النصب فى أسكندرية مع قلة الجودة على ودنه (برضة بحسدكم يا بتوع القاهره)
بسم الله الرحمن الرحيم
السلام عليكم و رحمة الله و بركاتة
طبعا مع أحترامى لـ90% من الميكانيكا الأسكندرانيين
لكن المشكلة الكبيرة هنا فى محلات الأكسسورات و فى السمكريه (حتى لو بشكل شخصى غير مباشر)
لكن برضة فيه نصب و فيه ناس كتير كلمة صنايعى عليهم بتكون كبيرة كمان و ميستاهلوهاش
المهم نعود لموضوعنا و أحكيلكم على القصة الطويلة العريضة الغريبة دى
قاعد مع واحد صاحبى كالعادة على قهوه و دا يعتبر المقر الرسمى ليا مع أختلاف مكان القهوة (كل يوم بالليل فى قهوة شكل)
و إذا بالأخ دة يقولى أنا عايز أظبط شوية حاجات فى الحته الجديدة (رينو 5) طبعا أنا بحسبها باظت ولا فيه حاجة لأن شكلها يكسف أصلا فى الميكانيكا قولتلة خير يابنى مالها قالى يا عم مش مريحانى عايز أعملها حاجات كدة زى إلى بنشوفهم على النت قولتلة أشطة هوريك صورة ليها على الموبايل و نعمل زيها و بالمره نسأل عادى مفيهاش مشاكل و السؤال مش هيخصر و للعلم بس أنا و كل إلى أعرفهم نعتبر مجانين تعديل عربيات يعنى حتى بنحب نشوف صور التعديلات على النت و نسأل عليهم
المهم قعدنا على القهوة نتفق هوا عايز يعمل أية المهم يعنى أنا قولتلة بص يا بنى أنت تعمل زى الصور بتاعة الموبايل دى و كمان عربيتك دى مليانه تعديلات على النت و هيا كالأتى (أكصدامات أماميه و خلفية صاج وعتب-جنوط13 صينى متدلعة كدة منظر يعنى و كدة كدة العربية خفيفة مش هيحصلهم حاجة-مرايتين بدل المرايتين إلى عاملين زى بتاعة الحمام دى-فرش للكراسى-أسبويلر الصغير إلى بيركب فوق السقف دة-دريكسيون سبور جديد-طبعا رشة محترمة للعربية) طبعا هوا قعد يصوت و يقولى أنت كدة هتودينى فداهيه و انا أقوله يا بنى بالكتير أوى كل دول هيعملوا 3 ألاف ونص أنا عارف الأسعار كويس بس هتبقى حاجة فل يعنى المهم كتبنا الكلام دة فورقة و عملنا حسابنا أننا نروح بقى على أى محل أكسسوارات نسأل على الحاجات دى و أنا ساعتها عملت نفسى تاجر جمله و قولتلة أحسبها معايا يا سيدى أكصدامات و عتب عشان صاج هيعملوا 400 - جنوط صينى 13 أحسن أستايل بالمقاس دة 1000 جنيه - مرايتين قولت 100 جنيه مثلا - فرش للكراسى جاهز عشان التفصيل أغلى و كمان دى مش عربية أصلا قولت مثلا 250 جنيه - الأسبويلر إلى أنا قصدى عليه أصلا صغير جدا قولت أدى 200 جنيه - دريكسيون سبور حلو كدة و متدلع قولنا كمان 250 جنيه و رشة حلوة للعربيه 1000 جنيه قولت ياض أجمع الأرقام دى و المصيبة أنه كان مندهش و حاسس أن فيه حاجات غالية أوى و يقولى يا عم الأسعار دى مبالغ فيها دا أنا لو حد قالى كدة هعورة و عمال يهزر لكن الحقيقة كانت مريرة جدا
