ايه أخر تقاليع العيال

**aboalm** · 21-05-2007 10:47 AM

السؤال المطروح له هدف اعتقد انه كويس
كتير مننا متزوجين و لهم أولاد ياريت نعرض بعض مشاكل الاولاد مثل التصرفات الغريبه او ظاهره غير محترمة فى المدرسة بيمارسها الطفل ومش شرط يكون طفل طبعا يعنى تصرفات المراهقين البايخه مثلا زى ماكان الواحد مننا زمان اخره انه ياخد مفتاح العربيه من غير ما والده يعرف و ينزل ياخد بيها لفه و هونايم
اعتقد كده الموضوع بقى واضح و الهدف منه التعرف على أى ظاهره بحيث يكون الجميع على علم بها قبل حدثها لتجنبها

**محمد المرسي** · 21-05-2007 11:29 AM

أستاذى الفاضل ...
كما تدين تدان ... اللى الأولاد بيعملوه احنا عملناه .. لكن بطرق مختلفة ...
هتلاقى مثلاً أنهم مبيمعوش الكلام يبقى أكيد أنت عملت كده .. ولو مكنتش عملت كده يبقى عملت حاجة تانية ..
ثم فكرة أنك تضغط على مراهق (منوجهة نظرى) خاطئة لأن المراهق بيكون شايف نفسه أنه وصل للسن اللى يخليه يعمل كل حاجة بنفسه فإذا ضغط عليه هيكون المصير هياخد مفتاح العربية مثلاً من وراك ..
لكن إذا صاحبت المراهق وأن تعطيه حرية الفكر والتصرف (وطبعاً فى الأساس التربية) ستكون مثله الأعلى ...وطبعاً لا بد منك أن تكون حكيم فى تصرفاتك ... بمعنى أن تكون متوقع لرد الفعل ...
أما بالنسبة لموضوع المدرسة فهذه ليست بمشكلة إذا طبقت مفهوم التربية الصحيح ...
ومفهوم التربية هو أن تشعره بأنك بجانبه ... فمثلاً جالك فى يوم وأشتكالك من مدرسه وأ، مدرسه شخط فيه ... لا بد وأن يكون كلامك معاه سلس ... متعقدش الدنيا فوق دماغه ولا خليه يفتكر أنه فوق المدرس أو يخليه يفتكر أنك مبتعملش لصالحه ... وطبعاً لازم تكون فى الأساس قبل كل هذا أن تسأله دائما عن أحواله عن علاقته بزملائه ومدرسيه عن طلباته وأحلامه .. ولا تستهر بسنه الصغير ... فكن له صاحب وأب ... لابد من جعلك لأبنك المثل الأعلى وأن تكون سره الأعظم ...

هذه بعض مفردات التربية ...
وآسف على الأطالة ...
وتقبل تحياتى ...

**جندى مجند** · 21-05-2007 11:58 AM

أنا بنتى لسة عندها سنتين و نصف فلسة ما دخلتش فى سن المشاغبة! لكن لى صديق عنده بنته عندها 5 سنين بيحكيلى انها بتلعب جمباز فى نادى سموحة ... و لكن بعد فترة بدأت تكره اللعبة دى بس هو كان بيحاول يقنعها بالعافية تستمر فيها ... و مرة كان موصلها التمرين و مكانتش عايزة تدخل صالة التدريب و لكن زعقلها و أرغمها انها تدخل و قعد فى الكافيه يستناها تخلص التمرين .... عارفين ايه اللى حصل بعد كدة؟

فضل مستنيها مطلعتش و كل الأطفال طلعوا من الصالة ... دخل يدور عليها المدرب قاله انها مجتش أصلاً!!!

الراجل طبعاً كان حيتجنن ... راح بلغ الأمن و بدأوا ينادوا عليها فى الاذاعة الداخلية للنادى ... و فضلوا حوالى ساعة يبحثوا عنها فى كل مكان لحد ما واحد من أعضاء النادى لقاها و راح سلمها للأمن ...

اللى حصل بقى ان البنت دخلت صالة الجمباز من باب و طلعت على طول من الباب التانى و قعدت تتجول فى النادى لحد ما لقوها!! طبعاً دى كانت أول مرة باباها يمد ايده عليها ...

