الموضوع: قصة حب مستحيلة مع معشوقتي ((--هوندا سيفيك--))

أولا أنا بقدم اعتذاري من كل شخص انزعج من مناقشتي في منتدى الميتسوبيشي عن السيفيك و اسمعوا قصتي معها

من 5 سنوات بدأ حبي المجنون للسيارات , كنت بحب أي شي اله 4 دواليب و دركسيون , بس ما كان نوع معين يغريني

أو يخليني قول عنه انه سيارة أحلامي .... كان همي الوحيد اني يكون عندي سيارة حتى اقتنع الوالد انه يجيب سيارة مستعملة

و اشترينا لانسر Glx موديل 1993 .... المهم

بعد سنتين بدأ حبي للاطلاع و ركوبي مع الأصدقاء بالسيارات الجديدة يخليني حس بالفارق و بلشت شوف كل الأنواع و المواصفات

( و هاد الكلام من سنتين ) طبعا الامكانيات المادية ما سمحت بتغيير السيارة الى شي يقنعني فالأفانتي مثلا سعرها مناسب بس ما حتعطيني

الإحساس بفرق كبير ( من حيث المواصفات ) و السيارة الجديدة حتكون لخمس سنين على الأقل فالخطوة حساسة. حتى حصل التالي :

يوم من الأيام و أنا راجع من الجامعة على طريق HighWay و إذ بيخفق قلبي و بشوف مركبة فضائية طايرة ( ماشي 160 أقل شي )

و بلمح شعار السيارة بس بفكر انها أكورا , طبعا اللون كان أبيض لؤلؤي و أنا انبهرت و رجعت على البيت مستعجل لشوف اسم حبي من النظرة الأولى , دخلت موقع هوندا بعدين على أكورا و ما لقيت حبيبتي ---- أنا متأكد انها أكورا لأن شكلها كان رهيب --- و بعد بحث و
تدوير و تمحيص شفت انها هوندا سيفيك و كانت سنة 2006 وقتها , شفت المواصفات على النت و ما كان في غير 1.8 فاستنتجت أن الحب مستحيل و محبوبتي بنت وزير و حتى لو تحسنت الماديات ما لح أوصل لسيارة بسعرها ....
و مرت الايام حتى جاء صيف 2007 و أنا تناسيت محبوبتي , و لاح بالأفق أمل بتغيير السيارة ( ماديا ) و جاء معرض السيارات السنوي في
سوريا , و رحت شوف كل شركة وأسعارها و طبعا أنا عندي فكرة مسبقة عن الوضع . و كان معي صديقي و شفنا فرع هوندا فقررت عرف
صديقي على بنت الوزير-- سيفيك --- و أنا على الطريق عم اشرحله عن المواصفات والعزم الغير طبيعي بس السعر غالي , بعد دخولي بلحظة تضرب عيني على لوحة الأسعار و السعر كان انخفص بنسبة 30 % و دخلت السيارة بفئتي السعرية و عرفت إن السيارة صارت 1.6 و مواصفات أقل و أنا ما همني أنا بحب السيارة و كل السيارات صارت زبالة أمامها ... أخيرا بنت الوزير صارت من مستواي و ولو انها فقدت بعض مواصفاتها .
و بعد أسبوعين تماما بتجي سيارة بنت موظف عادي سمعته حلوة بس مو متل الوزير (سيارتي اللانسر ) و تخليني اتشوش وصارت المقارنات
والأراء تضارب و طبعا عندنا اللانسر الكاملة أرخص من السيفيك اللي بعشقها و صار النقاش التالي :
*-- بتجوز بنت الوزير اللي أبوها معروف و اللي هي ملكة جمال و بتغوي أي شاب (125 حصان أووووف ) طبعا بس العروس بنت الوزير لازم انت تدللها بدل ما تدللك هيي فلازم تعلمها كيف تلبس صح ( تركب جنوط ) و تثقفها ( تركب نظام صوت جيد ) و تعلمها كيف ترفهك كل في أي وقت ( فتحة سقف و مواصفات تانية....) يعني البنت مو متل أختها الكبيرة الكاملة .....1.8
*--- بتجوز بنت الموظف الكويس , والي عائلته مو متل عائلة الوزير , بس تضل عائلة محترمة , و البنت مانها بنفس درجة إغراء بنت الوزير ( 109 حصان ) بس البنت مثقفة أحلى ثقافة , وبتفهم عليك و بترفهك و تدللك و تنصحك عند كل موقف (نظام الكومبيوتر فيها روعة ) وشكلها حلو و في أي ظرف ما تحس ناقصك شي عن غيرك ..
بعد احتيار و تضارب أراء و استشارة الأهل و تحكيم العقل و استخدام مبدأ أنا عاوز ايه من زوجتي اخترت بنت الموظف ..

و لحد اليوم بنت الموظف أحلى عروس , و أنا مبسوط منها لأقصى الحدود ...بس كل ما شوف بنت الوزير ما بخفي اعجابي الشديد و حزني بنفس الوقت لأني خنت قلبي و ما اشتريتها ....
على كل حال مبروك لكل مين اختار بنت الوزير لأنها بجد بنت وزير و الكل هينظرله باحترام و خوف لو أنها مش بنته الأحسن
و مبروك لكل من اختار بنت الموظف لأنه هيكون مبسوط و مترفه و مرتاح لأقصى الحدود و الكل حيحترمها لإمكانياتها و ثقافتها

و اسف على الإطالة و خلينا نشوف كل واحد فينا مين بيعشق ...........أخوكم المزعج شوي سامي