الموضوع: صيانة ال 5000 للوجى و تقييم اداء توكيل رينو

[justify] [/justify][justify][/justify][justify][/justify]
[justify][/justify][justify]

السلام عليكم اعضاء قسم رينو الحبيب

النهاردة روحت عملت صيانة ال 5000 ودة تقريرى عنها بمنتهى الامانة

الملاحظات اللى كانت عندى
1- مستوى اداء التكييف بقى اضعف قليلا من الاول
2- مسمار فرامل اليد كان باين وكان فى بلستكة وقعة جوة (اللى بتغطى المسمار)
3- عضة المارشدير الرخمة
4- سخونة الكونسول (بصراحة هى مش عندى بس انا قولت كدة علشان يركبه العازل )
5- صيانة 5000
...........................
اول حاجة كنت خايف من موضوع 1000 كيلو سماح علشان الضمان لكن انا عامل 7000 كيلو ومحدش اتكلم
.........................
كنت اتكلمت قبل كدة عن سوء مستوى مهندسين الاستقبال لكن النهاردة الوضع مختلف جدا جدا
النهاردة مهندسة الاستقبال كانت 10 على 10 وسمعتنى للاخر وردت ردود جيدة جدا (والحاجات دى بتهمنى اوى لانها بتوضح مدى احترام عقلية العميل)
المهم قالتلى عربيتك حتاخد حوالى ساعتين او 3 ساعات علشان الحاجات اللى انا طالبها ممكن تاخد وقت
وتوجهت الى الاستراحة وكان فى فلم جامد شغال فضلت اتفرج عليه ( زى الفل )
......................
بعد ساعة وربع ندهو على اسمى المهم عربيتك خلصت وهى فى الغسيل وظبتنا كل حاجة يا مستر عمرو والتكييف سليم مافيهوش اى شيئ لكن احنا غسلنا سربنتينة التكييف ... ومفيش اى مبلغ يدفع
انا قولت بس العربية اتكروتت وبدأ يظهر عليا بوادر التحفظ من المستوى لان انا مش حسكت على اى تقصير
...................
روحت استلم العربية لاقيت العربية اقل ما يقال عنها انها بتبرق من الخارج .. فتحت الباب لاقيتها بتبرق من الداخل (مستوى غسيل السيارة 10 على 10 بالمقارنة بغسيل صيانة ال 1000)
....................
ركبت العربية وبدأت اعمل التشك بتاعى على كل حاجة فيها

الملحوظة وما تم فى معالجتها
1- مستوى اداء التكييف بقى اضعف قليلا من الاول
التكييف تحول وبقى اقوى من الاول ممكن يكونوا فعلا غسلوا السربنتينة وكانت فيها تراب او اى شيئ ساددها
التكييف عندى كان صوته عالى اوى على درجة المروحة رقم 4 لكن صوته هدى بشكل ملحوظ جدا
ودرجة البرودة حاسيتها اسرع من الاول بكتير على الرغم من ان الجو على الصحراوى حر جدا وشمس جدا

2- مسمار فرامل اليد كان باين وكان فى بلستكة وقعة جوة (اللى بتغطى المسمار)

المسمار اتحط عليه الحتة البلاستيك ورجع زى الاول

3- عضة المارشدير الرخمة

طبعا اهم ملحوظة انا رايحلها وكان طلبى ان الموضوع يتحل بدون اى تدخل فى بدال الدبرياج ولا يعلى ولا يوطى
وقد كان العضة انتهت والفتيس بقى زى الحلاوة الحمد لله لان دى كانت اكتر حاجة مزعلانى فى العربية
جميع النقلات بقت ممتازة وسلسة للغاية ومفيش اى مشكلة فى الفتيس ولله الحمد

4- سخونة الكونسول (بصراحة هى مش عندى بس انا قولت كدة علشان يركبه العازل )

مهندس الاستقبال قالى انهم ركبوا عازل الحرارة (طبعا انا مصدقهم وانا اصلا مش حاسس بيها )

5- صيانة 5000

تم عمل كشف على سوائل السيارة ... الزيت لا يلزم تغييره ويمكن تغييره على صيانة ال 10000 قريبا ان شاء الله
تربيط العفشة وكشف شامل على الاشارات والانوار والعدادات والسيارة عموما
..........................
أداء السيارة بعد الصيانة واختبارها على طريق غير ممهد بوابات اسكندرية على الطريق الصحراوى
1- اداء العربية بقى اكتر من ممتاز سحب وتسارع وحتى مع التكييف
2- ثبات العربية انا بجد حاسس ان ركبت عربية تانية فعلا فعلا تربيط العفشة بصورة جيدة بيفرق جدا .. العربية بسم الله ما شاء الله بقت عاملة زى الدبشة على الاسفلت ومكلبشة فيه
3- فرامل العربية .. انا فى الصيانة ماشتكتش من فرامل العربية لكن لاحظت تحسن رهيب فى مستوى الفرامل بقت قوية جدا وتأثيرها سريع وفعال جدا جدا
4- احساسى بتفاصيل الطريق تحسن بشكل ملفت للنظر ودة نتيجة تربيط العفشة بمستوى جيد جدا
................................
وفى النهاية انا راضى جدا جدا جدا عن مستوى الصيانة ومستوى مهندس الاستقبال وهو دة اللى كنت منتظره من توكيل رينو .. بصراحة كدة النهاردة من انضف الصيانات اللى شوفتها فى حياتى وخاصا عملها فى وقت قياسى ( ساعة وربع فقط ) بالاضافة انها مجانية (مادفعتش ولا مليم)
................................
نسيت اقولكوا ان توكيل العامرية بيعملوا نسكافيه فاجر ... اى حد مدمن نسكافيه يروح فى الاستراحة يطلب نسكافيه ب 5 جنيه كدة
شكرا توكيل رينو على حسن الضيافة وحسن الاداء وتحسن الخدمة الملحوظ جدا جدا
وعدم التهرب من اى ملحوظة انا قولتها بالعكس اتعمل حاجات فى العربية انا مش طالبها
................................
توكيل رينو فرع العامرية هات بوسة

[/justify]

المشاركة الأصلية كتبت بواسطة test50

مبروك يا باشا وعقبال صيانه ال 5 مليون

اله يبارك فيك يا تست وعقبال ما تكون مبسوط من الصيانة وكل الاعضاء ان شاء الله

المشاركة الأصلية كتبت بواسطة nadernabil

مبروك يا باشا

انا عملت ال5000 في العبور...و مانبسطش قوي...

والله يا نادر يا خويا هى على حسب الغزالة لو رايقة يبقى الاداء حيكون كويس وحتنبسط
لكن عموما اعتقد ان الزحام على فروع القاهرة اكبر من الضغط على فرع العامرية
وربنا يباركلك فى عربيتك

المشاركة الأصلية كتبت بواسطة hardlive

طب قولنا اسم مهندسة الاستقبال ايه عشان اللي يروح يروح عليها علي طول بدل مايقع في ايد حد تاني زيي كده ويرد عليه بكلمة واحدة " مش موجودة "..." تابعنا "... والله ده كرهني في العربية من يومها وفكرت ابيعها

لا والله ما اعرف اسمها بس الفكرة مش فى مهندس الاستقبال لكن الفكرة فى مستوى الفنيين جوة
اهم حاجة انك تصمم على رأيك لكن متصممش فى حاجة انت عارفها انها من تصميم العربية