**محمد المشد** · 21-05-2007 12:07 PM

بحق اؤيد الاخ محمد مرسى فى فكرة ، نعم الى حد بعيد لابد من صداقة لابنك والتعامل معه على انة صديق سواء البنات او الاولاد على السواء لاتفرقة عندى بينهم إلا فميا يخص كلاً منهم
ويجب على الاباء مراعاة ابنائهم ومعرفة اصدقائهم سواء فى النادى او المدرسة او العمارة التى يقطنون بها ! لان هذا الامر فى غاية من الاهمية
ومن الامور الهامة فى التربية عدم وجود اى شجار بينك وبين زوجتك امام اولادك مهما كان الامر لانة بيفقد الثقة بين الاب والابناء ويضعف شخصية الام امام ابنائها !
هذا بالاضاة الى اهمية مراعاة والديك لانه كما تدين تدان

**3mr Farrag** · 21-05-2007 01:11 PM

مع كامل احترامي لكل الاباء....لحد دلوقتي صعب الاقي اب متفاهم مع ابناءه بطريقه تخليه قريب منهم .....يعني تحس انك في مصلحه حكوميه..كل مصالح في بعض محدش بيراعي التاني في اي حاجه ..و كل واحد فاكر انه هو اللي صح والتاني ده غلط و مش فاهم حاجه غي الشغل....
حقيقي بقي الاباء و الابناء بيتعمله مع بعض بهذه الطريقه ....و مافيش اي وقفه للتفكير مين اللي غلط و مين اللي صح...لأنك هتلاقي ان الاتنين غلط ..لأن البدايه غلط اصلا
و ده كله لاسباب و ممكن ناس كيتير تعترض مع طريقه تفكيري
و هو الاساس لما شاب يجي سنه انه يتأهل للجواز....يعني الواحد بصراحه بيشوف حاجات غريبه...تلاقي واحد رايح يتقدم و لا معاه شقه ولا معاه فلوس يادوب المرتب
هتيجوا طبعا تقوله ده ماله بالعيال...خليكوا معايا و استحملوني شويه
يروح الشاب ده يتجوز بالطريقه التقليديه و يقولك انا عايز اتجوز و يبقي عندي بيت و عيال ....و يروح يتجوز و يفتح البيت ...بس طبعا الحياه مش واخده راحتها معاه ...و يجيب عيال
لو كل واحد اتجوز بالطريقه ديه هتلاقيه كل همه و تفكيره ازاي يجيب فلوس علشان البيت و التعليم و المصاريف....فا من الاخر ما فيهوش ديماغ يوعد يفكر ازاي يربي ده بطريقه متحضره و ازاي يفهم ولاده و يفهم تفكيرهم و يعلمهم الصح من الغلط....هي من الاخر دايره حوالين نفسها هتلاقي اللي اتجوز ده بالطريق ديه ابوه برضه اتجوز كده و جده و الخ...
نسيب بقي موضوع الجواز ...نيجي للي خلاص خلفه و جابه شوحطه :lol: ازاي هيتعامل معاهم؟؟؟؟

اعتبر نفسك في الشغل و قاعد في غرفه فيها موظفين ...هتلاقي اللي بتتعامل معاه بطريقه سطحيه و هتلاقي اللي ملصم معاه في المعامله و هتلاقي صديق يحبك و يفهمك و يكون جنبك لما تكون محتجلوه....
هتقولي ايه اللي جاب بمعامله الناس اللي في الشغل بي عيالي
هاقولك اللي قولت عليه قبل كده ان فيه واحد بقي صاحبك من الشغل...اشمعني هو يعني ....بقي صاحبك ازاي يعني؟؟؟؟من الاخر فتحتله قلبك
يعني تحكي معاه و تقوله علي مشكله عندك ...يوم يكون عايز منك خدمه تروح تقدمهاله ....و اكيد صاحبك برضوا هيتعامل معاك بنفس الطريقه
و هو ده الاختلاف بينه و بين باقي الموظفين ...علشان بقي في تعامل تاني غير الشغل
نفس الكلام بين الاب و ابناءه...تلاقي البيوت عامله ذي المكاتب الحكوميه ..كلها عمليه شغل...يدفع فلوس المدرسه يديله المصروف...و التاني اخره لما ابوه يقوله روح مثلا وصل والدتك ....ودي اختك ...اشتري كذا....تيجي تطلب منه حاجه يقولك لأ و هو كده...يعني ايه هو كده .....لازم الواحد يفهم اللي قدامه علي الاقل وجهه نظره
فين بقي ولادك الي عملين ذي صاحبك في الشغل...تحكي معاه علي حاجه .... يقولك علي مشكله حتي.......بس في الاخر هيكونوا اصحاب مش عمليه هات و خد

كل واحد لو جرب يقرب يتكلم مع ولاده ...لو في اي حاجه حتي...و الله هيلاقي فرق

الكلام ده من الناس الي احتك بيهم و يسمع من ده و من ده.....و ليس شرط انها تكون حياتي كده :lol:

الموضوع: ايه أخر تقاليع العيال

LinkBack

أدوات الموضوع

عرض

-

المواضيع المتشابهه

ده اخره لعب العيال

وبعدين فى لعب العيال ده

الشباب و تقاليع العربيات

الكلمات الدلالية لهذا الموضوع

المفضلات

المفضلات

ضوابط المشاركة