صوت الموتور عالى و التجميع ضعيف

عربيتى فيات سيينا موديل 2001 1400 سى سى
مشكلة العربية ان عداد ال rpm بيرتفع عن المعتاد
يعنى و انا على الجير التانى و سرعة السيارة 40 كلم يكون الrpm على 3.4
و انا على الجير التالت بسرعة 40 كلم بيكون الrpm على 2.6 و على 60 بيكون 3.4
و انا على الجير الرابع بسرعة 60 كلم بيكون rpm على 2.6 و على 80 كلم بيكون 3.4
و انا على الجير الخامس بسرعة 80 كلم بيكون ال rpm على 2.8 و على 100كلم بيكون 3.4
و على 120بيكون على 4.4 و على 140 كلم بيكون 5.2 و على 150 بيكون 5.6
و لم ازود السرعة عن ذلك خوفا على الموتور لارتفاع لفات الموتور عن المعتاد
مع العلم انى قمت بتغير البوجيهات و فلتر الهواء و فلتر البنزين
و قمت بتغير الاسطوانة و الديسك و الرولمان بول و قمت بضبط الموتور فى التوكيل
و استهلاك السيارة عندى 170 كلم فى الصفيحة فى وسط البلد غير ساعة الزروة يعنى و السكة سالكة و 210 كيلو على الطرق السريعة بدون تشغيل التكيف او الضغط على الفرامل او تهدئة السرعة المفاجئة و الاطارات مضبوطة على 30 و انا على سرعة 90 كيلو على الغيار الخامس ب 3000 لفة و هوة يعتبر كثير نسبيا
مع العلم انى راجعت الار بى ام عند الكهربائى و عداد السرعة عند بتاع العدادات و كله سليم و لفات الموتور على السلانسيه قبل ال 1 بشرطة يعنى حوالى 800 لفة
نفسى بجد اعرف ليه الموتور عالى و السرعة بطيئة لان السيارة مش بتجمع خالص الا لما بعدى ال 3000 لفة عند اى غيار لحد ما اصل ل 3400 لفة و صوت الموتور بيكون عالى ممكن يكون الاسطوانة اللى ركبتها سيئة و لا ايه
ارجوكم افيدونى و اسف على الاطالة

اكشف على شكمان العربية يمكن فية تنفيس او مكتوم

و لو العربية اوتوماتيك يبقى اكشف عالفتيس كمان لا قدر الله يكون فية كلاتش

عاوز أسأل سؤال

هى العربية كانت معاك قبل كدة وحاليا اداءها اختلف ، وللا هى دى قراءاتها من يوم ما جبتها وانت كنت راكب حاجة تانية قبل كدة؟

اصل الأرقام اللى حضرتك كاتبها دى تمثل انحراف بسيط وثابت عن الطبيعى وممكن يكون اصلا خطأ فى عداد ال Rpm نفسه، فأنا عاوز اعرف منك اذا كان اختلف عن الأول ام لا ، وانت كنت راكب عربية تانية ايه قبل كدة لأن ممكن القصة كلها تكون عامل نفسى بسبب انك كنت راكب عربية انعم قبل كدة

شكرا على ردك بشمهندس سبعاوى
المشكلة انى اشتريت السيارة مستعملة و من ساعة ما اشتريتها هيا دى قراءتها
مع العلم انى ركبت قبل ذلك ريجاتا 85 s و قبلها بيجو 504
و السيارتين مختلفين عن السينا فى تناسب السرعة مع ال rpm حيث كانت البيجو و الريجاتا عند الغيار الثانى عند 40كلم كان الrpm 30
و الغيار الثالث 60 كلم كان ال rpm على 30
و الغيار ال الرابع 80 كلم كان ال rpm على 30
و الغيار الخامس بالنسبة للريجاتا فقط لان البيجو ما بها خامس كانت السرعة 100 على rpm 30
و ايضا سيارات اصدقائى مثل لادا و تمبرا و سويفت واكسل و حتى الشاهين موتوره شبيه بالسيينا له نفس ال ار بى ام ال 30 عند 40 و 60 و 80 و 100 كلم
و انا موتورى على 3.4 rpm و الموتور صوته عال و التجميع على اخر الغيار فقط عند ار بى ام عالى و الاستهلاك فى البنزين عالى كما زكرت قبل ذلك
انا بقول ان الموتور بيلف و الجيربوكس مش بيستقبل اللفات كاملة يعنى يوجد تفويتبين الكلتش و الفلاى وييل مع انى غيرت طقم الدبرياج بس ممكن تكون الفلاى وييل نعمت و بتفوت مع ان ده صعب او ايه انا مش عارف و المكانيكية بيقولولى سليمة و التوكيل رايه كدا بس انا مش عارف ارجو حضرتك تفيدنى بشمهندس سبعاوى و فى انتظار ردك و اسف على الاطالة بس بجد ارجوك ساعدنى مع العلم انى اشتريت السيارة على 97564 كلم و الان هيا عاملة 105922و قيست كبس الموتور فى التوكيل قالولى حالته 75 % و هيا حالة جيدة جدا على ما اعتقد لان حالة الزيرو حوالى 92 %

