الموضوع: ربنا كرمنى وغيرت العربيه , دا انا بس مش انا اللى هنا !!

كان قرار صعب جدا بالنسبه لى انى اغير اللانسر , صحيح هى كانت مريحانى وموفرالى كل اللى محتاجه دلوقتى بس الفرصه طبعا اللى اتوفرت غيرت لى تفكيرى

البدايه كانت انى بدور على حاجه سبور وفى نفس الوقت تناسبنى بعد الزواج عن قريب , تقريبا كل اصحابى تزوجوا والاستقرار هياكل منهم حته وانا اللى لسه قاعد مع اهلى برغم ان سنى اكبر منهم كلهم ( 21 سنه ) , كل يوم وانا خارج من الجراج او بسقى الزرع الصبح فى الجنينه بتاعت البيت اسمع نفس الكلام من الجيران وهما خارجين شغلهم كل واحد البسمه ماسكاه من صراصير ودانه الاتنين وبيقولى يا ابنى الحق اليومين دول وتوكل على الله ما اهو ربنا فارجها اهه

بس انا شايف ان لسه شويه , حاليا انا فى اجازه من شغلى المعتاد بحاول اصفى ذهنى شويه من كتر عروض الشغل الكتيره بشكل مزعج اللى بتجيلى واللى بقت مشكله كل الشباب المجتهد دلوقتى و مقدم على مشروع اعلامى هيبقى بدعم من مجله السيارات الشهيره اللى انا شغال فيها واللى الناس فيها بصراحه بيقدموا دعم معنوى او ثقافى ليا فوق الوصف بجانب ان فى قطاع الانتاج الحمد لله كلمنا الناس ومستعدين يدعموا الفكره ماديا وهتنجح طبعا وهننافس بقا اخيرا البرامج العالميه الناجحه فى العربيات

المهم نرجع للعربيه , الخيارات المتاحه صحيح يمكن حاجات مش عاليه بس اهى حاجات تناسبنى كشاب

ما بين جولف 6 GTI و ليون كوبرا و الايفو X او الاوكتافيا ال RS كزيرو , او ممكن خيارات تانيه زى ال M5 وسيدانات رياضيه كويسه كمستعمل بس انا بصراحه مليش فى موضوع المستعمل ده علشان كل سنه الضرائب بتزيد على انبعاثات العادم والفحص بقى يزهق والواحد مش ناقص دفع ضرايب اكتر من اللى بيدفعها واللى ياريتنا حاسين بيها , تخيلو يا جماعه بقالى اسبوعين مبلغ عن نقره فى شارعنا وفى مكان خطر جدا وكل يوم النقره دى بيعدى عليها حوالى 100 عربيه وبتكلف الدوله كاوتش جديد ومساعدين بتبوظ وقله راحه لمستخدمى الشارع والحى باعت يرد على بكل برود هيتم اصلاحها ومحدش عبرنى غير لما كلمت اداره الشكاوى الحكوميه التابعه للجهاز المركزى للمتابعه والتطوير التابع لرئاسه الجمهوريه وتم عمل النقره تانى يوم علطول وبعتولى اعتذار للتأخير وحجتهم ان كان فى عمليه تجميل قريبه مننا وكان هيتم المعالجه بعد اسبوع كمان

نزلت المعارض شوفت العربيات وعملتلها تست درايف بس برده مش مقتنع وبتوع المبيعات بصراحه برغم معرفتهم الكبيره بالعربيات والتكنولوجيا اللى فيها الا انى برده كنت متردد, قولت انزل أأجر الجولف والايفو واختار بينهم كأفضل حاجتين وبعتولى العربيه على البيت ودفعت بالكريديت من على النت وخلصت الكام يوم ايجار مع كل واحده واستلمتها الشركه من عند البيت من غير مشاكل وربنا كرمنى ورسيت على الايفو

