا أطلب أيدك من خالك

ومن غير ما "سلامه" يفكر ولا يسأل ولا يشور جري بسرعه وخلص الأجراءات ودفع إللي معاه مقدم لعربيته الجديده بالرغم من إن سعرها ضعف الميزانيه إللي كان حاططها في دماغه ومع ذلك ما هموش وجاب العربيه إللي حس أنها بتناديه زي ما قال لنا قبل كده

وإن شاء الله هانتابع مع بعض يوميات "سلامه" و "فيرنا" ولو عاوزين تناقشو سلامه أنا ممكن أجيبه يقعد كل يوم ساعه يرد على رسائلكم إللي هاتسيبوها هنا

وأشوف وشكم بخير
"PAYOO" صديق "سلامه" الروح بالروح

**hazem_khidr** · 21-05-2007 08:04 AM

إن شاء الله هانتابع مع بعض يوميات "سلامه" و "فيرنا" ولو عاوزين تناقشو سلامه أنا ممكن أجيبه يقعد كل يوم ساعه يرد على رسائلكم إللي هاتسيبوها هنا

جميل اوي الاسلوب يا مستر بايو يا ريت تديب سلامه الجمعه الجايه :mrgreen:
و لحد ما يجي اسالو هو خال العروسه عمل معاه ايه انا سامع انه مفتري

**أبو عبدالله** · 22-05-2007 01:47 AM

بس غريبه هو مش سلامه ده كان بيحب ليلى

ايه اللي خلاه يحب الفيرنا

قلة ادب

**sokasoon** · 22-05-2007 01:53 AM

الحلقة الجاية امتا مستعجلييييييييييييييييين :lol: :lol: :lol:

**PAYOO** · 22-05-2007 07:42 AM

المشاركة الأصلية كتبت بواسطة sokasoon

الحلقة الجاية امتا مستعجلييييييييييييييييين :lol: :lol: :lol:

أنت تــُأمر يا باشا
================================================== ======
البطل:- مواطن مصري مطحون أسمه "سلامه"
بعد عناء السنين وبهدلته مع العربيات القديمه المكسره قرر يطلع إلي تحت البلاطه ويقتني عربيه جديده

البطله:- سيارة من السيارات المنتشره في مصر وبنت حلال برضه زي "سلامه" وأكتشفنا إن أسمها "فيرنا" بعد ما "سلامه" وقع أختياره عليها

-------------------------------------------------------

عرفنا سابقا إن "سلامه" بعد ما شاف "فيرنا" وأعجب بيها جدا وحصل بينهم استلطاف راح على طول لـخالها عشان يطلب أيديها زى ما هي قالت له وعلى قد المهر خالها "غبور" هايجهزها

تعالوا بقى نشوف المقابله دي أسفرت عن أيه

طلع "سلامه" للإدارة وطلب مقابلة السيد/ "غبور" شخصيا
الموظف أستغرب جدا من طلب "سلامه" وشعر إن فيه مشكله وسأل "سلامه" هو فيه حاجه حصلت ؟
"سلامه" قال له :- لا ... بس أنا كنت عاوز اتقدم لـ"فيرنا"
الموظف أستغرب قوي من طريقة كلام "سلامه" وقال له:- الأمر لا يستدعي مقابة السيد/"غبور" أنا هنا عشان المبيعات انا اقدر أديك طلب وحضرتك تملاه ونشوف حضرتك عاوز أوبشن أيه ؟ وهاتدفع كام مقدم وتحب تقسط على كام سنه ؟ ونتناقش في كل التفاصيل إللي تحبها حضرتك

"سلامه":- انا عاوز "فيرنا" إللي تحت دي
الموظف:- حضرتك قصدك اللون يعني ؟
"سلامه":- لا أنا قصدي العربيه إللي في العرض نفسها
الموظف:- أصل دي للعرض فقط وأحنا نقدر نجيب لحضرتك زيها وبنفس المواصفات و............
هنا ثار "سلامه" وأنفعل وخبط بأيده على المكتب و زعق وقال له:- أنا عاوز "فيرنا" البيضاء إللي في العرض دي بالتحديد

