بعض الحلول لتخفيض درجه حراره الفيليشيا
السلام عليكم
لن أطيل عليكم فكل من دخل لقراءه التقرير دة اكيد متغاظ من الفيليشيا عشان مغلباه :11: و مجنناه عشان الفرن اللي في الكبوت اللي ممكن تسوي عليه اشهى المأكولات ( زي المحشي كدة ) :F_eyeb1[1]: .
عموما بجد العربيه دي ماكانتش تنفع لمصر و للبلاد اللي في افريقيا اصلا لارتفاع الحراره عندنا هنا عشان كدة ماتلاقيهاش في الخليج خالص . . . طول عمري اقول الخليجيين دول انصح خلق الله و بيفهموا و الله و مش زي ما بعض المصريين بيقولوا عليهم
و عشان العربيه دي خرجت من مصنعها مش بتدعم المناطق الحاره فكان لازم عقليه المواطن المصري تتدخل و تحل الأزمة و على فكره كتير من الناس تخاف اوي تعمل تعديلات و يقولك ( لا يا عم خليها كدة زي ماخرجت من المصنع ) و الله كلام معقول و انا اول واحد بحب العربيه تبقى تمام و زي ماخرجت من المصنع بس مع الاسف مضطر اخرج عن النص مع العربيه اللي اسمها فيليشيا دي
فبعض الحلول كالاتي و يارب يكون بفايده ان شاء الله
1- اولا احب اشيد بالاستاذ محمد عبد الشافي و اللي كان اقتراحه انه يعمل ترموستات اضافي يحطه بعد خروج المياه من الالموتور و هي مولعه و قبل ماتدخل الرادياتير
http://www.nilemotors.net/Nile/42290-a.html
هو صحيح عملها بطريقه مش احترافيه و مع ارتفاع درجه الحراره ممكن اللحام اللي هو عامله يفك بس لازم نحييه على فكرته لانه جميله فعلا
2 - في اقتراح برضه و هو اننا نعمل مفتاح لتشغيل المروحه مانوال يعني يكون في زر تضغط عليه يشغل المروحه عند اللزوم بس عيب الفكره دي هو انك ممكن تنزل و تسيب المروحه شغاله ( ممكن تعمل معاه لمبة LED تنور و تطفي كدليل ) و عيبه كمان انه بيخلي المروحه شغاله على طول و بتاكل من البطاريه , دي العيوب و لكن المميزات طبعا انك لو استخدمت المفتاح دة بحكمة و ( عند اللزوم ) اكيد هايكون نافع جدا و فائدته هاتبقى اكبر بكتير من ضرره و المقصود بعند اللزوم ان الترموستات يعلق او يتلف و اللي مسؤل عن اعطاء الاشاره للمروحه بالعمل
3- الاقتراح التالت و الاهم انك اصلا تغير الرادياتير و تركب واحد معدل 3 ماسورة و يكون نحاس او ألومنيوم مش فارقه كتير بس اعتقد انه مافيش 3 ماسورة نحاس و الله اعلم ( ربنا يخلي لنا الصين:E_braces[1]: )
4 - الاقتراح الاخير انك تزود عدد المراوح او تكبر حجمها و مع زياده قوة المروحه اكيد لازم هاتجيب بطاريه 70 امبير و كل ماكبرت البطاريه كل ما بقى احسن طبعا و الفرق في التمن مش كبير اوي يعني و على فكره انا عربيتي فيها اتنين مروحه واحدة اماميه وواحدة خلفيه يعني قبل الرادياتير و بعده و مش عارف اذا كان كل الفليشيا كدة او لأ لان في ناس قالت انه عندها مروحه واحدة بس و الله أعلم
عموما المروحه الاماميه اللي ورا الشبكه على طول دي ألماني بتاعه المرسيدس و بتبقى تقريبا 8 ريشة و الخلفيه اللي جوه الكبوت الكبيره هي عندي بتاعة الشاهين بس نصيحه بلاش المروحه دي لانها صحيح شديده بس بتسحب كهربا كتييييييييييييييييييييييي يييييييير و بفكر اغيرها و اركب مروحه استهلكها اقل و سرعتها أعلى و اخف و على فكره درجه الحراره في الفيليشيا الطبيعي بتاعها 90 درجه تقل حاجات بسيطة او تزيد
طبعا اي عربيه فيها خلل او عايزة عمرة او وش السلندر فيها بايظ لو ركبت لها تلاجه عشان تبرد الموتور و الله ما هايحوأ و لا هايجيب اي نتيجه , فاناس لازم تفهم ان الاقتراحات اللي قولتها خاصه بالعربيات اللي مواتيرها سليمة ووش السلندر فيها سليم
الفليشيا باستثناء عيب السخونة و النشوفيه عربيه جميله و انعم و الله من كل القديم و شكلها لطيف و شيك و تستحمل و عضمها ناشف و صاجها تمام بالنسبه لحجمها و تقيله و ثابته نوعا ما بس السرعه القصوى بتاعتها 145 زي ماهو في الكتالوج
على فكره بجد الحاجات دي جابت نتيجه معايا و مع ناس كتير و ربنا يكرمكم و يوفقكم
