بأفكر في أقامة دعوي قضائية علي هيئة الطرق و الكباري

**Samir Elshahawy** · 16-04-2010 01:12 AM

السادة الكرام أعضاء منتدي نايل موتورز الموقر ....

أسعد الله أيامكم كلها بالخير ووقاكم من شر الطريق

في الحقيقة مش عارف أبدأ منين .... و لكن بأختصار شديد تعرضت منذ أكثر من أسبوعين ألي أصابة شديدة في فقرات العنق نتيجة لضغط رهيب و أجهاد شديد في العمل و القيادة المستمرة و السفر الدائم (تقريبا كل يوم) علي مختلف الطرق الي عدة مدن مصرية

و كان نتيجة لقيادتي في الاسبوع الاخير أثناء رحلة قمت بها الي المنصورة و تعرضي الي عدة مطبات مفاجئة لم أكن اتوقعها بالاضافة الي الاصلاحات علي هذا الطريق دون وجود أي علامات او أشارات تنبيه ضوئية أن تعرضت لعدة مطبات و أهتزازات أخري أثناء عودتي ليلا رغم أن سرعتي لم تتعدي ال 90 كم/ساعة نظرا لسوء حالة الطريق ووجود شبورة مائية كثيفة

و منذ بضعة أيام كنت في رحلة أخري الي مدينة "دمياط" (يوم بداية العاصفة الترابية) و شعرت أثناء العودة و قيادتي لسيارتي ليلا و انا بالقرب من "مدينة العاشر من رمضان" بألم شديد بذراعي الايسر

و علي الفور ذهبت الي الطبيب في اليوم التالي و أخبرته بما حدث فأنفعل علي بشدة و أخبرني أن القيادة لمسافات طويلة علي مثل تلك الطرقات المليئة بالمطبات في منتهي الخطورة و قد تتسبب في حدوث مضاعفات للحالة و زيادة أنزلاق الفقرات مما يهدد بحدوث تدخل جراحي أذا لم يحدث تحسن خلال الاسبوع الحالي الذي امضيه حاليا في البيت

و قد بدأت فعليا أفكر في أقامة دعوي قضائية علي كل من هيئة الطرق و الكباري و وزارة النقل و المواصلات لأهمالهما الشديد للطرق و تسببهما في الحالة السيئة التي ألت أليها شوارعنا و طرقاتنا في حالة لو لاقدر الله ماساءت حالتي

لذا فأنا احتاج لمشورتكم و أرائكم في هذا الامر و خاصة الاخوة العارفين بالقانون و السادة المحامين هنا بالمنتدي , و في حالة نصيحتكم لي بتحريك مثل هذه الدعوة فهل يفضل أقامة دعوة جماعية لكل من تعرضوا لأصابات أو حوادث بسبب سوء حالة الطرق ؟؟

شكرا لكم مقدما علي مشاركاتكم
مع خالص تحياتي لكم
م/ سمير الشهاوي

**mhmdalsaadany** · 16-04-2010 01:56 AM

ربنا معاك ويوفقك لما فية الخير وألف مليون سلامة
أيوة كدا هي دي المواقف ولا بلاش يا سلام لو في زي حضرتك كدا ألف واحد مكنش بقي دا حال البلد

**تامر.محمد** · 16-04-2010 02:12 AM

الف سلامة عليك يا فندم
:(

**romeo_6887** · 16-04-2010 02:21 AM

حقك ان حضرتك ترفع قضيه علي اي وزاره حتي
بس يا تري مين اللي هيكسب في الاخر ؟
طبعا الاجابه معروفه للكل
انا مش بيأس حضرتك
بس كده هتخش في متاهات ملهاش اول من اخر
و مش هتاخد معاهم حق و لا باطل
و 1000 سلامه علي حضرتك

**Mohamed.Ramah** · 16-04-2010 05:18 AM

بالتوفيق يافندم وفعلا حنفضل نتفرج لغاية امتى لو كل واحد متضرر وماخدش الامور بسلبية وقال ما النتيجة معروفة مكنش دة بقى حالنا وفعلا حضرتك اشرت لنقطة التفات وسائل الاعلام والف سلامة على حضرتك

**blazer** · 16-04-2010 06:02 AM

الف سلامه على حضرتك
فعلا طريق دمياط زى الزفت
الطريق الزراعى كل كام متر 3 -4 جبال مش مطبات

**pro_samir** · 16-04-2010 06:14 AM

أولا ألف سلامة لحضرتك وربنا يتم شفائك علي خير

ثانيا عمرك اطول من عمري زي ما بيقولو لأني لسة كنت بفكر حالا قبل ما اطلع البيت اني ارفع قضية ضد وزارة الداخلية :))

والسبب عدم المساواة في تطبيق القانون بالأضافة للتطبيق الغبي أو المتعنت يمكن

اللي حصل معايا اني مفيم العربية فامية أخف درجة يعني يدوب مغمق لون الأزاز حاجة بسيطة (عدا الزجاج الخلفي تقيل شوية) ودة طبعا علشان الشمس وعلشان بالليل هواة النور العالي عمال علي بطال ،،، والكلام دة من فترة وعمر ما حد كلمني علية ولو حد علق بتقضي بأي طريقة

لكن من حوالي اسبوعين كنت في القاهرة وظابط رخم صمم يسحب رخصة العربية وكتب في الوصل "زجاج فامية حاجب للرؤية"

اللي اعرفة ان اصلا مفيش حاجة في القانون اسمها مخالفة فامية وحتي لو في فا هو أساسا مش حاجب للرؤية ولا حاجة

وحتي لو فرضنا ان كل كلامي غلط اشمعني الظباط والناس اللي بيتمحكو فيهم مفيمين سوبر دارك وكمان ماشيين من غير نمر علي العربية أساسا لمجرد المنظرة !!!

وبصراحة ندمت جدا اني مشيت من اللجنة بسهولة من غير ما اتكلم او اعمل مشكلة أو حتي اتصل بأي حد لكن للأسف كنت مستعجل

ممكن ؟