الموظف أستغرب قوي من تصرفات "سلامه" وقال له:- حضرتك منفعل ليه أحنا ها نسلم لحضرتك نفس المواصفات واللون وكل حاجه يبقى هاتفرق أيه ؟؟؟
"سلامه" وهو في قمة غضبه:- بقولك أيه أنت ناوي تنرفزني أكتر من كده ؟؟ أنا بقولك عاوز "فيرنا" إللي في العرض دي بالتحديد يبقى "فيرنا" إللي في العرض بالتحديد

الموظف أستغرب جدا جدا على انفعالات "سلامه" وأضطر أنه يوعده أنه عند التسليم هايسلموا العربيه إلي في العرض دي
نزل "سلامه" من عند الموظف وهوه متضايق وقبل ما يمشي عدى على "فيرنا" و أبتسم وسلم عليها وقال لها:- أنا أتقدمت خلاص وإنشاء الله كلها كام يوم ونبقى مع بعض للأبد
قالت له :- وانا سمعتك وأنت بتزعق للموظف المجنون ده وعجبتني قوي ، انا بحب الراجل الحمش يا "سلامه"
قال لها:- أنا عشانك يا "فرنا" أزعق لعميد في لجنة رادار مش لموظف عند خالك "غبور" ، على فكره هو ما قابلنيش ليه؟
قالت له:- معلش يا "سلامه" هو مشغول ومابيقابلش كل إللي بيتقدموا بطلبات للعربيات إللي في أسرة هيونداي ومخللي الموظفين همه إللي بيقوموا بالمهام دي
قال لها وهو هيمان:- على العموم أنا مايهمنيش غيرك انتي يا "فرنا" يابيضه يا حلوه أنتي يا.......
زغرتله بعنيها ونورت النور العالي وشغلت الكلاكس مرتين متقطعتين وقالت له :- هاااااااااااااااا رجعنا تاني للمعاكسه يا سلامه ؟؟؟ هاتزعلني منك كده ، أستنى لما نرتبط رسمي وأبقى قوللي إللي أنت عاوزه
قال لها وهو متلخبط:- انا أسف يا "فرنا" أنا عارف إنك من عيله محافظه و والدتك "هيونداي" ست سمعتها عالميه وأخواتك كلهم ولاد حلال زيك وسمعة خالك "غبور" دايما نظيفه ، معلش سامحيني يا "فيرنا" أنا مش قصدي أعاكسك بس أنا بعبرلك عن حبي
طفت النور العالي وغمضت عنيها وقالتله:- خلاص خلصنا يا "سلامه" روح أنت دلوقتي ونتقابل ليلة الدخله بأذن الله
قال لها :-لا أنا لسه ما استقرتش على التجهيز والذي منه و هاحدد معاهم بعد الأستعلام إللي هايستعلموه عني
قالت له :- شوف أنت تعمل حسابك على مهَر كبير عشان تاخدني متجهزه من مجاميعه
قال لها :- بصراحه يا "فرنا" العين بصيره والأيد قصيره ، أنا مش هاقدر أخدك بأي تجهيزات نهائيا ولا حتى جهاز الأنذار
قالت له وهيه متنرفزه وفاتحه البيبان الأربعه:- نعم يا حبيبي نعم ؟ أحنا أبتدينا من اولها بـُخل بقى ولا أيه؟؟؟ لا لا لا الكلام ده مايمشيش معايا ولا مع عيلتنا أحنا ماعندناش بنات تدخل فاضيه انت فاهم ولا لأه ؟
قالها وهو بيترعش:- خلاص خلاص ماتزعليش أنتي بس ، حاضر ربنا يسهل وأشوف موضوع التجهيزات دي أيه كمان
قالت له:- أنا كده كده معايا تكييف وكاسيت ، عاوزاك بقى تطلب زجاج كهربائي وماكينات رفع و ومرايات كهرباء وفتيس أوتوماتيك وأنذار و سنتر و......
قاطعها منفعلا وقال لها :- حيلك حيلك يا"فيرنا" مش كده أمال ، أنا على قد حالي وماكنتش عامل حسابي على كل ده مره واحده كده ، (وحاول أنه يخللي نبرة صوته رومانسيه وهوه بيقول) يا ستي واحده واحده وأنا قدام شويه هاجبلك كل إللي أنتي عاوزاه بس كله بأوانه
قالت له بحنيه:- يا "سلامه" يا حبيبي أنا عاوزه راحتك الفتيس الأوتوماتيك عشان يريحك وأنا خايفه عليك من التعب
قالها :- أنا مابحبش الست قصدي العربيه الأوتوماتيك
قالت له:- خلاص بس الزجاج الكهربائي بقى أنا مش متنازله عنه لانك هاتهري أيديه كل ما تيجي ترفع الزجاج وبقيت الحاجات لازم تجيبهالي ومش مهم الفتيس
قال لها:- حاضر من عنيه الأتنين بس بعدين ، أنا هاخدك كده زي ما أنتي و واحده واحده هانجيب إللي أحنا عاوزينه ، وبعدين مش خالك بيركب الحاجات دي عند "عشم نواره" ؟ يبقى خلاص لما ربنا سيهل نروح لـ"عشم نواره" ونخليه يركب إلي أنتي عاوزاه ، خلاص؟
قالت له:- بس "عشم نواره" مابيركبش غير الأنذار والسنتر والكاسيت بس
لكن مش مشكله خلاص بس أنا هاعتبر إن ده وعد منك بأنك تجيبلي إللي انا عاوزاه بعدين
قال لها :- خلاص أنا بوعدك أني أجيب لك كل إللي أنتي عاوزاه بس بعد الأستلام بشويه إن شاء الله
قالت له :- خلاص ، ياللا مع السلامه يا "سلامه"
قال لها وهوه بيبربش:- مع السلامه يا "فرنا"
-----------------------------------------------------------
===============================================