كلمت المبيعات وطلبت منهم خصم والناس مشكوره عملتلى خصم علشان انا اساسا معاى لانسر وعميل عندهم من زمان والناس بتاعت المبيعات دى اساتذه فى كسب حب العميل لدرجه انى بعد شهر من الاستلام ولسه بيكلمونى يقولولى ايه انطباعى عن العربيه , وبعدين رحت الفرع اخترت الكماليات اللى انا محتاجها فى العربيه لأن طبعا ملوش لزمه موضوع الفئات الجاهزه دى علشان مدفعش حق كماليه مش محتاجها وبعدين حددت ميعاد الاستلام واخترت باكدج التأمين و روحت المعرض لقيت العربيه واقفه والنمر منوره عليها استلمتها والرخصه وورق التأمين وخرجت بيها وانا طاير من الفرحه وكان اول حاجه اعملها تانى يوم هى رحله ل هلو هلو ريس واى اللى على طريق الاسماعيليه حجزت Track day يوم الجمعه التالى

طبعا قبل يوم الجمعه ما يجى كنت قربت على الالف كيلو واتصلت بخدمه بعد البيع حجزت ميعاد وطلبت حد ياخد العربيه من عند البيت علشان مش هبقى فاضى اوديها والموظف وصل فى ميعاده بالميلى ( الناس فى مصر كلها على فكره معروفه بالمواعيد المظبوطه ) بس انا كنت لغيت مشاويرى ورحت معاه قولت بالمره اشوف الصيانه وكدا

العربيه دخلت وخدت ميعاد استلام كمان ساعه وقفت فى الاستراحه اشوف العربيه ايه اخبارها , الاستراحه مبدئيا كويسه سواء فى اجهزه الكمبيوتر او سرعه النت او البلاى ستيشن او المشروبات المجانيه او حتى راحه اماكن الجلوس فيها ومكيفه وتقدر تقضى فيها الساعه بدون زهق مع ان اصلا مش عارف ساعه صيانه ليه يعنى !!

المهم العربيه خرجت فى ميعادها , غصب عنهم طبعا لو العربيه اتأخرت هاخد خصم على المصنعيه اعتذار منهم واحيانا لو حصل مشكله بيتم خصم المصنعيه كلها فى سبيل ارضاء العميل

اول مشكله بقا , طبعا الايفو مغريه جدا فى الجرى

طلعت على الدائرى وما ادراك الايام دى , الدوريات السريه تحس انهم بيعملولك فخ تلاقيه عامل زى ما يكون رايح معاك التراك وتسخن معاه واول ما تجرى تلاقى النور ملعلط فى المرايا وتضطر تقف وانت ونصيبك يا تحذير يا مخالفه وغرامه وتاخد نقطه على الرخصه يا تعمل فيها بريمو وتجرى بس لو اتمسكت فيها حبس حرمان من السواقه وشغلانه لمده كبيره , المهم انا وقفنى وشاف رخصى وكتب على مخالفه ادفعها خلال 3 ايام والا هيتم مضاعفتها وقعد بقا يشرحلى قواعد الامان والسلامه العامه والكلام التافه بتاعهم ده اللى كل بتوع المرور حافظينه

اليوم ده كان فظيع , عربيه نقل موقفينها علشان محمل زلط فى صندوق مفتوح والبنى ادم ده مش متخيل انه ممكن يقع على الطريق , وواحد تانى بملاكى خد غرزه والدوريه شافته واللى فانوسه مكسور و اللى معلى الكاسيت قوى وفاتح الشباك واللى ماشى فى الشمال ومش عايز يوسع للناس واللى مش عايز يوسع للأسعاف وغيره وغيره بس معظمهم مش مصريين يعنى هما الاجانب دايما اللى كدا متعلموش فى بلدهم غير عدم الاحترام للمرور

المهم خلصت التراك واتصورت مع الناس هناك وقعدنا نتكلم ان العربيات المستعمل اسعارها مرتفعه قوى الايام دى ليه , يعنى مثلا تشترى مونديو 2000 سى سى اللى هى يعنى يا هادى عربيه محترمه تعملها 6 الاف جنيه

