أقتراح بتغير أسم الساحه الأجتماعيه

**PAYOO** · 21-05-2007 09:51 AM

اقترح أن نقوم بتغيير الساحه الأجتماعيه من "المنتدى الأجتماعي" إلى "الساحه الدينيه"

بشرط ان تكون كل الموضوعات منقوله ... وأن يكون الناقل لا يفقه شيء في الدين أو غير متخصص في علوم الدين .... وأن يضع عناوين شاذه مثل الجرائد الصفراء .... وأن يجلس بجوار الحاسب ليحصي عدد المشاركات الهايفه الخارجه عن مجال الحوار المنقول .... ويجلس يصيح ويهلل ويفرح اشد فرحه بعدد المداخلات التي لا تسمن ولا تغني من جوع ..... وأن يتفرغ لمثل هذه الموضوعات تفرغ كامل وكلما خرج الموضوع من شريط العناوين الجديده يدخل هو مره اخرى ليقول اي كلام في أي كلام ليجعل الموضوع موجود مره أخرى في شريط المهام

وسوف نشكره على كل ما يقوم به من خدمات للأعضاء المهتمين بالسيارات

**محمد المرسي** · 21-05-2007 10:03 AM

حبيبى أ.بايو ...
أنت كلامك جه فى وقته لأنى بصراحة شايف أن الموضوع زاد شوية ...
وكمان يعنى بنتكلم فى مواضيع غاية فى الخطورة ... ونحن وعلى ما أعتقد ليس أهلة لذلك ...
طيب متتكلموا فى الكورة مثلاً ... وخاصة أن ماتش الزمالك والأهلى النهاردة ... على فكرة أنا مبحبش لا أهلى ولا زمالك ولا الكورة المصرية من أساسه ...
وماتش النهاردة ده لو حد أتكلم فيه أنا متأكد أن المنتدى هيشوف أيام .....
طيب بلاش الكورة نتكلم فى السياسة ... بس أبعدونى أنا عن المواضيع دى ... طبعاً أنتم عارفين زائرى نص الليل ...
طيب بلاش سياسة خلينا نتكلم شوية عن أنفسنا ...
أيه رأيكم لو كل واحد يقول عايز من المنتدى ده أيه ... وهل حقق بعض ما كان يتمنى ولا لأ ...
طبعاً الأختيار أختياركم بس يلاش دين (منطقة خطر للى مش فاهم) ...
وتقبلوا تحياتى ...

**sh_masry** · 21-05-2007 10:19 AM

طيب متتكلموا فى الكورة مثلاً ... وخاصة أن ماتش الزمالك والأهلى النهاردة ... على فكرة أنا مبحبش لا أهلى ولا زمالك ولا الكورة المصرية من أساسه ...
وماتش النهاردة ده لو حد أتكلم فيه أنا متأكد أن المنتدى هيشوف أيام .....
طيب بلاش الكورة نتكلم فى السياسة ... بس أبعدونى أنا عن المواضيع دى ... طبعاً أنتم عارفين زائرى نص الليل ...
طيب بلاش سياسة خلينا نتكلم شوية عن أنفسنا ...

علشان كده انا بتكلم على الصينى بس و اهه مقدور على الناس بتاعته هههههههههه
ناس طيبه و كلمه واحده تراضيهم .... احسن من بتوع بالليل مافيش حاجه هتراضيهم ابدا ههههههه

a7'ookom
Sherif

**PAYOO** · 21-05-2007 10:23 AM

المشاركة الأصلية كتبت بواسطة محمد المرسي

طيب بلاش سياسة خلينا نتكلم شوية عن أنفسنا ...
أيه رأيكم لو كل واحد يقول عايز من المنتدى ده أيه ... وهل حقق بعض ما كان يتمنى ولا لأ ...
طبعاً الأختيار أختياركم بس يلاش دين (منطقة خطر للى مش فاهم) ...
وتقبلوا تحياتى ...

