حاجة غريبة جداً حصلت معايا فى وسط البلد!!!

**GoldenManEye** · 16-01-2008 04:35 PM

مش عارف إذا كان حد فيكم حصل معاه الموضوع ده قبل كده والا لأ!!

انا كنت فى وسط البلد وكالعادة لو رايح وسط البلد مبخدش العربية عشان الركنة والأرف ده وباخد تاكسى

كنت عند كنتاكى اللى فى ميدان التحريرومستنى تاكسى علشان أروح العجوزة.

عدى تاكسى قولت العجوزة ... قالى لا مش طريقى :(

كان وراه عربية 31 وقفت قدامى وفيها شاب محترم قالى رايح العجوزة قلته أيوه قاللى إتفضل إركب إستغربت أوى بس حسيت إنه شغال تاكسى.

المهم الطريق واضح وكنا بالنهار و مفيش مشاكل قلت أركب معاه وافهم منه فيه إيه!!

سالتوا هو ده تاكسى والا ملاكى ؟!!

قالى لا دى عربيتى بس وانا مروح من الشغل ممكن أخد حد معايا أوصله واجيب بنزين العربية :)

وفعلاً وصلنى العجوزة واديتله الأجرة ومشى وانا واقف مستغرب !!!

تم النقل للاجتماعي
الادارة (1)

**moudy2002** · 16-01-2008 04:40 PM

يا باشا الموضوع دة انتشر قوى اليومين دول
فى ناس بتجيب عربية ملاكى مخصوص ويشتغلو عليها تاكسى علشان ميدخلش دوامة الاجرة والتامين والفحص كل سنة والضرايب ووجع القلب دة
فدة عادى خالص وهيبقلك كتيرررررر
بس يمكن انت مش واخد بالك منة علشان مش بتمشى من غير عربيتك كتير .

**bimmeraddict** · 16-01-2008 04:44 PM

الحكاية دي أصبحت منتشرة,شباب كتير بيعماها

**Dr Ahmed** · 16-01-2008 04:44 PM

أيوه.. بس ساعات فعلا ناس بتتبرع بتوصيل الغير ، ومنهم أنا - بس لو لقيت أسرة (ويكون عددهم قليل) أو ناس كبيرة فى السن واقفين فى حتة مش سهل المواصلات فيها ويكونوا فى طريقى- مع اتخاذ كافة الاجراءات الأمنية.

**ecybrarian** · 16-01-2008 04:49 PM

ده بيحصل كتير في مصر..دي حركة خليجي في الأصل (تحديدا بتحصل مع أخويا في السعودية كتير) بس طبعا بشروط في مصر..يعني ما فيش واحدة محترمة عمرها تركب عربية ملاكي..
انا حصلت معايا زمااان كان في اسرة من اب وام وطفلين (أكبر ما فيهم عنده بتاع سنتين) كانوا بيجروا ورا اتوبيس ومرضيش يقف لهم مع انهم كانوا على المحطة..المهم انا خدتهم معي وفي آخر المشوار الراجل حب يحاسبني بس انا رفضت..مش تكبر والله بس عشان الثواب ما يضعش

المشكلة هنا هل الموضوع ده يمكن تقبله أم هو مرفوض؟؟ وإذا كان مرفوض هل بسبب الحفاظ على برستيج الملاكي ولا بسبب التهرب من الضرائب ولا بسبب عدم الأمان؟؟؟؟ وهل ممكن واحد بعربية مكيفة يعمل كده (حتة تاكسي العاصمة بقى)

انا عن نفسي لا أرفضه

**ابوشريف** · 16-01-2008 05:14 PM

سواء اللى وصل خد اجره ام عملها ابتغاء مرضاة الله

فده فى الاساس بادره ايجابيه للتعاون بين الناس

**hazem_khidr** · 16-01-2008 05:19 PM

كنت بقف لاي حد يكون باين عليه التعب فعلا و اوصله في طريقي بدون مقابل.
لكن دلوقتي و بامانه بقيت بخاف و مش بعمل كده .
اما موضوع الفلوس ف انا شفت كتيييير اوي بيعملو كده سواء في الخليج او في مصر
و مره في صلاح سالم لقيت عربيه شاهين سودا و مركب عليها شبكه و شكلها من الامام و الخلف فعلا تاكسي لكن معلق نمر ملاكي و بيمشي ياخد زباين.
يمكن علشان التراخيص للاجره موقوفه او بيشوف اكل عيشه باي طريقه حلال و دا مش عيب و لا حرام في رايي

**zorooo1986** · 16-01-2008 07:47 PM

موجودين منهم كتير هتلاقيهم كمان عند مول الكمبيوتر بتاع روكسى واقفين يقولك اوصلك فى عربية ملاكى والمهم انهم عربيات حديثة

**الريس** · 16-01-2008 08:03 PM

اكيد دي بادرة كويسة ان الناس تكون ايجابية شوية .. حتى و لو بياخدو فلوس

**ahmed1981** · 16-01-2008 08:38 PM

بتحصل كتير جداً في القاهرة
وبالأخص بعد قرار محافظ القاهرة بإيقاف إحلال تاكسي القاهرة بسيارات جديدة وقصر السيارات الجديدة على سعيد الحظ صاحب مشروع تاكسي العاصمة (القرا تابع لحزمة قوانين حماية الإحتكار والسادة المحتكرين)

لدرجة إني شفت ملاكي شغال تاكسي وحاطط لمبة تاكسي يرفعها على تابلوه العربية وقت لما يشتغل بعيداً عن أعين المرور

لكن أنا بنبه على جميع قريباتي السيدات لو لوحدهم أن لا يركبوا مع تاكسي ملاكي وقبل المشاورة للتاكسي أو ركوبه عليهم بالنظر إلى رقم العربية ولو كانت ملاكي متركبش معاه أبداً
لأنه لو لا قدر الله وطلع مجرم وهي راكبة معاه سيارته الخاصة الملاكي وهي مختارة يبقى رحنا بلاش
لكن بالنسبة للرجالة فالأمر ممكن يكون أسهل

أكثر مكان شفت فيه هذه الظاهرة في القاهرة في مدينة السلام

الموضوع: حاجة غريبة جداً حصلت معايا فى وسط البلد!!!

LinkBack

أدوات الموضوع

عرض

حاجة غريبة جداً حصلت معايا فى وسط البلد!!! - انشر الموضوع فى :

-

-

-

-

-

-

المواضيع المتشابهه

حاجة غريبة جداً حصلت معايا في الكونتاكت النهاردة

حاجة غريبة حصلت معايا في الميجان

حاجة غريبة حصلت معايا في الاوبترا

حاجة غريبة جداً حصلت معايا النهاردة

حاجة غريبة حصلت معايا فى العربية !

الكلمات الدلالية لهذا الموضوع

المفضلات

المفضلات

ضوابط المشاركة