المهم جمعنا كل الأسعار دى لقيناها 3200 جنيه راح قالى لأ غاليين و بتاع أنا هعمل حاجة حاجة المهم قولتلة خلاص أعمل براحتك إلى يريحك قومنا من هنا و نزلنا على سيدى بشر و محمد نجيب و فيكتوريا و أماكن كدة المهم أديت الراجل الورقة طبعا من غير مايتكتب فيها أسعار قالى الأكسسوارات و الفرش عندى و ممكن أتفقلك مع واحد معايا يعملكم الأكصدامات دى طبعا قولت لصاحبى أشطة دا كدة هيشيلهم حته واحدة و أكيد هيبقى المصنعيه حنينه و أكيد هيعمل خصم المهم طبعا أنا عارف أن فى القاهره الأسعار كدة ولا تتعدى كدة نهائى و إذا مرة واحدة بالراجل عمال يقولنا طيب تاخدوا معطر للجو دا بـ25 جنيه و نقوله لأ شكرا يقولنا طيب تاخدوا معطر ورق دا بـ5 جنيه نقولة شكرا يا سيدى المهم قالنا جمله جميله اوى خلتنى من كتر الضحك عملت حركة ربنا يسامحنى عليها (بص يا يا باشا دى هتتكلف كدة 6 ألاف جنيه) قولت فبالى كده هوا أحنا قولناله يجيبلنا عربيه تانيه ولا أية المهم طبعا صاحبى دة فتح بئه و أتصدم كدة روحت أنا متدارى على منظرة و قولت للراجل طيب والله كويس أوى طيب أية نظام الشغل و كدة قالى لأ متقلقش دا نمره واحد و خرافه المهم قولت أسئلة ياض على الأنذار الوولف انا كنت قريت قبل كدة أنه بـ250 جنيه بقولة طيب أية أخبار الأنذار الوولف قالى أجيبهولك قولتلة و دا عامل كام دة قالى دا عامل 400 بالتركيب قولتلة أة طيب والله أسعارك حلوة أوى إن شاء الله نعمل حسابنا و نجيلك و سلام عليكم و عليكم السلام طبعا صاحبى كل دة مش بيتكلم مش عارف ليه و كأنه بلع لسانه
خلاصة الكلام بقى يا جماعة لحد أمتى أى واحد بتاع أكسسوارات أو بتاع أى حاجة فى العربيات هينصب و على مااظن والله أعلم أنه كتب حسابات حاجات غريبة أصلا مالهاش علاقة بكلامى ولا أية مش فاهم لحد دلوقتى والله العظيم صاحبى دة جايب العربية فى حدود 6 ألاف جنيه أو 6 ألاف و نص لدرجة أنه قالى دا أنا أجيب عربية تانيه أحسنلى و العربيه ميكانيكتها حلوة و مالهاش صوت
و فى القاهرة سمعت أن التوفيقيه و شارع دمشق المكانين دول أرخص أسعار فى مصر و الحرفيين فى الجودة سمعت إنها حاجة توب جدا طيب ماهو بالسعر إلى قاله دة طيب ماهو يروح الحرفيين أحسن أو مثلا يغير الماتور أو يبيعها و يجيب حاجة أكبر و أحلى
المهم يعنى بعد ماتفضحت أدام صاحبى فضيحه الكلب اللولو لما بيستحمى حسيت أن عندنا فى أسكندرية النصب زايد عن اللزوم و مينفعش حد يعمل تعديل لعربيته خالص فى أسكندرية مع أحترامى لكل الصنايعية و أكتشفت أن أى حد بيعدل أى حاجة و عربيته ملاكى أسكندرية بيكون يا أما فى القاهرة يا أما فى بورسعيد و غير كدة و كدة طلعولى مكان فى أسكندرية متخصص للسيارات زى شارع دمشق و التوفيقيه
أنا بتكلم عمتا على تعديل السيارات (أمال لو كنا طلبنا التلاجه إلى بتتحط فى العربية كان قالنا أية ولا نركب نايتروس ولا حاجة)
و سأظل أحقد على بتوع القاهره لحد مانلاقى حل فى أسكندرية:rfds: