بكرة ان شاء الله هكبس دورة المية

**cayman69300** · 08-04-2010 03:52 AM

العربية عندى نتنقص مية
يعنى كل يومين نتنقص حوالى 1/2 لتر مية
اعتقد ان كدة كتير جدا
و اللى اعرفة ان العربيات دى الكبود بتاعها يتفتح و يتشيك على الكية كل اسبوع او 15 يوم
فبكرة ان شاء الله هكبس الدورة و هشوف المشكلة فين
بس شرطى الوحيد اللى هقولة للراجل الصنايعى
مش هغير اى حاجة
يعنى بالكتير ممكن اغير كوليهات
لكن اكتر من كدة ..................مش ممكن ابدا
حتى لو العربية هتولع و هتغور فى داهية
كفاية اوى المصاريف اللى خدتها منى
انا اليومين دول لو نزلت الشارع و لقيت العربية بقيت نصين - هشوف النص الكويس و اركبة و امشى بية
فدعواتكم ليا

**rabbat5** · 08-04-2010 05:26 AM

بالتوفيق ان شاء الله.

**lancerevolution** · 08-04-2010 09:20 AM

بالتوفيق و إن شاء الله بسيطة

**N.a.j.d** · 08-04-2010 09:39 AM

ربنا يوفقك ومستنين التقدرير

**hostook** · 08-04-2010 10:36 AM

بالتوفيق انشاء الله ربنا معاك وابقى طمنا.

**cayman69300** · 08-04-2010 07:30 PM

السلام عليكم و رحمه الله و بركاته
التقرير على كبس دورة التبريد
اولا الراجل شاف الردياتير و قال دة مينفعش
بصراحة القديم كانت نحاس و 2 ماسورة
المهم
قالى انا هجبيلك واحد جديد بالكرتونة
و فى انواع و اشكال و الوان
و انا هجيبلك نوع من الاخر - و اول ما هتشوفة فعلا هتقول يالا ركب الجديد
رحنا انا و هو المخزن و جبنا الردياتير الجديد و هو محطوط جوة كرتونة
و فتحناه يا معلم و عينك ما تشوف الا النور
بسم الله ما شاء الله شكلة حكاية
طبعا انا الشهامة اخدتنى و قلت توكل على الله يا عم الاسطى
ركبنا و تمام التمام
الردياتير الجديد عبارة عن ماسورة واحدة " انا كنت مستغرب جدا من الحكاية دى و مصنوع من الالومنيوم " الحاجة التانية بالعلب و كل حاجة
يعنى على التركيب على طول
نجى بقة للتكلفة
الردياتير الجديد : 550 جنية
جركن مية خضرا : 25 جنية
تركيب : 25 جنية
يعنى الاجمالى 600 جنية دفعتهم زى البطل بس طبعا لو نقص مية هروح اخزق عنية
بعد كدة الفلوس الباقية وكلانى فى جيبى
رحت للميكانيكى و كنت اول مرة اجربة
راح عمل رجلاش لفرامل اليد & اشتريت زيت باكم العلبة المكعبرة الالمانى و غيرة زيت الباكم بتاع العربية كلة و اخدنا هوا و تمام التمام
المصاريف الاخيرة
الميكانيكى : 10 جنية
علبة زيت الباكم : 25 جنية
بقشيش للصبى : 5 جنية
يعنى الاجمالى للميكانيكى و مشوارة = 40 جنية
و الحمد لله قاعد من الباكو اللى سحبة النهاردة من البنك 360 جنية
و شكرا على كدة

**ENG\AHMED** · 08-04-2010 08:05 PM

نصيحة ارمى المية الخضرا اللى حطيتها وهات جركن موبيل ب 40 جنية او مية مقطرة وعلبة اثيلين جلايكول واعمل انت مية خضرا

**islambana** · 08-04-2010 09:50 PM

تمام يادكتو ر هلالي ماقولتليش مين في اسيوط بيكبس دوره المياه علشان عاوز اكبس الدوره عندي انا كمان

**cayman69300** · 08-04-2010 10:16 PM

بص يا باشا
فى اسيوط اللى بيكبس الدورة
واحد اسمة مؤمن
دة بقا فين
عارف و انت داخل اسيوط من ناحية نزله عبد اللاه
هتمشى قدام مصنع الغزل و النسيح و بعد انتهاء سور المصنع اكسر على شمالك
هتدخل فى الشارع اللى جنبة سور مصنع الغزل
اول ما تدخل الشارع هتلاقى سور مصنع الغزل على شمالك و فى شوراع جانبية على يمينك
هو فى تالت شارع على اليمين
اسمة مؤمن و دة رقم موبايلة 0108667159
اتصل بية و قلة انا من طرف دكتور هلالى اللى معاه الفكترا a 4 النبيتى و غير عندك الردياتير
كلمة و قبل ما تكون فى اسيوط ادينى خبر و اقابلك و نروح مع بعض
و تحت امر حضرتك
السلام عليكم و رحمه الله و بركاته

**cayman69300** · 08-04-2010 10:20 PM

المشاركة الأصلية كتبت بواسطة eng\ahmed

نصيحة ارمى المية الخضرا اللى حطيتها وهات جركن موبيل ب 40 جنية او مية مقطرة وعلبة اثيلين جلايكول واعمل انت مية خضرا

طبعا كلام حضرتك صح الف فى المية
شوية كدة على اول الشهر هغير المية و هجيب مية حمرا موبيل احسن بس اطمن ان العربية مفيهاش تسريب
هقول لحضرتك حاجة غريبة جدا
انا لسة مركب ترموستات الكوعة من حوالى شهر - و الله النهاردة و انا بغير الردياتير لقيت املاح على فتحة الترموستات المية
و دة علشان العربية كانت بتنقص مية و كل ما ازود مية ترسب املاح اكتر و هكذا
فانا شاء الله اول الشهر هجيب المية الحمرا و ابقى عملت حاجة من الاخر
و شكرا لاهتمامك