كلامك كلام له وزن وإن دل فهو يدل على معرفه بما تريد والهدف من تواجدك في أي مكان تتواجد فيه

تحياتي لك يا أستاذ محمد

وبعد أذنك تشارك بفكرتك في الموضوع ده :arrow: أضغط هنا للذهاب للموضوع المقترح

**جندى مجند** · 21-05-2007 12:22 PM

و الله يا بايو احنا كنا متفقين فى بداية المنتدى على عدم الدخول و الخوض فى الموضوعات الدينية و لا السياسية لأنها مع الوقت حتقضى على المنتدى زى ما قضت على غيره من المنتديات ... لكن الكلام دة متنفذش و الواحد بيلاقى نفسه مش قادر يسكت لما يشوف حاجة غلط بتتكتب فى الدين ... فتعالوا نجدد الدعوة الى اتفاق غير مكتوب (أو مكتوب) بين جميع الأعضاء بعدم الدخول فى الموضوعات الدينية الا اذا تعلق الأمر تعلقاً صريحاً و مباشراً بمجال السيارات

**PAYOO** · 21-05-2007 12:24 PM

المشاركة الأصلية كتبت بواسطة جندى مجند

و الله يا بايو احنا كنا متفقين فى بداية المنتدى على عدم الدخول و الخوض فى الموضوعات الدينية و لا السياسية لأنها مع الوقت حتقضى على المنتدى زى ما قضت على غيره من المنتديات ... لكن الكلام دة متنفذش و الواحد بيلاقى نفسه مش قادر يسكت لما يشوف حاجة غلط بتتكتب فى الدين ... فتعالوا نجدد الدعوة الى اتفاق غير مكتوب (أو مكتوب) بين جميع الأعضاء بعدم الدخول فى الموضوعات الدينية الا اذا تعلق الأمر تعلقاً صريحاً و مباشراً بمجال السيارات

وأنا معاك يا باشمهندس

**محمد المشد** · 21-05-2007 03:21 PM

الاخوة الاعزاء انا معكم فى عدم الدخول فى المناقشات الدينية خاصة وان غالبيتنا من غير ذوى التخصص به ! اما اذا استشهد احد الاخوة بحديث نبوى او اية قرانية فى امر اجتماعى كيف سيتم ايقاف مشاركتهم او الغائها او حتى منعة من ابداء الرأى
لذا فأننى ارى إلا نحجر على اى فرد مهما كان عرض اى موضوع ولا اريد ان اتذكر مراقبى الصحف الموجودين حتى اليوم بالجرائد المصرية والذى تغير اسمهم الى رؤساء صحف فهم يمنعون ويقرون ما ينشر وما لا ينشر بحجة ان هناك بعض الامور ذات الخط الاحمر خاصة مقالات الاستاذ فهمى هويدى الممنوع كثير منها بجريدة الاهرام !
عموماً اؤيد فكرة عدم نشر اى موضوعات ذات طابع دينى وفى نفس الوقت اتمنى على الاعضاء عدم اثارة مايسىء للدين الحنيف
ولى طلب اخير من الاخ بايو رفقاً بنا يااخى العزيز اترك من يتكلم يتكلم طالما انه فى حدود الادب ولكن لى سؤال هل عدد المداخلات بيعطوا علية فلوس ولا اية ؟

**Dr Ahmed** · 21-05-2007 03:28 PM

انا أختلف معكم جزئيا يا اخوانى..

فلا يوجد اى مانع من عرض موضوع دينى مفيد..

اعتراضى أن ندخل بأرجلنا لمناطق جدل وخلاف دينى بإثارة مواضيع جدلية .. أما نشر موعظة أو تنبيه أو أى معرفة دينية فلا تندرج تحت المحظورات.. فقط نحظر الدخول فى مواضيع خلافية تثير الجدل ، وليس هنا المكان الطبيعى للجدل الدينى لأنه يكون بين متخصصين.
وشكرا

**mbluethunder** · 21-05-2007 09:22 PM

المشاركة الأصلية كتبت بواسطة PAYOO

اقترح أن نقوم بتغيير الساحه الأجتماعيه من "المنتدى الأجتماعي" إلى "الساحه الدينيه"

بشرط ان تكون كل الموضوعات منقوله ... وأن يكون الناقل لا يفقه شيء في الدين أو غير متخصص في علوم الدين .... وأن يضع عناوين شاذه مثل الجرائد الصفراء .... وأن يجلس بجوار الحاسب ليحصي عدد المشاركات الهايفه الخارجه عن مجال الحوار المنقول .... ويجلس يصيح ويهلل ويفرح اشد فرحه بعدد المداخلات التي لا تسمن ولا تغني من جوع ..... وأن يتفرغ لمثل هذه الموضوعات تفرغ كامل وكلما خرج الموضوع من شريط العناوين الجديده يدخل هو مره اخرى ليقول اي كلام في أي كلام ليجعل الموضوع موجود مره أخرى في شريط المهام

وسوف نشكره على كل ما يقوم به من خدمات للأعضاء المهتمين بالسيارات

الله ينور عليك يا هاني بجد وخاصة مقطع الجلوس الدائم بجوار الحاسب كمن ينتظر خبر فوزه في الأنتخابات أو الياناصيب