الموضوع: ملاك الصني الكرام ممكن ارائكم؟؟

المشاركة الأصلية كتبت بواسطة HOSSAM_GABRE

غلى العموم انا فى الانتظار لمدة شهرين او تلاته
انا مش مستعجل وما زلت بدرس اكتر واكتر
دى عربية بتحويشة العمر مش حاجة سهله وانا فى الاول والاخر موظف يعنى مش بتيجى بالساهل ابدا
الفلونس اعتقد حتعمل طفرة والاقبال عليها شديد جدا بس فعلا ما اتجربتشى ومش عارفين فيها مشاكل الميجان ولا لا , بس اعتقد ان وضع رينو فى السوق حيتغير وخصوصا مع انتشار اللوجان ( مع الفارق طبعا ) والرينو والنيسان مدرسة واحدة بردو
والسيراتو انتشارها رهيب بس ما تتركبشى اقل من الفئة اللى ب 116 الف sx
والصنى بنت ناس ومحترمة وداخله قلبى قوى بصراحة بحس كده ان متانة العربية واعتماديتها عالية
والف شكر ليك يا استاذ احمد
انا بحس ان الناس فى قسم النيسان محترمة جدا وحيادية غير باقى الاقسام للاسف بيكونوا متحيزين لعربياتهم بشكل فظيع .

و علشان كده ارشحلك الصني بجد
اعتماديه
قيمه مقابل السعر
قطع غيار مهاوده و في حاجات ممكن تجيبها من بره التوكيل و اصلي برضو ده غير الفوانيس و الاكصدامات اللي نزلت تايواني و باسعار تحفه
ممكن تجيب ال ex اوتوماتك و بسعر ممتاز و لو معاك تزود يبقي السوبر صالون من غير حيره لأن الاضافات اللي فيها تستاهل الفرق عن جداره
استهلاك بنزين زي اي عربيه 1600 و راجع موضوع استهلاك البنزين بتاعها برضو "دي بس اشاعات و دعايه مضاده ليها و خد بالك برضو ان الناس كانت واخده علي ال 1300 منها فلما نزلت 1600 كان استهلاكها صادم لكتير من الناس"
و التقفيل المصري و الرغي الكتير بخصوصه هقولك اللي فاكره من رد سبعاوي في الموضوع ده:
لا يوجد في التقفيل المصري حاجه تعيبه في الصني
و خد بقي الجزء الحلو ده
المرسيدس و بي ام و الفيكترا بيتقفلو في مصر
ايه مشكله التقفيل المصري غير بس انه الباب الخلفي للهجوم علي الصني
اهم حاجه في حساباتك انك تكون فعلا العربيه داخله قلبك
الصني عربيه ممتازه و الموضوع بتاعي ده مش تشنيع عليها
و زود في الحسبان ان التوكيل و اسلوب تعامله فوق الممتاز و ضمان بجد مش زي البهوات اللي بيخلو الناس تشحت منهم كلمه طيبه حتي و لو في لا قدر الله حاجه كده ولا كده التوكيل في الصيانات الدوريه هو اللي بيقولك عليها و بيغيرهالك قبل حتي ما انت تاخد بالك ان عندك مشكله
و الحمد لله احنا هنا مش متحيزين للعربيه ولا حاجه
العربيه الصني بسعرها منافسه جدا و ممتازه
اللي عايزها اكيد هينبسط منها و اللي مضايق ان في عربيه ياباني بالسعر ده و الامكانات دي يبقي يشوفله حاجه تانيه بس كده من غير بقي تحيز او هجوم او زعل
بس خد بالك من مسافه الاقدام في الكنبه لو انت بتحب ترجع الكرسي للاخر