5 ايام من العذاب فى المرور بالتفصيل الممل
السلام عليكم و رحمه الله و بركاته
انا حبيت افضفض معاكو على المر اللى شفته على مدار 5 ايام فى مرور الوايلى و مرور السويس طبعا بلا منازع
اولا انا كنت عارف اللى هيحصل بس مكنتش متخيل مدى القرف ده كله اللى شفته فى مرور السويس و علشان كده اخدت اسبوع اجازه من الشغل
انا عربيتى كولت 96 شاريها من 3 سنين كان صاحبها لسه مرخصها 3 سنين فمشيت بالتوكيل الثلاث سنين لغايه ما خلصوا الاسبوع اللى فات فرحت الشهر العقارى و نقلت ملكيه و دفعت 365 جنيه و بدأت رحله المعاناه بعد كده فى المرور ..............
اول يوم السبت ( مرور الوايلى )
الرخصه كانت انتهت الضريبه بتاعتها فقالولى لازم اسافر مرور الوايلى الاول اجيب شهاده بيانات و دفعونى ضريبه هناك بتاعه سنه حوالى 180 جنيه
و جبت شهاده مخالفات حوالى 135 جنيه
و دفعت ورق و تصوير من كشك بتاع الورق 5 جنيه
و دفعت للموظفين هناك 25 جنيه
و دفعت 10 جنيه جراج بره المرور علشان ريح دماغى
رغم اللفه بس قعدت هناك حوالى 3 ساعات و كان زحمه شويه بس ما اتخنقتش فى نظام الى حد ما و اليوم عدى و الحمد لله
ثانى يوم الاحد ( مرور السويس )
رحت المرور و كنت هناك بالظبط الساعه 8:45 صباحا لقيت المرور ضرب نار زحمه جدا جدا رحت اتحايل على اللى بياخد البصمه لغايه ما جه رفع البصمه و اخد 5 جنيهات
و بعدين الطفايه رحت لكشك بتاع الطفايات خد 18 جنيه صيانه طفايه علشان يقشر على الورق بس و ما لمسش الطفايه اصلا !!!!!!!!!! و بعدها العسكرى مضا على ورق الطفايه و اديته 3 جنيه فكه كانو معايا
و بعدين جبت شنطه الاسعاف و دفعت 43 جنيه و اخدتها و الوصل علشان يتحط مع الورق
و دفعت 50 علشان المثلث و كنت مستغرب جدا لانى كنت بسمع ان الشنطه و المثلث بناخدهم ببلاش مع الترخيص
و بعدين وقفت فى طابور طويل عريض علشان فحص العادم و كنت سامع الناس بتقول لبعضها اغمزه 20 جنيه علشان ينجز الورق المهم على ما وصل بصراحه كنت مطلع 20 جنيه و اول ما نزلتله راح قالى معلش هديك مهله شهر علشان عندك عادم و ما ادانيش فرصه علشان اديله فلوس فمش عارف الناس كانت بتفترى عليه على موضوع انه بياخد فلوس و لا لا المهم اتخنقت جدا و المفروض بقا همضى الورق بتاعى من الظابط لقيت واحد صاحبى قاعد مع الظابط بتاع الفحص سلمت عليه و قالى ايه الاخبار معاك حكيتله فراح مدى ورقى للظابط و راح الظابط بعت ورقه العادم للموظف و خلصت الحمد لله بتسهيل من ربنا
بعد كده طلبت بقى مطابقه البصمه راح مهندس الفحص كتب فى ظهر الورقه بتاعه الفحص الطلب و خلانى رحت مضيته من ظابط تانى جوه وحده المرور و طوابير طبعا المهم اتمضت و اتختمت و خلص اليوم فى المرور معايا و كانت الساعه 12:30 تقريبا
اليوم الثالث ( مرور الوايلى)
وصلت القاهره عند المرور الساعه 30 :10 تقريبا كان بصراحه اظرف يوم المرور كان فاضى زى الفل اول ما دخلت لقيت شباك مكتوب عليه المطابقه و لقيت عسكرى واقف اديته الورق و 10 جنيه و قلتله انجز علشان عاوز ارجع السويس بدرى ثوانى و كان جاب الملف بتاعى و ادانى اخر بصمه لعربيتى اتعملت فى مرور الوايلى و قالى اروح للمهندس و وصفلى مكانه رحتله دقيقتين و كان خلص الورق بتاعى و مضاه و بعدي رجعت للعسكرى تانى اديته الورق ختمه و بعدين اداهونى ما قعدتش فى المرور 15 ساعه و مشيت و كنت مبسوط جدا
اليوم الرابع ( مرور السويس )
