خلاص مسافر

**mina_ramsis** · 20-01-2008 08:44 PM

تروح و ترجع بالسلامة يا استاذ اسلام و ما تنساش تدخل على المنتدى من هناك

**Sharky** · 20-01-2008 09:28 PM

إيه الأخبار دى يا إسلام

بصراحة انا مش عارف أزعل علشان إنت مسافر و مش حنشوفك على الأقل سنة و لا أفرح لك لإن أكيد هناك حيبقى أحسن ليك من هنا

على العموم ربنا يوفقك فى قطر و إن شاء الله تكون مبسوط لكن إللى حيصبرنا هنا إنك تخش كل يوم من قطر على المنتدى و تطمنا عليك و تكون مراسلنا هناك :)

بصراحة يا إسلام إنت من الناس المحترمة إللى الواحد حيزعل على فراقها :(

**hazem_khidr** · 20-01-2008 09:46 PM

:( :( :( :( :( :( :( :( :( :( :( :(
ما تعرفش بجد انا زعلت اد ايه انك مسافر
و الله حتوحشني جدا جدا يا اسلام
انا كنت متغرب قبل كده و عارف احساسك عامل ازاي دلوقتي بس ربنا يعينك و يصبرك اهي تجربه برضه و اكيد حتستفد منها و ربنا يرجعك لاولادك و لينا بالسلامه
..........................
بالنسبه للعربيه انا رايي انك ترفعها يمكن لا قدر الله ما يعجبكش النظام هناك ف ترجع و تقول يا رتني ما كنت بعتها.
تاني حاجه لما تنزل اجازه ان شاء الله و تقعد شهر حتحتاج عربيه اكيد و مش معقول حتشتري عربيه تستعملها شهر و تبيعها و ترجع تقول يا رتني ما كنت بيعت عربيتي.
لو ركنتها عند اي حد ايا كان امين ممكن تتخبط او تتحك و هيا واقفه و ساعتها هو حيضيق و انت كمان حتضايق.
الحل:ارفعها و لم تنزل كل سنه استعملها و لما تستقر تاني ان شاء الله بيعها و حتجيب تمن كويس لانها مرفوعه و ما عملتش كيلوات كتير و هات حاجه جديده لو عاوز تغير.
ربنا معاك و يصبرك و تنول اللي في بالك و ان شاء الله تبعت تجيب اولادك في اقرب وقت و يبقو معاك.
.......................
تعبت و كنت حعمل ايه
مين اختار غربته باديه
لكن حبك دا ما نسيتهوش و عاش فيا
ليه حتأسف علي الغيبه
ما غيبتيش لحظه و قريبه
محدش عنده كده طيبه و حنيا
لما تبقي تسمع الاغنيه دي ابقي افتكرني و قول الله يمسيك بالخير يا حازم:)

**اسلام المصرى** · 20-01-2008 09:54 PM

أنا كلمتك...... و مش عارف أقولك ايه يا اسلام :( :( :( :( :(
هتوحشنا جدااااااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااااا ااااا
ربنا يوفقك هناك و تروح و ترجعلنا بألف سلامة ان شاء الله.
أول حاجة هناك تشترى كمبيوتر أو لابتوب :) علشان نكون على أتصال و نطمن عليك.
أنت هتسيب فراغ كبير جدا يا اسلام!!!!!!
ده حال الدنيا .................
بلاش موضوع بيع العربية: العربية عجباك أنت صرفت عليها كتير و ضحيت بوقتك , ماحدش عارف الظروف ايه....
لو هترفعها يبقى أعمل ذى ما نادر و كريم قالوا , جزاهم الله خيرا.
سلام يا صاحبى :(

**mbluethunder** · 20-01-2008 10:15 PM

يااه يا إسلام

بجد هاتعمل فراغ رهيب

الواحد إتعود على وجودك معانا علطول

بس مهما الناس بعدت عن بعضها في أي حته في العالم هايفضل المنتدى ده مجمعهم علطول

ربنا يوفقك هناك وتكون فتحة خير عليك

وأعتقد إنك ممكن بعد كده تبعت تاخد المدام والأولاد علشان يعيشوا معاك

يارب نشوفك على خير يا إسلام

**NaderNabil** · 20-01-2008 10:19 PM

كده يا إسلام باشا؟؟؟؟؟؟!!!فاجأة كده و بدون مقدماتتت؟؟؟؟
صدقني أنا زعلان جدا جداجداجداجداجدا....بس أنا مبسوط عشان سفرك و انك اكيد هتبقي مبسوط هناك...بس اهم حاجة ماتغيبش كتير...و ربنا يعمل اليي فيه الخير ليك.

