أخر أخبار صحراوي إسكندرية

**MoToRiZeR** · 15-04-2010 03:31 AM

انا سافرت إسكندرية مرتين في وقت قصير في ده إختصار كدة لشوية حاجات عالطريق

أول حاجة فيه رادار جوة التحويلات !!! و دي الحاجة اللي البعض مش متخيلها .. أيوة .. هتضطر تمشي 60 عالصحراوي عملتها إنهاردة في التحويلة كان فيه يافطة كبيييييرة لونها أصفر و مكتوب عليها 60 السرعة مراقبة بالرادار .. أول ما دخلت التجويلة لقيت الناس كلها بتقلب نور .. فضلت ماشي كدة و لقيت فعلاَ كمين في الأخر و ناس قد كدة ... اللي هيستخدم الطريق قريب يخلي باله.

تاني حاجة فيه كذا كمين عالطريق .. متاخدكش الجلالة و تقول خلاص الكمين عدا و تجري .. انا إنهاردة قابلت لجنتين رادار في 10 كيلو !

إمارات مصر هتفتح بعد مدخل مدينة السادات !! هنلاقي بنزينة نضيفة نقف فيها عالصحراوي من غير ما حد يدمر العجل و يشتغلنا .. بجد فرحت جداَ .. هتفتح في مدخل السادات في إتجاه إسكندرية .

مستوي الحتت المتسفلتة الشتا ده مش كويس بصراحة .. السفلتة الجديدة اللي إتعملت قبل كدة أحسن بكتير !!!

بس كدة

**Ahmed Nouh** · 15-04-2010 05:09 AM

يا وجعى !! , يعنى يا محمود الناس الغريبه اللى بيلتزمو بالسرعات زى حلاتنا السفر ياخد معاهم قد ايه بالتحويلات ال 60 دى

اخد معاى بوئجه اسطوانات ؟؟

**MoToRiZeR** · 15-04-2010 05:34 AM

انا أختها في ساعتين و نص يا أحمد يعني بزيادة نص ساعة عن العادي بسبب الحوارات دي .. المشكلة التحويلة اللي كان عليها الرادار كانت في النص التاني من الطريق اللي هو إنت سخنت و زهقت خلاص .. و طولها 10 كيلو! خد كل الإسطوانات اللي عندك :d

لأ و الرخامة بعديها بخمسة كيلو رادار عادي اللي هو 100 !

**Ahmed Nouh** · 15-04-2010 05:42 AM

المشاركة الأصلية كتبت بواسطة motorizer

انا أختها في ساعتين و نص يا أحمد يعني بزيادة نص ساعة عن العادي بسبب الحوارات دي .. المشكلة التحويلة اللي كان عليها الرادار كانت في النص التاني من الطريق اللي هو إنت سخنت و زهقت خلاص .. و طولها 10 كيلو! خد كل الإسطوانات اللي عندك :d

لأ و الرخامة بعديها بخمسة كيلو رادار عادي اللي هو 100 !

احيانا كتير الواحد بيحس بقيمه المواتير ال 1300 , اهو منه العربيه متبقاش بتجرى ومنه الواحد يعمل نفسه اقتصادى وبيحافظ على البيئه :)

انا هعمل بقا اسطوانات من دلوقتى علشان سفريه المقابله , بس انا بالنسبه لى ميزه ان يبقى فى رادار كل شويه

بستمتع جدا بمشهد انى داخل على الرادار مبتسم وكل الناس راكنه على وشهم الغضب اثر ال 150 جنيه d:

**د.محمود صلاح** · 15-04-2010 08:00 AM

شادين حيلهم قوي في موضوع الرادارت ده ليه كده ؟ حتى في الوصلة ؟ هما جاتلهم طلبية رادارات جديدة بيجربوها ؟

**Ghamrawy** · 15-04-2010 10:26 AM

شكرا على التنبيه يا محمود
انا فعلا مسافر بكره بعد صلاة الجمعة ان شاء الله

**shaddadfalcon1** · 15-04-2010 10:27 AM

ياريت يرشقوه رادارات كل 3 ولا 4 كيلو عشان محدش يلحق يجري والواحد يبقي مستمتع بالسواقه مش كل شويه يلاقي نحله عدت من جنبه

والله لو يعملو كده مفيش حد هيجري لكن نظام الرادار المتحرك ده فاشل لان مجرد ماحد يشوفه خلاص كله بيعرف

**El Prince** · 15-04-2010 12:09 PM

أنا سافرت اسكندريه من الصحراوى بعد شم النسيم
مكانش فيه اى لجان رادار سواء وانا رايح أو وانا راجع
كنت ماشى 90 على طوووول بس فى التحويلات كنت بهدى شويه بس مش 60 يعنى .. الحمد لله ربنا ستر

ملحوظه : أول نص طريق العوده من اسكندريه سئ جدااااااً