الموضوع: تفتكروااا النص درجة كانت هاتفرق !!!!

المشاركة الأصلية كتبت بواسطة أحمد كمال

بص يا غزالي باشا ..... يشرفني جدا انك عايز تسمع رأيي

فيه صديق حميم ليا من ايام اولى ثانوي

و دماغه نضيفة و عبقري و اذكى مني بكتير

كان زيي حلم حياته يخش حاسبات و معلومات

بسبب كام درجة حقيرة دخل هندسة غصب عنه ..... كان جايب بالظبط 377 من 400 و دخل هندسة عين شمس ..... سنتها - 1998 - كان اقل كلية حاسبات (المنصورة و الزقازيق) اعلى من اعلى كلية هندسة (عين شمس) ...... فدخل هندسة عين شمس .....

انا دخلت هندسة معاه و 3 ايام و ما استحملتهاش و حولت عشان مجموعي كان يسمح

هو دخل هندسة و سقط في اعدادي سنتين و اترفد .....

بعدها ابوه قال هيحل الكيس و يدخله كمبيوتر ساينس في مودرن اكاديمي .....

و هو كان في ثانوية عامة شاملة (رياضة و علوم)

طبعا بعدنا كان النظام اتغير و رياضة 1 بقت اجباري في كل الاقسام العلمية

مودرن رفضت تقبله لانه مش واخد رياضة 1 مع ان في سنتنا رياضة 2 بس اللي كانت اجباري في علمي رياضة و رياضة 1 كانت اختياري !!!

و السنتين اللي قبلها كان فيه نظام ان الناس اللي في حالته ممكن تمتحن رياضة 2 و تخش

سنتها بقى وزير التعليم العالي لغاها !!!!

دخل تجارة انتساب سنة 2000 ..... و جاله اكتئاب من المناظر اللي شافها .... و قعد 4 سنين في تجارة انتساب ....

كان طول الوقت مصمم يكمل في المجال اللي بيحبه ..... الكمبيوتر .....

كنا بنذاكر حاجات مع بعض و هو كان بيجيب كتب و self study tutorials و يتعلم حاجات كتير مع نفسه ..... كان زي الرمل مهما تسقيه علم ما يشبعش

خلص الكلية ..... و في يوم بعد ما اتخرج رايحين مشوار انا و هو و مراته (اتجوز قبل ما يشتغل) باقول له هتعمل ايه؟ قال لي مش عارف و كان متضايق ..... قلت له ما تخش ال ITI .... و هتساعدك انك محدش هيقول لك انت تجارة و بتاع .... مع انه كان متحفظ على انه يقعد عاطل 9 شهور كمان ......

سبحان الله تاني يوم راح يسال لقاه اخر يوم للتقديم و قدم !! و بعد ال 3 شهور الاولانيين (foundation module) كان من الاوائل و قدر يدخل احسن قسم SD Java

اتعلم و استفاد كتير ..... و اول ما خلص مفيش اسابيع معدودة و اشتغل في IBM ..... بعد كام سنة راح شركة تانية ..... و دلوقتي هو في دولة خليجية و ما شاء الله عليه و على نجاحه العملي


واحد تاني خد كمية الصدمات دي (اجباره على كلية بيكرهها ثم رفده منها ثم تقديمه في جامعة خاصة و رفضه !! ثم تجارة انتساب اللي كان بيقول لي المدرج كان كباريه ..... و في النهاية اتخرج من ITI سنة 2005 يعني بعد ثانوية عامة بسبع سنين !!) .... واحد تاني كان وقع ....

دلوقتي سبحان الله ...... الخبطات دي كلها قوته ما ضعفتوش .....

الخلاصة ايه .... محدش عارف الخير فين ..... و اما تتخبط على دماغك و تقع.... فكر ازاي تقوم و تنفض التراب و تكمل مشوارك ....... الشارع اتسد في وشك دور على سكة تانية .....

الخلاصة و الحكمة

اجتهد كتير ..... حاول تتعلم حاجات قد ما تقدر تتميز بيها عن زمايلك لان خريجي الجامعة دلوقتي مع احترامي للاسف بقوا زي البضاعة الصيني ..... بالالاف المؤلفة و كلهم زي بعض ..... و اصحاب العمل بيدوروا على اللقطة او الماسة اللي وسط الكلام ده كله ..... ما تضيعش سنين الجامعة و اتعب شويتين تلاتة اربعة عشان مستقبلا ترتاح ..... و ربنا ما بيضيعش مجهود حد عايز يتعب و يجتهد .......

سبحان الله بجد ربنا يكرمة على الى عملة دة وتعبة دة كلة
وربنا سيهل واعرف اعمل الى فى دماغى انا فعلا ابتديت اخد حاجات هاتفيدنى بعد كدة زى ما قلت كورس الانجليزى وال it بس ربنا يسهل واعرف اقبل فية
ولو عندك حاجة ممكن تفيدنى قولى وانا احاول اسعى فيها كورسات وحاجات من هذا القبيل وشكرااا ليك يا ابو الحميد على النصيحة والكلام الجامد دة