كان عندى شوية حاجات هايفة عملتها بنفسى و قلت اقولها عشان افيد الرجالة:
1-كان عندى دراع الاشارة تقيل قوى و ساعات ما بيجيش قمت فاتح الزور بتاع علبة الدركسيون مربوط عندى ب 6 مسامير برمة و الدركسيون ما بيتحركش لفوق تحت ثابت يعنى لقيت الدراع عليه كمية تراب محترمة نفختها بالكومبرسور و جبت ال wd40 العظيم و رشيت على الحتة اللى بيتحرك فيها الدراع المهم التجربة ساعتها كانت لا تبشر بالخير ما خفش قوى بس بالليل و انا خارج بالعربية بقا حلاوة يعنى نصبر على ال wd40 شوية
2-كنت باسخن العربية الصبح بدرى و انا فى الجراج لوحدى و باسمع دبة النملة سمعت شخللة غريبة قلقت نديت للوالد و قلتله الحق العربية فتتحت بقها (طبعا عشان ييجى و يتعاون) المهم اول حاجة الشنطة كانت مفتوحة و انا تايه قفلناها راح نص الصوت طب امسك ماسورة الشكمان يا حاج و ما تخافش مش سخنة بردك ما فيش فى الاخر طلعت النمر قدام وورة المسامير مهوية حبتين و عشان كده الصوت المعدنى ظهر ورا ربطت مكان المسمار بافيز فى الشاسيه لان مقاس المسامير عندى ما جاش فى خرم النمرة و ربطين فى حتة تانية و قدام دخلت صامولة من ورا المسمار زنقته تمام وراحت الشخللة
3-كان فيه دبدبة و انا ماشى بالعربية و هبد و نتر الباشمهندس سمير قال بلى عجل و رحت شحمت السرر و البلى وراحت المشكلة بنسبة 80% و الباقى كان الكوتش ظبطه دلوقتى على 28 (العداد معايا فى البيت) و الدنيا بقت تمام
4-جبت اسبراى اسود اماراتى العلبة ب 8 جنيه و رشيت بيه المقصات و اجزاء من العفشة لان الصدى بدا يظهر عليها و شوية كحت كده من بطن العربية مع انى داهنها بلاك و خليت بالى على قد ما اقدر فى البعد عن المسامير و الكوتشات بتاعت العفشة و الكبالن و الحاجات ديه و نضفت كويس بالغسيل و بعدها تنر كمان و الحمد لله الصدا اختفى تحت الدهان بس اللى هايرفع لعربية بالكريك يخلى باله
يعنى شوية حاجات هايفة بس يمكن تفيد حد و شكرا على الصبر و قراية الموضوع