كنت فى المرور الساعه 8:20 تقريبا علشان الحق قبل الزحمه لقيته زحمه جدا مفيش فايده فى مرور السويس حاجه تقرف و كان واحد تبع معرض بيرخص عربيات جديده طبعا مظبط مع الناس فى المرور علشان يخلصو عربياته الاول و معاه فوق ال 10 عربيات و فين على ما خلصو بدء بتاع البصمه ياخد باقى العربيات و كان الظابط لسه مجاش اصلا المهم انا كنت فاكر انى خلاص مش هرفع بصمه تانى طبعا لالالالا خلونى ارفع بصمه تانى مش فاهم ليه و اديت بتاع البصمه 5 جنيهات اخرىو بعدين الظابط و مهندس الفحص مضوا الورق بتاعى و افتكرت انى قربت اخلص خلاص طلعت بحلممممممممممم
الكلام ده كان حوالى الساعه 10:30 تقريبا
رحت علشان ادفع التأمين و دفعت 85 جنيه سنه واحده علشان الضريبه اللى دفعهونى فى مرور الوايلى كانت سنه واحد فقلت امشيها سنه و خلاص
و على الساعه 11 كنت فى الشباك اسمه المراجعهبتراجع على الورق و كتبت على الملف بتاعى هروح لانه شباك بس كده و الطابور اللى وقفت فيه حوالى ساعه
و من الساعه 12 واقف على شباك رقم 8 و كان فيه واحده ست اعوذ باله ما بتشتغلش قد ما بتتخانق مع دبان وشها اى حد يكلمها خد عندك نص ساعه خناقه بينهم و تسيب الشباك و تقعد بالنص ساعه و تيجى تانى فين لغايه ما جه دورى و ندهت عليا كانت الساعه 1:30 بتسجل رقمى القديم على الكمبيوتر مش راضى يخش قالتلى هو انت سجلت الفحص قلتلها فحص ايه قالتلى مش انت اللى سالتك سجلت و لا لا و قلتلى سجلت طبعا بصتلها من فوق لتحت و سيبتها و مشيت لانى لو كلمتها كنت ههزئها لانى كنت على الاخر رحت اشوف موضوع تسجيل الفحص ده لقيتهم خلصو مشيو و بالتالى هاجى لليوم الخامس و كنت بحلم بالمرور خلاص قرفتتتتتت
و الطريف بقى ان نفس الناس معاك تقريبا كل يوم نفس الوجوه تقريبا عرفنا بعض كده بالشبه
اليوم الخامس ( مرور السويس )
رحت المرور الساعه 8:30 على شباك التسجيل على طول و المفاجأه ان كان واقف طابور طويل على التسجيل برضه والهى انا كنت فى قمه الخنقه مش ممكن
المهم خلصت بعد ساعه تقريبا و رحت على الشباك اللى كان فيه الموظفه بتاعه اليوم اللى قبله الهانم ما كنتش لسه جت وقفت فى طابور المراجعه علشان تكتبلى رقم شباك تانى يخلصلى و فعلا كتبت رقم تانى و وقفت فى الشباك حوالى ساعه و نصف لغايه 12 على ما وصلت للشباك و تقولى خلاص مش هاخد ورق تانى لغايه ما اخلص الورق اللى معايا رحت مزعق فيها بصراحه و قلتلها انا بقالى كام يوم هنا و كذا و كذا بزعيق جامد فراحت بصالى و خدت الورق الحمد لله ندهت عليا بعد ساعه تقريبا على 1:00 و عملتلى وصل استلام نمر جديده و وصل تسليم نمر قديمه و قلت افك النمر القديمه رحت رايح لعم محمد بتاع النمر لاقيته متنرفز اوى و بيقول خلاص مش هاخد نمر تانى او ورق رحت مطبق 5 جنيه و بينتهاله قلتله روق يا عم محمد علشان خاطرى و معلش راح خد الورق و بيقول ده انا من الصبح مش عارف اقوماورح الحمام حرام عليكو الله يكون فى عونه هههههههه الباشا عاوز يقفل الساعه 1
المهم راح قالى امضى ورقه من ظابط اللى فى الوحده و بعدين اروح اسجل فى الاستيفه طلعت جرى علشان الحق اخلص و رحت راجع للموظفه تانى اديتها الورق و قلتلى خلاص اقعد استنى يتنده اسمى من شباك المراجعه و قعدت استنى لغايه الساعه 3:00 ما ندهوا اسمى و ادونى ورقه دفعت بيها 165 جنيه فيها حاجات كتير كده و بعدين الساعه 3:30 بالظبط اسلمت الرخصه و دخلت بالعربيه علشان يركبه النمر الجديده و الحمد لله
انا استويت الخمس ايام دول فعلا كنت بحلم بالمرور بليل كل يوم هروح الاقى الموظفه و لا لا هروحيلاقو اسمى مش عارف ايه اى حاجه كوابيس والهى
معلش انا عارف طولت عليكو جدا معلش بس قلت افضفض معاكو شويه و يمكن حد يستفيد من اللفه السواد ده
