>>> موضوع عن سلبيات جميع وكلاء السيارات في مصر <<<

السلام عليكم و رحمه الله
اعضاء المنتدي الكرام
فيما يخص السيارات و موديلاتها و انواعها المختلفه في السوق المصري
احنا بيتم التغرير بينا من بعض وكلاء العربيات و مصانعها
و للاسف المنتدي احتوي علي اتجاهات بتساعد علي كده
بلاش مشاعرنا تخلينا ندافع عن توكيلات سيئه و خدمه سيئه و نغرر ببعض احنا كمان
لازم ان حبينا ان احنا نلاقي خدمه احسن و معامله راقيه و مميزه
لازم نتحد في الكشف عن السلبيات المنتشره في سوق السيارات في مصر
عدد الاعضاء زاد و المنتدي بقي ليه كلمه مسموعه بين مختلف المحافظات
يبقي نستغل الموضوع ده لصالحنا بدل ما نستغله في اثراء من لا يستحق من توكيلات سيئه عن طريق الاشاده و الدفاع عن اي حاجه غلط من ناحيه اي توكيل لأي عربيه
ارجو من الاعضاء اللي بتراعي ربنا في كلامها و مقدره ان كلامها بيترجم لفلوس عضو تاني بشتري بيها العربيه بسبب كلامه
ارجو منهم يشاركوني في الموضوع ده
طبعا مميزات اي عربيه موجود الكلام عنها في قسمها
و عاده اي كلام وحش عن العربيه بيتم الاستماته في تكذيبه و تسفيهه لدرجه بتوصل في كثير من الاحيان لمشادات و ايقافات و عقوبات
فأرجو ان الموضوع ده يفضل مفتوح للمناقشه في كل ما هو سلبي في العربيه
من اول الموضوع السخيف بتاع الاوفر علشان تستلم فوري او دفع مبلغ حجز و الانتظار شهور متعرفش فيها فلوسك بتستغل في انهي بنك وحضرتك مش عارف تظبط حياتك عربيتك هتستلمها امتي و الموضوع يوصل انك تتصل و تجري وراهم و تتحايل لغايه ما تستلم عربيتك اللي لونها حتي ممكن ميكونش اللي انت عايزه!!
و قصه رفع الاسعار المحليه في نفس الوقت اللي الاسعار بره بتنخفض فيه
و رفع اسعار العربيات دون مبرر
و بعد قصه الشراء و الاستلام عايزين نفند السلبيات الخاصه بكل توكيل
اسلوب التعامل ايه في حاله وجود عيب في العربيه و هل مركز الخدمه بيقدملك خدمه ترضاها ولا لأ و هل قطع الغيار متوفره بأسعار معقوله ولا مبالغ فيها
ارجو ان الموضوع ميخرجش عن هدفه و بلاش يكون ساحه للدفاع عن توكيلات لا تستحق
ارجو انه يفضل موضوع هجومي علي كل توكيل لا يحترم عملائه او بيستغلهم
الموضوع ده ليا و ليك و لينا كلنا
مسير العربيه اللي معاك تبيعها و تركب غيرها
و لو فضلنا ندافع بعند و استماته عن توكيلات لا تستحق يبقي مسيرنا نقع احنا كمان مكان الناس اللي بتعاني من نفس التوكيلات
و بطريقه او بأخري اكيد لما الموضوع يكبر و مشاركاتكم تزيد ممكن نشكل ضغط علي التوكيلات السيئه في السوق و نجبرها انها تتغير الي الاحسن
و ممكن ساعتها نخاطب جهاز حمايه المستهلك بالمشاكل المجمعه او حتي الصحافه
بس يكون لينا هدف موحد و هو مصلحتنا
و الحمد لله المنتدي مليان اعضاء متميزه و راقيه و بتراعي ربنا
انا مستني كل واحد من دول يشارك و يقول السلبيات

يشرفني إني أكون أول واحد يشارك مع حضرتك .

بالنسبة لي ، أنا غير راضي تماما عن توكيل العربية بتاعتي ، وبكده يمكن أكون أول واحد يتكلم على الوكيل ده بالسلب ، اللي هو وكيل رينو في مصر ، وطبعا لي أسبابي وهأقول بعض الأسباب دي كامثال وليس الحصر .

