-
خلاص مسافر
مش عارف أوصفلكوا مشاعري الحزينة بسبب سفري القريب إن شاء الله للعمل بدولة القطر ( المفروض أكون هناك واستلم العمل قبل 20/3 ) وديه أول مرة أفارق أحبابي وأصحابي لوحدي وأول مرة أروح قطر ومع إني متربي في السعودية وواخد على الغربة إلا إنها المرة ديه صعبة علشان مسافر لوحدي بدون أولادي .
أنا بس ليا عندكوا طلبين :-
الأول :- فيه حد هنا من قطر ؟ على أساس لما أروح هناك نتقابل وكده يعني نخفف عن بعض الغربة ؟
الثاني :- إيه رأيكو أرفع العربية ولا أبيعها أحسن ؟ وده سؤال مهم جدا لأن فيه ناس كثير شارت عليا ببيعها لعدم الحاجة إليها لمدة سنة على الأقل ، وبعدين لو هرفعها أعمل إيه بالضبط للمحافظة عليها ؟
-
هاتوحشنا جدااا يا اسلام باشا :( وان شاء الله تكون سفريه موفقه وكلها خير وتروح وتيجى بالسلامه .. انا ليا واحد صاحبى مهندس مدنى لسه مسافر قطر من 3 اسابيع تقريبا وهوا كمان مايعرفش حد هناك ممكن ابعتلك نمرته على الخاص وهوا بلديات من المنصوره :)
بالنسبه للعربيه نصيحه اخويه ماتبعهاش وارفعها فى جراج يكون مضمون وقريب من البيت وخلى اى حد من العيله يبقى يروح يطمن عليها كل شويه .
-
ربنا يقويك علي الغربة
و تروح و ترجع بألف سلامة
و رأيي انك تبيع العربية
و تجيب احسن منها لما ترجع ان شاء الله
-
لية بس كدة والله زعلت قوى لما عرفت
تروح و تيجى بالف سلامة ويا رب يهون عليك غربتك
ممكن تستنى لحد كا اخلص جامعة واجى معاك
وانت عارف مليش انا فى العربيات علشان افيدك
-
اية يا جماعة هى كل الناس مسافرة ولا اية ...امال مين اللى هايفضل فى البلد !!...واللهى هاتوحشنا يا اسلام باشا تروح و تيجى بالسلامة ...و ارفع العربية فى جراج امين و متبعهاش محدش بيبيع عربية كويسة معاة الايام دى .
-
اولا تروح وترجع بألف سلامه يا اسلام وان شاء الله تكون سفريه موفقه
ثانيا بخصوص العربيه
لو انت مسافر ولسه مش مستقر و في احتمال انك تغيير رأيك بعد وشويه وترجع انصحك متصرفش فيها قبل السفر وخليها لغاية اول اجازه ..
لو انت مسافر ومخطط انك تقعد عدد سنين محدد و مطمئن لان مفيش مفاجات .... يبقى نصيحه توكل على الله وبيعها ولما ترجع تستقر اكيد الاسعار هتكون اقل ل
-
تروح بالف سلامة يا غالي
العربية لو محدش هيستخدمها بيعها .. اصل في الغالب سعرها هيقل و كمان ممكن تحصل المعجزة و الجمارك تنزل
و ربنا يوفقك
-
الف سلامه عليك يا استاذ اسلام :)
قطر بجد بلد جميله جدااا :) و حتزهق من الاندكروزر هناك ههههههههههههههه
و برضه حتزهق من كورفت و كرايسلر اكتر عربيات منتشره
-
طلعة مرة واحدة كدة السفرية دي؟، هتوحشنا والله يا اسلام ربنا يوفقك هناك ويصبرك
على فراق عائلتك.
بالنسبة للعربية يا اسلام لو مسافر سنة وراجع تاني يبقى ارفعها لان انت صارف عليها
كتير وتبيع بخسارة اما لو ناوي تطول يبقى بيع احسن لك ولما تيجي ربنا يعطيك اللي
احسن منها.
