كيلو اللحم ب 42 جنيه

**د.أبونضال** · 08-04-2010 04:45 AM

[justify]
لفتت نظري دعوات مقاطعة اللحم التي يطلقها البعض بسبب ارتفاع أسعارها، وعلمت أن سعر الكيلو في القاهرة وصل إلى 60 جنيه، وبصراحة هذا مبالغ فيه جدا.
أنا أشتري اللحم من قرية بجوار المنصورة على طريق المنصورة المحلة اسمها "ميت الكرماء" وقديما كانت تسمى "ميت الغرقا" وتعتبر هذه القرية سوقا للحوم، ومعظم سكانها يعملون بتربية وتجارة المواشي.
عندما بدأت أشترى اللحم من هذه القرية قبل أكثر من سبعةأعوام كان كيلو اللحم يباع فيها ب 18 جنيها بينما كان سعره في المنصورة حيث أقيم 28 و30 جنيها.
الآن كيلو اللحم في المنصورة ب 55 جنيها بينما في قرية ميت الكرماء "42" جنيها بعد سلسلة ارتفاعات متواصلة منذ عيد الأضحى الماضي 30 ثم 32 ثم 34 ثم 36 ثم 38 ثم 40 والأسبوع الماضي أصبحت ب 42 .
سيقول قائل أن هذا اللحم بالتأكيد "مضروب" لكن أؤكد لكم أن الجاموس الذي أراه في "حظيرة" عم "سعد معروف" الجزار الذي أشتري منه بصحة جيدة جدا وأكبر دليل على جودة اللحم هو إقبال الزبائن .
عم سعد يذبح يوميا ثلاثة عجول جاموسي وعادة إذا تأخرت عليه حتى أذان العصر لا أجد لحما وأضطر للانتظار حتى اليوم التالي. وليس لديه ثلاجة لأنه عادة لا يبيت عنده لحم.
أريد أن أسأل كل الجزارين الذين يبيعون اللحم ب60 جنيها؟
هل عم سعد يخسر؟؟
[/justify]

**A7MED_PHARMA** · 08-04-2010 04:51 AM

الجزارين إلي بيعملوا كده
بيهيصوا مع الهيصة

**mxz911** · 08-04-2010 05:04 AM

نحكم عقلنا... نهاجر كلنا !

**Terrible_DaRsH** · 08-04-2010 05:16 AM

حد فاكر كيلو اللبن كان بكام من 6 سنين ؟؟

مش عارف هو اللبن دا بيتصنع مثلا ! سعره زاد بعد دخول الالفية التالة حوالى 125 % , طب الجواميس بتطلب فلوس اكتر و لا ايه ؟

مع ان الاسرة مبتشربوش , بس من فترة كان مطلوب فى البيت و انا بجيبه استغربت اوى , ايه ده وصل ل 5 جنيه و نص !!

انا فاكر انى اشتريت كيلو من كام سنة من حوالى 8 سنين ب 2 جنيه تقريبا .

انا مش مستغرب من السعر لكن اللبن دا مش بيتصنع و لا بيتزرع دى حاجة طبيعية , ليه سعرها يغلى كدا !

**eng.octooo** · 08-04-2010 12:35 PM

انا مش مستغرب من السعر لكن اللبن دا مش بيتصنع و لا بيتزرع دى حاجة طبيعية , ليه سعرها يغلى كدا

علشان اسعار النقل والبنزين زادت وكذلك الاعلاف والادوية البيطرية وشحن الاعلاف والضرائب العقارية ( قصدى الضرائب الجاموسية)
والكهربا غالية لانهم بيستخدموها فى الراديو علشان يشغلوا نجوم اف ام للجواميس الى بتتحلب علشان تبقى سعيدة ومبسوطة زى الشعب ...
طبعا دة غير انهم بيجيوا للجواميس ديليفرى من المالكى علشان اللبن يطلع جودتة عالية ...
وان مادة الفورمالين سعرها زاد لانها بقت المادة الحافظة للجثث ( قصدى اللبن الى اولادنا بيشربوة) ....بجد حرااااااااااام

**mahfouz1983** · 08-04-2010 01:54 PM

وبعدين ميت الكرما بلد مشهورة من زمان احنا كنا زمااااان بنجيب منها اللحمه بس دا ايام مكان كيلو اللحمه ب 8 جنيه في اواخر التمنينات اوائل التسعينات مش فاكر قوي بس كنا بنجيب منها اللحمه بس هما اعتقد مكنوش بيدبحو في السلخانه كان الزار بيدبح في دكانه والناس كانت بتكون عليه مووووووووووووت وزحمه

**نور القمر** · 08-04-2010 02:34 PM

في بلدنا كمان اللحمة ارخص من هنا بكتير بتفرق حوالي 10 أو 15 جنيه على حسب بتشتريها من القرية ولا مركز
والدبايح بتتدبح قدامنا يعني مضمونة وطعمها احلى بكتير لانها بتغذى على اكل طبيعي
حتى اللبن بنشتريه الكيلو ب 2 جنيه وبالرغم انه مخضوض يعني واخدين زيدته لكن احلى واطعم الف مرة من بتاع القاهرة ابو 5 جنيه
والزبدة بجيبها من هناك ارخص طبعا تحس انك عايز تاكلها كدة من جمال لونها ونقائها وطبيعيتها

**Ahmed Nouh** · 08-04-2010 05:40 PM

الارياف فى مصر هى المكان الوحيد اللى تحس فيه بطعم الاكل والشرب والخير

برغم ان الحكومه خلاص بتموت الفلاح بكل ما اوتيت من قوه بس اهو الدنيا ماشيه والفلاحين بتقاوح علشان تعيش

بنجيب من بلدنا برده اللحمه ارخص من مصر واطعم وكذلك الدواجن والبيض اللبن والجبنه والزبده والخضار والفاكهه , ربنا يتوب علينا من القاهره