المشاركة الأصلية كتبت بواسطة Conspirator
هى دى أفلام هما مصورينها للتوعيه مش حقيقية بس بتوريك ايه اللى بيحصل فى الحقيقة فعلا وبيكون مكتوب هنت عن كده فى الاول
بس فعلا انا عجبنى جدا الاحترافيه بتعتهم فى التعامل مع الحادث مش شغل فهلوه زى هنا يعنى شوفتو الجهاز اللى مع رجل الانقاذ اللى بيقطع بيه صاج العربيه والباب عشان يطلعوا الناس
يعنى انا حصلتى حادثه زى دى على طريق العاشر قدام اكوابارك كان زمان وانا فى الكليه كنت راكب جنب سواق ميكروباص منه لله وكان طاير على 120 ولبس فى مقطوره واقفه وطبعا هو رده فعله انه فدى نفسه ولف شمال سنه فدخل فى المقطوره بزاويه اللى انا قاعد فيها طبعا العربيه اطبقت على رجلى ورجلى كلها اتفشفشت وكان هيعملولى بتر لولا بعد ربنا دكتور استشارى كبير ربنا يكرمه هو اللى خلانى امشى على رجلى تانى المهم فى الموضوع ان لما حصلت الحادثة والتابلوه بتباع الميكروباص كان مطبق عليا هو القايم اللى قدام يمين انا فقت بعد شويه كده لقيت الناس اللى بيشلنى من تحت باطى عشان يطلعنى وانا رجلى اصلا مزنوقه وكان ممكن بالحركه دى يعملولى مصيبه اكبر انا قلقتلهم محدش يلمسنى لحد لما الاسعاف تيجى
جت الاسعاف وكانوا شويه سورى فى اللفظ بهايم مش فاهمين حاجه انا قلتلهم محدش يحركنى الا لما تفكو الحاجات عنى المهم ربطوا القايم اللى قدام بحبل فى عربيه نقل وربطوا الميكروباص من ورا بعربيه تانيه لحد لما فتحوا الصاج شويه وطلعونى
طبعا ركبت الاسعاف ودى قصه تانيه انا رجلى متفشفشه والعربيه مفيهاش عفشه خالص والراجل طاير وكل مطب والتانى بدبه وتسمع فى رجلى وانا اصوت
المهم خلصنا من الاسعاف طبعا ودونى على مستشفى حكومى اللى هى السلام ولا فى دكتور طوارئ ولا اى حد فاهم وحاجه تقرف طبعا على ما اهلى عرفوا بالخبر وجم جرى نقلونى على مستشفى الحلميه العسكرى عظام عشان والدى ووالدتى معاش قوات مسلحه وطبعا فرق رهيب بين المستشفى دى و التانيه
اول دكتور شافنى كان شاب كده قالى انت بتدرس ايه قولتله هندسه اتصالات قالى كويس يعنى ممكن تشوف شغلانه وانت قاعد :O_stupid[1]: انا هسيبكم تتخيلوا لو حد قالك الكلمه دى
طبعا اهلى موافقوش بالكلام ده وكلموا دكتور استشارى كبير معروف ربنا يكرمه وهو فى القوات المسلحه بردوا قالهم سيبوه لبكره لما انا اجيله وفعلا قعدت فى العمليات 6 ساعات وربنا يكرمه عمل معجزه
انا صدعتكم انا عارف :brn:
بس ربنا ما يورى حد فيكم يوم زى ده