عزائي الوحيد اني هاقبلك أخر الاسبوع ان شاء الله....و اكيد هشوفك تاني قبل ما تسافر:)

**mars3v** · 20-01-2008 10:21 PM

تروح و ترجع بالسلامه ،ده بيانات السفاره المصريه فى قطر يمكن تحتاجها

Egypt Embassy/High Comission/Consulate For State of
QatarOffice : Embassy
Street Address : Diplomatic Area
Postal Address : PO Box 2899
ZIP Code :
City : Doha
State : Doha
Country : Qatar
Phone : (+974) 4832424
Fax : (+974) 4832196
Email : info@egyptembqatar.com
Website : http://www.egyptembqatar.com/

**segsauer** · 20-01-2008 10:24 PM

تروح و تيجى بالسلامة يا أسلام باشا
وكان نفسى ألحق أقابلك و أتعرف عليك أكتر وأتمنى أنك تفضل متابع معانا فى المنتدى و خاصة منتدى متسوبيشى
بالنسبة لموضوع بيع العربية أنا رأيى و عن تجربة أنك ماتبعش العربية لأنك جايبها زيرو وصرفت عليها كتير و لما تنوى تبيعها حتخسر فيها كتير
وكمان أنت حتحتاجها لما تنزل مصر فى أى أجازة

**إسلام شاهين** · 20-01-2008 10:54 PM

والله بجد بجد أنا فعلا عيطت كثير من الكلام الرهيب ده اللي إنتوا قلتوه ، يعني فيه ناس لاشافتني قبل كده ولا مرة ومع ذلك متأثرين من غيابي بجد فعلا المنتدى ده خيره على الناس كلها بلا استثناء إنو يعرفنا ببعض ويحببنا في بعض بالكشل ده .

بالنسبة للعربية والله يا جماعه أنا فعلا محتاااااااااار جدا جدا بس أنا مستبعد فعلا موضوع البيع لأسباب كثيرة إنو فعلا لو رحت وماعجبنيش الحال هتضطر أنزل وساعتها أكيد هندم .

الفكرة في الرفع إنو فعلا متعب وشغلانه ولما أنزل أجازة هاخدلي بتاع يومين في غلبة وشغلانه علشان أشغلها ثاني وكمان يومين علشان أرفعها .

ومضوع إني أسيبها لقريبي ده برضه فعلا مقلق محدش ضامن الظروف ، وموضوع التأجير ده أكيد برضه مستبعد تماما .

فواضح كده إن مافيش غير الرفع .

المهم إنتوا حسستوني إني مسافر بكره أنا لسه قدامي بتاع شهر أو أكثر على ما الإجراءات تخلص فاماتخافوش مرزل يعني لسه مرزل !!!

وبعدين لسه فيه مقابلة شهر 1 أكيد إن شاء الله جاي .

ولسه طلعت بور سعيد

نادر حبيبي معلوماتك فعلا قيمة جدا إنت وكريم وإسلام المصري وحازم خضر وشاركي وأحمد وأحمد ونادر نبيل و.................. مش عايز أنسى حد يا جماعه بجد بجد أنا متأثر جدا جدا بمشاعركم ديه

ahmed باشا إنت فين في المجلس وأنهي إدارة أنا كنت هناك يوم السبت بمضي الموافقة من الأمين العام ياريت لو تبعتلي رقمك على الخاص أكيد هنحتاج بعض .

**Chicco** · 20-01-2008 10:54 PM

إسلام باشا ربنا يوفقك و تروح و ترجع بالسلامة إن شاء الله...... أخوك مجرب و طبيب :)
اسمحلي اشاركك تجربتي ....أنا مسافر كندا بقالي سنتين و نص و سايب عربيتين في مصر بتاعتي و بتاعة المدام ...كل عربية مع حد من العيلة و هما بيخدوا بالهم منهم...... لما بننزل مصر العربيات جاهزة للاستخدام من غير معدل فاقد كتير (كل عربية بتطلع مرة أو اتنين كل إسبوع ) طبعا الامر ماسلمش من خبطات للعربيات بس ده قدر كل عربيات المحروسة حتى العربيات المرفوعة !!!!!
رفع العربية شغلانة و حيضيع وقت الاجازة.... غير إن العربية بتتبهدل و حتت كتير بتبوظ
توكل على الله و ربنا معاك

الموضوع: خلاص مسافر

LinkBack

أدوات الموضوع

عرض

هتوحشنا -

-

-

-

المواضيع المتشابهه

أنا خلاص خلاص بجد بقيت نيساناوى بجد

البلد خلاص والناس خلاص اتجننت ومحدش بقى لية كبيروكلةماشى بدراعةكارثةحصلت قدامى امبارح

كنت مسافر بكرة اسكندرية ومش عارف اركب اية و ياريت حد يرد عليا علشان مسافر بكرة الصبح

المصري .... لسه... ولا خلاص ؟ طب لو خلاص ولا لسه ليه؟

خلاص .. خلاص بجد .. دي مش عيشة بني أدمين

الكلمات الدلالية لهذا الموضوع

المفضلات

المفضلات

ضوابط المشاركة