طيب اللى عايز يجيب عربيته لعيلته يعنى يعمل ايه طيب ؟ لما هو كل مرتبه ما بين الف والف ونص للموظف العادى يستنى بقا كام شهر على ما يحوش وهو لسه عنده مصاريف بيته , صحيح البنزين المدعم رخيص ونحمد ربنا احسن من المجاعات اللى فى اوروبا وامريكا ودول العالم الثالث بس برده يعنى مش كدا

على العموم نصيحه يعنى اللى معندوش اسره دلوقتى الاوتوبيسات والمترو خطوطها فى كل مكان ووفرت كتير والتاكسيات بنظام جدول المواعيد بتاعك دى سهلت الامور تقوله مواعيدك والشركه تظبطلك تاكسى فى كل ميعاد عن كل مكان تقول عليه وحتى خاصيه انك يبقى ليك حساب فى الشركه وتدفع من البنك على طول حسابك الشهرى لذيذه وبتريح , وياريت يا جماعه بجد نركب مواصلات لو حد لوحده بس فى العربيه انا مش عارف الحكومه مشغله المواصلات دى ليل ونهار ليه طالما هى فاضيه مش دى فلوسنا اهى بتروح فى الارض !!

تانى يوم نزلت وانا رايح الشغل وقفت عند ال ATM ودخلت على خدمات المرور دفعت المخالفه وخدت وصل الدفع وبالمره دفعت الكهرباء والميه وهو موقف فكرنى بواحد صاحبى فى مدغشقر بيحكيلى عن الراجل اللى بيقف تحت البيت ده يتشعبط فى الباب الحديد بتاع العماره ويقول بعلو صوته النوووووووووووووووووووووو ووووووووور , تخيلو الالفيه والالياف الضوئيه والهاردات بقت ويسترن ديجيتال والراجل لسه بيروحلهم البيت يقولهم نووور

المهم ابقى انزلكم الصور بعدين بقا , اصل عندنا قلق علشان الانتخابات و متوقع منافسه شديده علشان فتره الرئاسه خلصت والكل مستنى الرئيس الجديد هيعملنا ايه فى مشاكلنا دى

معندناش تلفريك يا جدعان

اه ,,,, حقيقى انا اسف جدا نسيت اعرفكم بنفسى

احمد نوح ,,, محدثكم من العالم الموازى لعالمكم حيث يتعامل الشعب مع مصر اللى هنا كحته منه اللى زرعه فيها هيرجعله واللى عمله فيها خير او شر هيقعدله واذا كان بيحبها هيعيش ويموت فيها بكرامته واذا كان بيكرهها هيشوف الذل زى ما خانها بغباوته

مصر زى ما هى , متحضره , متقدمه , كبيره , بنت اصول , ناسها جدعان , فيها ضمير , ليهم حق دايما , مثقفه ومبدعه بناسها , وشبابها فى كل المجالات معروف بمهاراته


دى شويه فضافيض كنت كاتبها من فتره حبيت اشارككم بيها لأنى لما قريتها النهارده بالصدفه لقيت اليومين دول وقتها قوى

سؤال على جنب : حدش يعرف يودينى هناك ويجيب اللى الناحيه التانيه هنا ؟؟

ولا خلينى هنا احسن بدل ما اعدى الاقيهم سبقونا فى الزمن والثوره جت متأخره ووصلنا لمرحله الاحفاد ولا حاجه

وحاجه اخيره , اتمنى تكلمونا شويه عنكم فى العالم الموازى

اكيد انا مش هناك لوحدى :)

احلام يقظة سعات بحلم بيها وانا راجع من المعركة قصدي الشغل ومريح بظبط بيها دماغي عشان مابشربش سجاير ولاشاي حتى.... وافوق منها لما الاقي لعبة طايره في وشي من البنت وامها بتبصلي وتقول لي انت بتفكر في مين ومسهم كده ووشك عليه ابتسامه اقول لا ولاحاجة تقولي عايزين.. وعايزين ..وعايزين.. وحصل ..وجرى.... اقوم راجع للجبهه تاني اقصد للواقع تاني