تقييم الـ 42000 كلم للجين2 موديل 2009
السادة الاعضاء
تحية طيبة و بعد
اتمنى من ربى سبحانه و تعالى انى اكون موفق فى نقل تقييم صيانة الـ 40000 كلم من حيث السيارة نفسها و اداء التوكيل
موش عايز ادخلكم بقى فى التفاصيل الهايفة بتاعة روحت الصبح و قابلنى فلان و ماقابلنيش فلان و الكلام الممل و ندخل فى الموضوع على طول
السيارة عملت تقريبا 42000 فى فترة من 15/1/2009 و حتى 29/3/2010
تقييم السيارة نفسها :
الكماليات
ممتازة و كتير و مقابل سعرها اعتقد كده انه عادل تماما و مافيش عربية فى السوق المصرى بكل الكماليات دى و السعر ده
الكماليات كلها تعمل بكفاءة تامة ماعدا المالتى فنكشن كالعادة و اتنظف و اتغير و مافيش فايدة
مثبت السرعة اللى اتلغى من اول 2009 كان مهم جدا و اهم بكتير من انهم يضيفوا اسبويلر مكانه
المحرك
محترم جدا جدا و ممتع على طرق السفر وان كان موضوع الصوت العالى بعد الـ 110 مزعج جدا بس صوت الكاسيت بيغطى عليه و الواحد بيحاول يتعايش معاه
العربية على rpm 4 فما فوق هايلة جدا و ان كانت الطرق هنا ماتساعدش الواحد مننا على الاستمتاع بعربية و القرص عليها طبعا ....باستثناء الشباب الهايف اللى بيجرى فى اى مكان و موش فارق معاه
الفتيس
الاوتو مازلت شايفه متواضع جدا مقارنة بعربيات تانية فى نفس المستوى و يكاد يكون اقلهم فى الاداء و ان كان على طرق السفر و السرعات العالية بيبقى اداءه زيى المانيوال الى حد كبير
جسم السيارة
قوى جدا و صاج ممتاز و ثقيل و احساس بالامان داخل كابينة السيارة غير عادى فعلا بس للاسف عزل السيارة ممكن يكون موش اوى بالذات على السرعات العالية لازم هاتسمع صوت هواء و ده طبعا لاننا راكبين عربية الى حد ما رخيصة مقارنة بالهوندا او التويوتا
ثبات السيارة
اكيد موضوع الثبات ده افضل حاجة خرجت بيها بروتون من صفقة شراء لوتس و الاستفادة من خبراتهم العريقة فى صناعة السيارات الرياضية ........ العربية فعلا ثباتها تحفة
بس برضه الحلو مايكملش و انا شايف ان العربية فعلا بتحتاج تربيط عفشة كل 5000 كلم بس كله يهون مقابل الثبات الممتاز للسيارة
دهان السيارة
انا متفق مع اخى احمد الشاعر فى تقييمه و انا شايف ان دهان العربية فعلا مستواه متواضع و محتاج اهتمام شوية
استهلاك البنزين
ممتاز على طرق السفر و مع التكييف كمان
انما داخل المدينة العربية بتستهلك بنزين على غير العادة و الفرق فى الاستهلاك مابين الـ iafm و الـ campro موش كبير وان كان ملحوظ
فى المجمل العربية جميله و انا الحمد لله ماغيرتش اى حاجة اساسية فى العربية مقابل عيوب الصناعة و كل الصيانات عادية جدا اللى انا باعملها
تقييم التوكيل
طبعا اغلب الاعضاء اللى بيفهموا و بيقدروا عارفين كويس او ان السيد المهندس / مدير خدمات مابعد البيع - قايم بكل واجابته و مابيتأخرش عن اى عميل ايا كان مطلبه و بيحاول بقدر الامكان يلبى كل طلباتهم و انا باتكلم عن اللى باشوفه هناك موش عن تجربتى انا الشخصية
انما للاسف طبعا الراجل موش هايقدر يعمل كل حاجة لوحده
مستوى الفنين و سرعة الاداء فى التوكيل انا شايفها عادية لا هى ممتازة و لا سيئة .........
قطع الغيار احيانا موجودة و احيانا لأ ........... يعنى نقدر نقول نفس مستوى اى توكيل سيارات فى مصر
بس لو مركز الخدمة اكبر من كده اعتقد ان المستوى هايتغير تماما فى الخدمة و فى كل حاجة
عذرا للاطالة عليكم بس انا موش حابب انى اتكلم فى كلام مكرر لان اغلب الناس شافت مواضيع من دى قبل كده
تحياتى للأعضاء الكرام و على الرغم من انشغال الشديد الفترة القادمة بس هاحاول ارد على الاستفسارات على قد ماقدر و ان كنت احب ان اخى توت يرد مكانى فى حالة تعذرى للرد لانه على علم تام بكل ظروف سيارتى