قبل أي حاجة نوع عربيتي رينو أوبتيما ، أول يد وميراث عن والدي رحمة الله عليه .

أول موقف ، وهو عند الأستلام ، زي ماقولت والدي كان هو الشاري وأنا كنت في ثانويه عامة وقتها ، ووالدي ملوش أي خبرة في العربيات ، مع أن دي كانت تالت عربية بالنسبه له.
الموقف كالتالي ، العربية أحنا أستلمناها في شهر 7 سنة 1998 ، والمفاجئة أن الوكيل منزل العربيات متأخرة سنة في الشحن ، بمعنى أن العربية بتاعتنا كانت موديل 1997 ، وطبعا أنا لو كنت مكان والدي مكنتش أستلمت بالوضع ده ، ولكن ده اللي حصل ، شوف بقى معنى كده هو واخد تمن موديل السنة ومسلم موديل قديم ، وده كان موقف الشراء .

العربية كان عليها ضمان 3 سنوات أو 60000 كم ، كما أذكر ، وكانت تحركات والدي قليلة جدا بحيث أنه في 3 سنين لم يتجاوز 15000 كم .

تاني حاجة بالنسبة للصيانة ، العربية كان فيها من أول ماجبناه عيبين أساسيين : 1- العضة في الفتيس ، وده كل صيانة كنا بنروح نقولهم عليه ، ولدرجة أننا روحنا في مره مخصوص مش في ميعاد للصيانة بسبب أن النقلة التالتة مابتجيش أصلا ، وطبعا كل مره ماتتصلحش لكن تتلصم .

2- الدبرياج : دواسة الدبرياج كانت تقيلة جداااااااااااااااا زيادة عن اللازم ، وطبعا كالعادة لازم يبقى العيب مش من عندهم وأن العميل هو اللي مش بيعرف يسوق - الأستخفاف المعتاد بعقل العميل - وكانوا بيقنعوا والدي دايما أنه هايلين مع الأستعمال بحكم أن العربية لسه جديدة ، ومع ذلك من كتر تقل الدواسة سلك الدبرياج أتقطع وكانت الصدفة أن والدي كان رايح لصيانة وقتها ، وأحدى الفنيين أستلمها منه بره التوكيل وحركها بدون دبرياج لداخل التوكيل ، والعربية أتركبلها سلك دبرياج جديد ، وتخيل يقولوا أيه ، قالوا لوالدي "العربية دي فيها ديسك الدبرياج بايظ والمفروض يتغير علشان السلك الجديد مايتقطعش" ، سبحان الله دلوقتي بعد لما الضمان خلص الديسك بقى بايظ .

الأسوء من كده هو أني كنت بغير السلك ده قريب لنفس السبب ، والمفاجئة أن السلك اللي راكب مش بتاع العربية ، لكن بتاع الرينو الكليو 2 .
تخيل الوكيل اللي بتأتمنه على عربيتك ماعندوش قطع الغيار وبيوفقلك قطعه ، يعني أسوء من أي ميكانيكي ، على الأقل بتشوف الميكانيكي بيركب أيه ، مش ياخد العربية عنه وماتعرفش بيعجن في أيه .
ومن وقت وفاة والدي وديتها هناك مرتين ، والمرة الأخيرة حصل موقف خلاني والحمد لله بطلت أروحلهم خالص .

أنا أسف أني طولت عليكم ، بس الدكتور أمير هو اللي قال كل واحد يقول حكايته مع التوكيل وبلاش طبطبه .

يا باشمهندس الشرف كله ليا و لجميع الاعضاء
و شكرا ليك علي مشاركتك لينا بتجربتك السيئه
و بفكر الاعضاء ان الموضوع ده مش غرضه الاشاده بالتوكيلات
الموضوع ده هدفه فضح الجانب السيء لأي توكيل يسمح لنفسه بالاستعلاء علي المستهلك
لما كلنا نشارك بتجاربنا السيئه هتعرف خبايا كل توكيل و الوجه الاخر ليه

موضوع احيك عليه بشده و يمكن بسبب الموضوع اللي انا فيه احيكك اكتر واكتر

انا اذا سمحت اعلق على كلم حضرتك
1- فعلا بيتغرر بينا من التوكيلات
2- المنتدى ممكن يكون بيحتوي على اتجاهات بتساعد على كده لما تلاقي حد سعيد جدا بعربيته فيشكر ف كل حاجه العربيه و التوكيل و ممكن تكون الخدمه اللي هو بيحصل عليها مش الخدمه المميزه بس احنا خدنا على اننا نرضى بقليلنا ويمكن اقل من قليلنا كمان
3- لو حاولت تتكلم عن سلبيات ممكن تقابل بالهجوم و الدفاع عن السياره او التوكيل او الخدمه لان بعض اصحاب السياره اللي انت بتفضح توكيلها بيعتبر انك بتهاجمه هو شخصيا وده شيء غريب فعلا
4-
يبقي نستغل الموضوع ده لصالحنا بدل ما نستغله في اثراء من لا يستحق من توكيلات سيئه عن طريق الاشاده و الدفاع عن اي حاجه غلط من ناحيه اي توكيل لأي عربيه
ارجو من الاعضاء اللي بتراعي ربنا في كلامها و مقدره ان كلامها بيترجم لفلوس عضو تاني بشتري بيها العربيه بسبب كلامه
ارجو منهم يشاركوني في الموضوع ده
طبعا مميزات اي عربيه موجود الكلام عنها في قسمها
و عاده اي كلام وحش عن العربيه بيتم الاستماته في تكذيبه و تسفيهه لدرجه بتوصل في كثير من الاحيان لمشادات و ايقافات و عقوبات

+1111111111111111111111111111111111

بالنسبه للتوكيل وهل قدم ليا خدمه ارضاها
فهو قدم ليا درس ف الكذب و الخداع و ما زاد هو عدم قدرته على حل مشكلتي حتى اليوم ولن يحلها
لانه ببساطه لو مشكلتي معاه انتهت لصالحي فهي بمثابة اثبات انه توكيل مخادع و اثبات فشلهم ف ادارة مشكلتي
الناس دي استخفت بيا لدرجه خداعي بكل بساطه وكأني ساذج و كنت بالفعل ساذج
الناس دي استخفت بيا لدرجه ان كل اللي عرضوه عليا كام صيانه مجانيه يعني هما معترفين ان ليا حق
لكن متروك ليهم تحديد هذا الحق و المفروض طبعا اني ارضى بالعضمه اللي رموها ليا
مش عارف اقول عليهم ايه
طبعا ناس كتير عارفه مشكلتي و اللي ميعرفهاش اللينك بتاعها اهو
http://www.nilemotors.net/Nile/131964-a.html

و الف شكر على موضوع حضرتك المميز جدا

موضوع ممتاز يا دكتور أمير
و الحقيقة توقيته بالنسبة لي و للكثير من ملاك السيراتو توقيت ممتاز

لة هاتكلم عن توكيل كيا فأنا لا أستطيع كتم حقيقة المعاملة المميزة و الخدمة المحترمة المهذبة
و اديله في الصيانة 10 من 10 لأني ما شتكيتش ولا شكوى صغيرة و كنت خارج من عندهم و ابتسامتي من الودن للودن و حابب عربيتي أكتر و أكتر

ولكن

بعد حركة العيال اللي عملوها و رفضهم لدخول السيارات الخليجي للصيانة بعد أسابيع من رفع تكاليف صيانة هذه السيارات ....فهو نقطة يجب الوقوف عندها و مناقشتها ....

