الموضوع: تقييم ال 5000 كم - السيارة بروتون واجا 2009 – F/O - Automatic

بسم الله الرحمن الرحيم

تقييم ال 5000 كم - السيارة البروتون واجا 2009 – F/O - Automatic

السلام عليكم و رحمة الله و بركاته

أنا الحمد لله معايا البروتون واجا من شهر 11 اللى فات و لسه عامل صيانة ال 5000 يوم 13-4-2010 , و طبعا أقل حاجة أقدمها للمنتدى هنا هو إنى أشكرهم جدا من قلبى بجد و أدعيلهم و أعمل حاجة تنفع الناس خصوصا إن مفيش حد بخل عليا بالنصيحة لما كنت بفكر أشترى.

فيه شكر واجب لكل أعضاء المنتدى عموما و أيمن و مهاب خصوصا. ربنا يكرمكم يا جماعة يا رب.

أولا: الإنطباع الأول بعد الإستلام و الشكل الداخلى : طبعا العربية أنا شبه حافظها من جوه – و كمان ركبتها مع مهاب قبل كده – فهى مكانتش جديدة عليا, بس العربية من جوه مريحة نفسيا جدا و التابلوه بتاعها من - وجهة نظرى – أشيك تابلوه فى عربيات بروتون اللى موجودة دلوقتى.

العربية مجهزة من جوه بالأوبشنز اللى كلنا تقريبا عارفينها (راديو و كاسيت CD/MP3 - تكييف – باور ستيرنج – و 2 إيرباجز – ريموت – إنذار – طارة ملتى فانكشن – زجاج و مرايات كهربا ).

اللى هتلاحظه أول ماتركب العربية إن القعدة مش مريحة شوية (تحس إن ضهرك واقف شوية) , بس بعد كده خدت عليها و إرتحت.

القعدة مستواها كويس , الدركسيون على حجرك تقريبا , شايف العدادات بوضوح , و المراية اللى فى النص جايبة كل الفيو اللى ورا , و مرايات الأجناب مكملة المرايا اللى فى النص – بإختصار مستوى الرؤية كويس الحمد لله و تحس إنك لامم أطراف و أجناب العربية.

القعدة قدام مريحة الحمد لله و اللى راكب ورا فى معظم الأحوال متبقاش رجله لامسة الكراسى الأمامية – بيبقى قاعد مرتاح يعنى – و طبعا مساند الراس دى من الرفاهية اللى أنا مجربتهاش قبل كده و لاقيتها ظريفة و مريحة جدا – و لو إن دى تعتبر فى بلاد تانية من أهم عوامل الأمان -.

الكاسيت كلاريون و صوته ما شاء الله حلو جدا , و لو إنى بعيب على العربية إن لما صوت الكاسيت بيعلى شوية , المراية اللى فى النص بتتهز – طبعا عيب أهبل بس بقول برده للأمانة العلمية – بس غير كده صوت الكاسيت حلو الحمد لله.

التكييف بشغله على 1 و درجة الحرارة بتبقى فى النص (مش بيبقى شغال على أقصى طاقته) و ببقى قاعد مبسوط جدا , لما جربته على 3 مع أهلى , كان مأثر على السحب بشكل ملحوظ , بس موضوع سحب العربية ده كده كده أنا شايف إنه ميتحكمش عليه إلا لما العربية تعدى ال 10000 كم. بس فى الأخر التكييف كويس و إن كان مش فى نفس مستوى اليابانى طبعا (و مالناش دعوة بالألمانى ده بره اللعبة أصلا).

الباور مش خفيف ريشة , و أنا بحب كده , تحس الباور تقيل كده مش اول ما تمس الطارة و تلف حتة العربية تجيب يمين و شمال ... كده أحسن فى رأيي .

العيوب من وجه نظرى :

التابلوه أحيانا بيطلع منه صوت تزييق خفيف (يمكن مش متركب كويس و لا حاجة).

السنتر أحيانا بيبقى مزعج مع موضوع أول دوسة فرامل ده – و خصوصا لما حد بيبقى نازل و يلاقى الباب مقفول و يبقى ماسك الأكرة برده , ببقى حاسس إنى هتشل و أنا بطلب منه يسيبها عشان يعرف ينزل.

العفشة ناشفة حبتين فببقى باخد كل مطب بررراااااحة عشان العربية متتهبدش – بس ملحوظة هى الحمد لله مبتحكش فى المطبات خالص.

و أخيرا عدد لفات الدركسيون مش كتير – أو يعنى نص قطر الدوران مش قليل بالعكس واسع حبة.

ثانيا: شكل العربية من بره : مش وحش و مش تحفة – اللى هيركز فيها شوية هيلاقى فيه منها شوية من الفولكس البورا – بس هيا مش شبابية طبعا (الجين2 و البيرسونا أشيك بكتـــــــــــــير).

العربية مستواها عالى عن الأرض و مش بتحك بالمطبات خالص , و البودى بتاعها مايل على تحت شوية من قدام عشان تقرب من الأرض على السرعات – أو أنا أظن كده.

الصاج معقول مش ورق و لا ناشف. و أنا الصراحة مش عارف إيه مزايا و عيوب الصاج الناشف و الطرى.

قفل الأبواب بحس فيها رزعة شوية , بس هى مش سيئة يعنى.

الشنظة واسعة ما شاء الله و عمقها كويس برده.

ثالثا: الموتور و السحب و الثبات : الموتور 110 حصان و وزنها 1250 كجم و أنا بحط بنزين 92 ... سحب الموتور ما شاء الله كويس لو إنت مش بتقرص على العربية (يعنى أنا بنقل عند 3000 لفة فى الدقيقة و بحاول معظم الوقت مزودش عن كده طول الطريق) .. لو قرصت على العربية, هتشوف بقى السحب الحلو اللى يعجب الشباب اللى بيشدوا. و عموما سحب العربية بيبان عند من بعد 3000 ل 5500 لفة فى الدقيقة , و بيبقى أفضل فى المانيوال طبعا. و أداء الكيك داون ماشاء الله حلو برده و صوت الموتور بيبقى حلو (مش مزعج يعنى).

الثبات ما شاء الله كويس جدا لحد 150 و محبيتش أزود عن كده الصراحة – القلب بقى يا ولدى – بس صوت الموتور بيبقى عالى ساعتها.

الفرامل إستجابتها حلوة و إن كان مشوارها طويل شوية و حكاية إن الفرامل على ال4 عجلات ديسكات دى أنا شايف إنها ظريفة جدا و بتخلى العربية تقف بشكل أفضل و الحمد لله متحطيتش فى وضع إنى أخلى ال ABS يشتغل.

الإضاءة كويسة و كنت ملاحظ إن النور الواطى فيه كسرة شمال و بعد كده واحد صاحبى قاللى إن دى مقصودة عشان اللى جاى عكسك النور ميجيش فى عينيه.

الفوج لايت نوره حلو و بيعمل فرق فعلا.

إستهلاك البنزين معقول و متوقع إنه يتحسن (هى دلوقتى بتعمل 100 كم ب 10 لتر) و بحاول دايما أمون و يكون تلت التانك مليان (هى سعة تانكها 60 لتر).

سافرت بيها إسكندرية فقلت أجرب أثبت على سرعة 130 شوية و الحمد لله لبست مخالفة سرعة ... و أنا راجع مزودتش على 100 ... يلا الحمد لله على كل شيئ., محدش بيتعلم ببلاش .

أتمنى أكون لميت معظم النقط و لو نسيت حاجة أتمنى الناس تنبهنى , و أنا مستعد للرد على أى إستفسار.

السلام عليكم,

أحمد السعيد