سؤال الحلقه:-
تفتكر "سلامه" هايجيب كل إللي وعد به "فيرنا" وللا ياترى حياتهم هاتبقى نكد بعد كده ومش هايقدر يجيب إللي وعدها به ؟

ونتابع مع بعض في القريب يوميات "سلامه" و"فيرنا"

"PAYOO" صديق "سلامه" الروح بالروح

**memo_hefnawy** · 22-05-2007 08:08 AM

صعبان عليا سلامة و الله :) فاكر إنه هايركب مرسيدس :) هههههه

**وائل عطية** · 22-05-2007 09:35 AM

صعبان عليا سلامة و الله فاكر إنه هايركب مرسيدس

جامدة يامحمود
إيه يابايو انت مش بتقول إن سلامة صاحبك ..طب ليه موافقة على طلب إيد فيرنا !! دا كلام ياراجل ولا عشان ماهى بنت عم الواد ماتريكس يعني !! ماهى بقت كوسة !! :lol: :lol: :lol:

**أبو عبدالله** · 22-05-2007 02:14 PM

مش كده برضه

**محمد المرسي** · 22-05-2007 04:50 PM

أيه يا عم بايو الكلام ده ..
ده أنا أول ما قريت كلام صاحبك سلامة عن البت "فرنا" أفتكرت واحد صاحبى كان طالب أيدها برده وقالتله نقس الكلام ..
وراح برده لخالها غبور وحصل معاه اللى حصل مع صاحبك ...
على العموم أنا مش هأقول لصاحبى لغاية منشوف أخرة حكاية سلامة ..يمكن أكون ظالم البت "فرنا" وتكون واحدة تانية غيرها ...

**sokasoon** · 22-05-2007 05:09 PM

قالت له بحنيه:- يا "سلامه" يا حبيبي أنا عاوزه راحتك الفتيس الأوتوماتيك عشان يريحك وأنا خايفه عليك من التعب
قالها :- أنا مابحبش الست :shock: :shock: قصدي العربيه الأوتوماتيك

هههههههههههههههههه :P :lol:

انا اعتقد انو هيبيع اللى حيلته علشان خاطر الفيرنا

الموضوع: (تخاريف 1) ... سلامه يبحث عن سياره ... PAYOO

LinkBack

أدوات الموضوع

عرض

-

-

-

-

-

-

-

المواضيع المتشابهه

حمد لله علي سلامه مصر

تخاريف شتاء ولا ....

الكلمات الدلالية لهذا الموضوع

المفضلات

المفضلات

ضوابط المشاركة