ونصيحة مني ارفعها اربع خمس اشهر على ما تستقر هناك وتظهر الامور امامك علشان
لو نويت تطول يبقى تبيع وانت متطمن او لو مستريحتش هناك يبقى مخسرتش حاجة
وعربيتك موجودة.
لو هترفع عربيتك:
1- دور على مكان امن ومش مظلم وظل.
2- رش العربية من اسفل بـWD40 او على الاقل شحمها!.
3- فضي العربية من كل السوائل اللي فيها (زيوت وبنزين ومياة).
4- افصل البطارية والكاسيت وكل الكماليات الكهربائية الصغيرة السهلة السرقة
وشيلهم عندك.
5- فك الاربع عجلات وشيلهم وشيل معاهم الاستبن والعدة والطفاية (فضي الشنطة).
6- ربط الطنابير الاربعة كويس باكياس بلاستيك بعد ما ترشهم بـWD40 علشان
ميصدوش.
7- كلبش الدركسيون بالقفل.
8- اشتري غطاء واتر بروف علشان تغطي بة العربية.
9- حاوط العربية بالكامل بكرتون (كراتين الشيبسي والسمن وكدة) على الزجاج
والسقف والشنطة والكبوت والجانبين وبعدين غطيها واربطها بحبل (حبل غسيل مثلاً)
علشان اللون ميبهتش ومتتجرحش.
10- ومتنساش تقفل فتحات التكيف.
-
حبيب قلبي خلاص خدت القرار
انا عارف طبعا انك استخرت كويس بس عشان خاطر الحاجات اللي اتكلمنا فيها على الواقف ومالحقناش نكمل كلامنا فيها
ماتبعش العربية
انت صارف عليها وفي الغالب اللي بيشتري مش بيقدر الكلام ده
والانسر ما شاء الله تمنها فيها والموديل ده مش اخر سنة ليه لانه لسه بينتج
وانت في خلال من 6 شهور لسنة تكون عرفت احوالك وهاتقعد هناك قد ايه
وحتى ممكن تعمل توكيل لحد يبيعهالك وانت هناك لو نويت تطول هناك او لما تنزل اول اجازة
-----------
بالنسبة لو انت عندك جراج كويس وطبعا ليك اخوات او نسايب يشأرو عليها يبقي ارفعا سنة لحد ما تشوف هاتعمل ايه
الرفع على اربع حمالات حديد تشتريهم او تعملهم عمولة
تفضي العربية من البنزين وتغير زيت حتى لو كنت لسه مغيرةومشيت بيه 100 كيلو
يكون زيت نضيف حتى ولو بتاع ال الف كيلو
تفك الاربع عجلات وتحطهم في الشنطة او في البيت
تغطي الاربع طنابير باكياس بلاستيكية مزدوجة
تجيب غطاء مشمع وتر بروف وتغطي بيه العربية وتلف حبل طويل عليها من ورا لقدام
اهم حاجة الجراج يكون صاحبة امين وماتسبهاش في الشارع
وطبعا تشيل الكاسيت او الوش بتاعة وتفك كابل البطارية
---------
في طريقة تانية انك ترفعها برضه بس من غير ماتفك كابل البطارية وتسيب فيها نص التانك وكل اسبوعين الى شهر حد يدورهالك ويسيبها دايرة نص ساعة برضه
وفي كل الاحوال تفك النمرتين وتسيبهم في البيت
صحيح معلومة مهمة
بلغ في القسم ان العربية مرفوعة عشان لا قدر الله محدش يعمل مصيبة وياخد رقمها ويلبسهالك
حبيب قلبي تروح وترجع بالف سلامة وربنا يوفقك للي فيه الخير ليك ولاسرتك
اخوك الصغير كريم
Content Relevant URLs by
vBSEO 3.6.0 PL2