الناس بقت كده ليييييييييييييه ؛؛؛؛؛؛؛

21-01-2008 11:46 PM

BASHAR
Karim_monir
TAG_Turbo0
محمد المشد

شكرا جزيلا على ردودكم
و فعلا يا كريم انا سعيده بأنضمامى للمنتدى و حصولى على 4000 اخ
جزاكم الله خير

استاذ احمد ابراهيم
اشكرك على ردك
بصراحه اجابه كافيه وافيه
كلك ذوق ؛؛؛

**Ahmed Samy** · 22-01-2008 02:01 AM

أنا كان عندي بولو 99
و كنت عارضها للبيع ب 42 ألف و كانت تسوى 43 ألف (كانت حالتها كويسة قوي)
و جه واحد اسمه على يشتريها مني و كنت اشتريت اللانسر فعلا وقعد برضه يقوللى أخويا و أمي و أبويا و العيد فرحة و مااااء و الحاجات دي
المهم بكام يا سيدي ؟؟؟ ب 35 الف قولتلو بأمارة ايه ؟؟ قاللي دي راشة سقف !
قولتلو لأ مش راشة سقف و أنا اخري معاك علشان أوفر كلام كتير 40 الف .
قاللي (والله ما هتجيب كده و انت هاتكلمني تتحايل عليا اخدها ب 35)
ف الكلمة ماعجبتنيش
المهم تاني يوم لاقيت كمية زباين غير عادية و كلو يشوف و يقوللي راشه سقف , راشة ايد , راشه رجل , مشيسة و مركبه نص و أسعار بقى زفت 29 و 32 و كده لدرجة اني كنت هاكتئب لحد ما واحد منهم قاللي (و كل ما تسيبها معاك هتنزل في السعر فلو لاقيت سعر مناسب بيع و خسارة قريبة ولا مكسب بعيد)
والله الفار لعب في دماغي و شكيت في حاجة كده و قولتلوا خلاص وقومت عامل الموبايل silent و كلمت الهوا (ايوه يا حج ...خلاص ممكن تيجي تشيل على 34 الف أنا موافق)
و قولت للراجل ان ده واحد من دمياط شافها من اسبوع
و بعد 15 دقيقة لاقيت صاحبنا الأولاني (علي) مكلمني و يقوللي هيه 34.500 و للا لأ ؟؟
قولتله لأ , قام قاللي هوا : مانت هاتبيع ب 34 للراجل بتاع دمياط !!!!
فهمتوا ...........؟؟؟
كان باعتلى ناس يفطسوا العربية علشان اقع في عرضه و ينتشلني من الوحل
زعقتله و قلتله يا نصاب يا حرامي و الله بقى لما تدفع انت فيها 45 الف مانت شايفها و لا تحط رجلك فيها .
و اقنعت ماما تاخدها لأختي و ادتنى 37 الف (انا اللي حددت السعر) و العربية مازالت موجودة و في منتهى الجمال و كانوا فلوس كلها بركة (اشتروا حاجات كتيييييييير :) )

**mada121977** · 22-01-2008 02:29 AM

لاحول ولا قوه الا بالله ... انتوا جيتوا على الوجيعه :( :( وفكرتونى بأحداث و مواقف مؤسفه ان دلت فانما تدل على مدى الانهيار الاخلاقى و السلوكى وغياب الواعظ الدينى عن حياه التجار والسماسره فى سوق السيارات فى بلدنا وهما فعلا لا ينطبق عليهم غير وصف واحد قاله الاخ الفاضل سبعاوى (راسبى معهد النصب والاحتيال ) كل واحد فيهم يفتكر نفسه ابو العريف و يحاول يضحك على اللى قدامه سواء بائع او شارى علشان يطلع بأكبر مكسب ممكن ومايهمش بقى اللى ضحك عليه ده ممكن الموقف ده يأثر فييه ويحسسه بالاحباط او الفشل (ممكن يكون فييه حد من الراسبين دول بيقرأوا الكلام ده دلوقتى وياريت يتقوا الله فيينا وفى انفسهم ويعرفوا ان الحياه مش كلها فلوس و ضحك على الناس فيه المعامله الطيبه و المكسب الحلال حتى ولو كان المكسب ده قليل ....
اختى الفاضله ربنا يعوض عليكى ويجعله فى ميزان حسناتك واذا كنت اتعرضتى للموقف ده مره فأخوكى اتعرضله مرااااات و كانت خسارته فادحه والحمد لله على كل حال

**ramyfawzy** · 22-01-2008 06:39 AM

والله فكرتوني بالذي مضى لما بعت اللادا بتاعتي وبقيت فلوس للمشتري (حوالى 1500 جنبه) وطبعا ما صدق كلمته تاني يوم عشان نخلص الاجراءات وبدأت سلسلة من الافلام:
فيلم اكشن : العربية اتخبطت جامد وعايزة مصاريف باكتر من الفين جنيه
فيلم درامي : معلش يا بشمهندس ممكن بس تنزل قرشين انا طمعان في كرمك (وهنيالك يا فاعل الخير)
وبعديها بكام يوم قلت له بص بقى انا زهقت منك انا عايز بقيت فلوسي قاللي ماشي بس تعالى الشهر العقاري عشان نكمل الاجراءات وبدأت مسرحية جديدة (اطول من الفيلم شوية) بس كوميديا:
عايزني اسجل العربية على حسابي وبأسم واحد تاني خالص انا عمري ما شفته ولا اعرفه
وكمان قاللى ان العربية عليها مخالفات في المرور حوالي الف جنيه بس انت هات 200 جنيه وانا هاظبطها قلت له يا راجل طيب انا هاتصرف
طبعا كل ده نصب في نصب لأني كنت جبت شهادة المخالفات وما دفعتش مليم اصلا
المهم الحمد لله المطب ده خلص على خير واتعلمت درس اني ما بعش عربيتي لتاجر ولو هكسب فيها ضعف تمنها
على فكرة الراجل ده انا حفظت شكله ولما بشوفو في السوق بيتكلم مع زبون بروح له واقوله خللى بالك بلاش الراجل ده حتى لو كان هيدفعلك مليون جنيه
وربنا يتوب علينا من الاشكال ديه

أسف للاطالة بس اختنا العزيزة قلبت علينا المواجع

رامي (ابو احمد)

**bimmeraddict** · 22-01-2008 04:47 PM

بس معلش أنتوا نسيتوا حاجة تانية خالص,أن أسعار السيارات المستعملة في مصر سعرها مبالغ فية كمان زي ما المشتري بيفاصل وكدة المشتري نادرا لما يقول للمشتري على كل حاجة في العربية أو العربية عاوزة مصاريف أد اية بالظبط كمان المالك لما بيجي يبيع السيارة بيقعد قبليها بسنة ميحطش فيها مليم.

**thegoodhacker** · 22-01-2008 07:48 PM

انا برضه كان عندي عربية 127 و اشتراها مني واحد ب 12500 و اقنعني انه شاريها لمراته .......بالضبط بعدها باسبوع لقيته منزل اعلان لبيعها في الوسيط ب 15000 جنيه (طبعا عرفت انها هي العربية من نمرة موبايله اللي سايبها في الاعلان) ......رحت شفت العربية (من غير ما يكون موجود طبعا علشان ما يعرفنيش ) والمفاجاة انه يدوبك لمعها ببوليش علشان بويتها تبان!!! ( بس انا مش مصدق انها تجيبله السعر ده ابدا خصوصا انها 2 باب بس )