الموضوع: ان شاء الله صيانة 1000 كيلو يوم الاحد

السلام عليكم
انا حجزت اول صيانه لعربيتي الكارينز هاي لاين يوم الاحد القادم ان شاء الله في مركز صيانة روكسي و اللي اكدي الكول سنتر ان زيه زي فرع ابو رواش فيما عدا موضوع الكماليات بس انا الحقيقه قلقان شويه لاني و لا مره سمعت حد بيتكلم هنا عن المركز ده و كل الناس بتتكلم عن مركز ابو رواش و كمان عن مهندس خالد و زوقه و استقباله للاعضاء و ربنا يستر و نلاقي حد يستقبلنا في روكسي و يطلع اصلا مركز كويس.
انا عربيتي وصلت لالف كيلو و كنت من كام يوم رحت ركبتلها شوية حاجات من عند علي رضا اللي ورا جنينه مول في مدينة نصر و الحقيقه عندهم حاجات كتييير للعربيه و جميله جدا سواء كماليات او قطع غيار زي الفوانيس بالكامل و كمان عندهم فوانيس الشبوره للعربيه و ثمنها 650 جنيه و اكتر شئ عجبني ان كل قطع الغيار كيا اصليه مش مضروبه و اسعارها ممتازه جدا و كمان اسعار الكماليات ممتازه جدا و انا هكتبلكو كل اللي ركبته و سعرهم كام:
1- طقم نواكل كامل(مقابض خارجيه-مقابض داخليه-اطار لفتحات التكييف و بكر التكييف-جرايد الابواب من الخارج زي بتاعة السيارات الخليجي وقالو اني اول واحد اركبها لانها لسه نازله واكبر ميزه فيها انها كيا مش مضروبه و بتركب في نفس مكان الموجوده في السياره بالظبط بنفس الكلبسات بس غاليين شويتين لانهم كبار)الطقم كله ب 850 جنيه
2- كسوه جلد كامله للسياره(فرش جلد اسود) و هما عاملينها مخصوص للسياره و شكلها حلو جدا و تركيبها عندهم و العمال ماشاء الله هناك عفاريت و ممتازين و سعرها كمان رائع بالمقارنه مع اسعار من اللي بتفصل فرش و مبيطلعش بنفس الجوده و بيستخدمو نفس الخامات و السعر نص التفصيل. (650 جنيه بالتركيب)
3- فرش فيبر للشنطه الخلفيه.(150 جنيه)
4-غطاء جلد طبيعي للدريكسيون.(50 جنيه)
5-عراقات للكراسي الاماميه فرو ابيض و عليهم شوية حركات كرتون كده عشان يفرحو العيال و طبعا انا معاهم(200 جنيه)
سعر الحاجات دي كلها حوالي 2000 جنيه
انا الحقيقه كنت عايز اشتري كشافات الشبوره دي بس قولت انتظر لما اسئل في التوكيل هيرضو يركبوهم و لا لاء و للعلم الطقم كامل الكشافات و الغطا و الدراع الاصلي اللي بيركب مكان الموجود بتاع النور.
وعايز اركب وحدات رفع للزجاج بالكامل و جهاز انذار وكمان عايز اركب كاميرا خلفيه و حساسات و برضه هنتظر لما اسئل ايه نظامهم في التوكيل لاني مش عايز اعمل اي حاجه ممكن تكون سبب في مشاكل في العربيه او سبب في خروجي من الضمان لا قدر الله.
انا بس عايز حد يطمني علي موضوع مركز روكسي ده و كمان لو حد يعرف ايه امكانية تركيب كماليات اشتريها من بره داخل التوكيل.
وياريت حد بقي يكلم الراجل اللي الناس كلها بتحكي عن احترامه المهندس خالد و يخليه يوصي علينا بتوع روكسي.