بالنسبة للشاهين ، اللى هى محركها هو نفس محرك السيينا القديمة تقريبا فهى عند ال100 ك/س بتكون 3300 وليس 3000 Rpm وبالتالى يبقى الفرق بسيط اوى، اما بالنسبة للريجاتا فهى انعم كتير جدا من الشاهين ومن السيينا (مع فارق العمر طبعا لكن انا بتكلم على حالات متماثلة) لأن انا كانت معايا الشاهين لسنوات طويلة وكذلك سقت السيينا ، وحاليا عندنا ريجاتا بتاعة زوجتى، فانا الى حد كبير عارف الفرق بينهم واجزم ان نسب تخفيض الريجاتا افضل بكتير من كل من الشاهين والسيينا وبالتالى بتديلك احساس بنعومة اكتر،ولذلك فأنا برجح فعلا ان ده احساس نفسى عندك لأن بالفعل السيينا اخشن وغياراتها مشاويرها اقل من الريجاتا والبيجو 504 ،انا حاليا كل الشك اللى عندى ان ممكن عداد ال Rpm يكون مرحل 100 لفة فى القراية بتاعته، او ان عداد السرعة يكون بيقرا ناقص 5 كيلو مثلا عن سرعته الطبيعية، اقترح عليك انك تعاير عداد ال Rpm عند حد يكون عنده تاكوميتربيتركب على اى طارة فى الموتور ويقرا ال Rpm الفعلية، وممكن بنفس التاكو ميتر تعاير عداد السرعة عن طريق انك ترفع العجلاتين الأماميتين للعربية وتدور العجل لحد ما عداد السرعة عندك يبقى قارى 100 كيلومتر فى الساعة وتظبط رجلك على كدة وتقيس عدد لفات العجلة فى الثانية(خد بالك فى الثانية وليس فى الدقيقة، يعنى لو هتقيس عدد اللفات فى الدقيقة تقسمه على 60) وتضربها فى 3.14*قطر
العجلة الخارجى*18 وتقسم الناتج على 5 هديلك سرعة العربية الحقيقية، تقارنها بعداد السرعة وتعرف عندك ترحيل قد إيه

اما بالنسبة للدبرياش فالموضوع اختباره سهل، إدى العربية غيار رابع من الثبات وحاول تطلع بيها كأنك بتطلع من الاولانى،لو بطلت يبقى شيل الدبرياج من دماغك، لو طلعت معاك يبقى روح غير طقم الدبرياج


فيه برضه اختبار تانى، اطلع على طريق فاضى يكون فيه مطلع وحاول تجيب 120 مثلا فى المطلع (او 100 لو معرفتش توصل ل120) وخد قراية ال Rpm قصاد ال 100 او ال120، لف من اول يوتيرن وارجع لنفس النقطة، وانت راجع حاول تجيب نفس االسرعة فى المنزل بحيث العربية تبقى نازلة والموتور مش محمل اوى، وخد قراية ال Rpm قصاد نفس السرعة اللى انت جربت عليها فى المطلع، لو كانت هى هى فى الحالتين يبقى شيل الدبرياج من دماغك، لو اختلفت يبقر روح غير طقم الدبرياج

متشكر جدا بشمهندس سبعاوى على المعلومات القيمة دى و حجرب اختبارات الدبرياج و حروح لحد عنده تاكو ميتر و اختبر ال rpm و السرعة و حبلغ حضرتك بالاخبار
و شكرا على اهتمامك بجد
بس هل فعلا السيينا استهلاكها فى البنزين زيادة عن مثيلاتها ال 1400 او ال 1500 زى الاكسنت اللانوس الكليو كلهم من نفس الفئة
حيث ان استهلاك السينا حوالى 170كلم فى الصفيحة وسط البلد و 220 كلم فى الصفيحة على الطرق السريعة على الخامس بسرعة 90 كيلو بالساعة
متشكر جدا حضرتك بشمهندس سبعاوى على ردك على