1 - ليه بتعمل كده !
الإجابة : لأني عايز أبييع عربياتي و الخليجي بياكل مني السوق
الرد : هي فين عربياتك دي ..و الحجز عندك بالشهور لحد دلوقتي ...يعني لا منك ولا كفاية شرك

الإجابة التانية : أنا هاعمل صيانة لعربياتي بس لأني باتكلف مصاريف دعاية و عمالة
الرد: هو أنا باقولك دخلني الضمان أو اعملي صيانة ببلاش !
أنا باعمل صيانة و بادفع الطاق طاق ونص ...يعني مصاريفك مدفوعة بزيادة

الإجابة التالتة : ماعنديش قدرة استيعابيه الا للعربيات اللي ببيعها بس ....
الرد : الكلام ده يقولو جابر عبد الشهيد مش (الوكيل الوحيد لكيا موتورز كوربوريشن) اللي فالقينا بيها في التخويف اللي في الجرنال
انت وكيل كيا ...لك و عليك كل حقوق وواجبات الشركة الأم في منطقتك ومن واجبات الشركة دي انها تصون انتاجها في أي حتة في العالم .(وبلاش تضمنه..خلينا حبايب).


وللا أنا غلطان يا اخواننا

عموما هخانشوف رد الشركة ايه

اللي يحب يشاركنا يتفضل في قسم كيا
واللي يعرف حد معاه خليجي أو كوري فورتي و متضرر يبلغه و يكون مشكور

ابو مارو
احمد سامي
تحيه ليكم و علي اعضاء المنتدي كلهم
انا طبعا مبسوط بمشاركتكم ليا في الموضوع ده
حتي الاعضاء اللي شافو الموضوع و مشاركوش فيه انا مبسوط بيهم
لأن الهدف منه هو فرض سيطره المستهلك الغير راضي عن عربيته و توكيلها و اسلوب التعامل معاه
التوكيلات هرتنا اعلانات موجهه و مدفوعه الاجر
و احنا كمستهلكين افراد معندناش ابواق دعايه زيهم
بس المنتدي ادانا فرصه
اننا نتواصل مع بعض
و لو فيه خلل من توكيل ما ممكن نكتشفه من بعض بسهوله
فالموضوع ده ان شاء الله هيكون صفعه علي وجه كل توكيل لا يحترم زبائنه من ساعه الاستلام و دفع الفلوس لحد الصيانات و الضمان
الضمان اللي توكيلات كتير بتحاول تتنصل منه
و معامله سيئه للافراد تحت قناعه ان الزبون لو مشي في الف غيره
بفضحنا للتوكيلات دي مش هيكون في الف غيره
و مش هيكون في زبون من اصله
ساعتها بقي مش هيكون قدامهم غير الرضوخ لرغبات الزبائن و معاملتهم كما يجب
بس الموضوع مش هيكون قوي الا بمشاركات الاعضاء
و ياريت كل قسم عن اي ماركه تكون الشكوي من التوكيل او الموزع او اي حاجه تخص العربيه هنا
علشان الناس كلها في المنتدي تعرف الحقيقه اللي بتداري ورا اعلانات و مقالات الجرايد

بصراحة يا جماعة هو موضوع متميز طبعا بس بصراحة يعقد ..
يعني أنا بصدد شراء سيارة جديدة وكانت عجباني الأسبرانزا m11 والناس تقولي لأ بلاش الصيني أشوف الهيونداي ألاقي واحد شاري عربية زيرو بعد شهر ولا أثنين الموتور يتغير دي كارثة والأفيو ما شاء الله كلها عيوب والتوكيل مش بيصلحها .. أعمل أيه أشتري عربية من المريخ

اقتباس:

---

المشاركة الأصلية كتبت بواسطة ash257

أعمل أيه أشتري عربية من المريخ

---

الموضوع ده المستفيد الاول منه هو انت و كل اللي بيدور يشتري عربيه زيرو
هتنزل و تسئل و تلف و تدور
و هتلاقي كلام معسول
و لما تدفع الفلوس و العربيه تبقي معاك تلاقي الويل؟!
حقك تشتري عربيه عجباك و يكون توكيلها محترم

اقتباس:

---

المشاركة الأصلية كتبت بواسطة amir

الموضوع ده المستفيد الاول منه هو انت و كل اللي بيدور يشتري عربيه زيرو
هتنزل و تسئل و تلف و تدور
و هتلاقي كلام معسول
و لما تدفع الفلوس و العربيه تبقي معاك تلاقي الويل؟!
حقك تشتري عربيه عجباك و يكون توكيلها محترم

---

+1111111111