الموضوع: جهاز حماية المستهلك (مرعب شركات السيارات) فعلا

::: بسم الله الرحمن الرحيم :::

السلام عيلكم ورحة الله وبركاته :-
الحكاية ومافيها ان فى واحد صاحبى أشترى عربية أفيو من توكيل منصور شيفروليه بتاع المنصورة
واستلم العربية فى ميعادها وكل شيئ تمام . فجأة لقى عيب فى العربية فى المساعدين الأماميين (مع العلم أنه جايب العربية تقفيل كورى مش مصرى) فذهبت أنا وهو الى مركز صيانة شيفروليه اللى فى طنطا وبعدين قالهم العيب اللى موجود فى السيارة فاذا بالمركز يقوموا بتغيير عمود الدركسيون على أنه العيب اللى هما شايفينوا وبعدين قاللوا العربية كده تمام وفعلا حسينا ان هى مافيهاش حاجة وقلنا يمكن أحنا اللى غلطانين ومشينا عادى . وبعد يومين كده لقى صاحبى نفس العيب فااتصل بالمركز وقالهم فكلمه مهدنس من مركز الصيانة وقاله عموما مانقدرشى نعملك حاجة والعيب ده موجود عموما فى الأفيو ( من الآخر أعلى مافى خيلك أركبه ) مع أنه لسه فى الضمان وكان على استعداد يدفع أى فلوس بس العربية تتصلح
بعد كده صاحبى بعت ايميل لجهاز حماية المستهلك وحكالهم على الموقف كله فا أتصلوا بيه وحددوا معاه ميعاد وقابله وعرفوا كل اللى حصل وبعد يومين بالظبط نفس المركز أتصل بيه والكلام أتغير 360 درجة ياباشا اللى أنت عايزه وحضرتك تشرف فى أى وقت وأنت زعلان مننا ليه بس وحاجات من دى كتير وبعد كده جهاز حماية المستهك أتصل بيه وقاله فى مركز صيانة بيفتح فى المنصورة جديد ممكن نرتب لك ميعاد وتروح يصلحوا العيب ده وفعلا صاحبى راح للمركز ده وفعلا تم اصلاح العيب الحمد لله والعربية تمام دلوقتى ماشاء الله .
بجد تحية خاصة لهذا الجهاز المحترم والعاملين فيه والقائمين عليه
أسف للاطالة بس كان موقف لابد أن اذكره كاملا

|طب ينفع ابعتله شكوى ان توكيل فولكس مش راضى يدخل العربيات الخليجى تعمل صيانه الا لما تدفع 7500 جنيه ؟؟؟