الموضوع: الزيوت رخصت والتجار مطنشين

من شهرين كنت في البلد واضطريت أغير زيت هناك، فرحت عند محل زيوت واشتريت الزيت اللي متعود احطه شل بتاع المحركت القديمه وكنت باشتريه من المنصورة ب63 جنيه ، فلما جيت أحاسب الراجل قالي الحساب 52 جنيه، قلتله هي الزيوت رخصت قالي أيوه وطلع قايمة جديدة مطبوعة جاية من الشركة فيها الأسعار الجديدة، بعد ما فات شهر وجه ميعاد تغيير الزيت رحت للمحل اللي متعود أغير منه في المنصورة وأنا في دماغي إن طالما الزيت رخص في البلد يبقى رخص هنا كمان، فإذا بالراجل بيقولي 63 برده، فقلتله ليه هو مش الزيت رخص قالي لأ ما رخصش ، فقلتله أنا شاريه ب 52 من شهر، قالي منين ، قلتله من البلد، قالي روح اشتريه من هناك.
وفعلا لما كنت في البلد آخر مره رحت أشتري جركن فالراجل اللي كان باعلي قبل كده ما كانش موجود، كان فيه عامل في المحل فلما سألته عن السعر قالي 58 وده نفس سعر البنزينه لأني كنت سألت في البنزينه مره وقالي نفس السعر ده . فقلتله لأ ده أنا شاريه من شهرين ب 52 فقالي جايز كان عليه عرض ، وبعدين طلع القايمة إياها من الدرج دور فيها وقالي لأ السعر زي انت ما بتقول 52 جنيه.
استنتجت الآتي:
أسعار الزيوت انخفضت
هناك اتفاق عام بين التجار بما في ذلك البنزينات على عدم الاعتراف بالتخفيض
هناك قلة عندها ضمير تعترف بالتخفيض وتبيع بالأسعار الجديدة
أن هناك سرقه عيني عينك في أسعار الزيوت، إذا كان المحل في المنصورة يبيع أغلى من البنزينة 5 جنيه وأغلى من السعر الرسمي اللي نازل من الشركة 11 جنيه في نوع زيت رخيص، أمال بيبيع الزيوت اللي ب 250 جنية أغلى كام؟؟؟؟؟