ظهور الكثير من المشاكل مع الوكيل وعيوب صناعة جعلتني متشكك وخايف!!

**mohamedhmk** · 17-04-2010 01:11 AM

السلام عليكم ورحمة الله وبركاته

من فترة داخلة على السنة وانا بابحث عن عربية جديدة

وفي الفترة الاخيرة بعد الكثير من البحث والتفحيص وبمساعدة هذا الموقع الرائع استقر اختياري على الرينو لوجان وكنت رايح اخلص واستلم النهاردة بس رجعت في كلامي للاسف بعد ملقيت الكثير من الشكاوى من سوء المعاملة في التوكيل - الي استحوذ على المركز الاول في استفتاء توكيلات السيارات مارس الماضي - ده بالاضافة الى الكثير من عيوب الصناعة الي واجهها اصدقائنا هنا في الموقع (ربنا يعفي عنهم) - مشاكل زي عضة فتيس في المارش (وقولنا محلوله مش مشكله) ، خلل في المساعدين وتغيرعم (ابتديت اقلق)، كهربة العربية فيها مشاكل (عادي مع ان العربية زيرو ) ، والتقيلة بقى بدال البنزين سقط (يا نهار ابيض، ده عيب قاتل) إلى آخره من المشاكل إلي انا بأعتبر ان ولا مشكلة منهم نقدر نقول عليها بسيطة لان من وجهة نظر مالك العربية بتكون كبيرة علشان بيكون هو دافع دم قلبة علشان يشتري العربية وتكون هي مصدر راحة ليه مش شقاء

العربية فعلا بالنسبة لسعرها وكماليتها تعتبر صفقة رائعة ولكن الناس الي بتشتري الفئة دي من السيارات بتكون طفحت الدم زي حلاتي علشان نجيب تمنها فانتم اكيد متخيلين القهرة الي الواحد بيبقى فيها لما يلاقي ان الحاجة الي تعب علشان يجبها فيها عيب حتى لو كان بسيط من وجهة نظر البعض، مع ان فيه عيوب قاتلة انا سمعتها وحتى اذا التوكيل صلحها برده بيفضل احساس الندم والالم موجود.

سوق السيارات في مصر فعلا سوق محير والمستهلك المصري فيه اضعف من في دائرة هذا السوق.

رينو شركة عريقة لكنها عبر السنوات تنقلت عبر اكثر من وكيل ، وهذا على الصعيد المصري يعتبر عدم استقرار.

بشهادة المستخدمين التقفيل المغربي احسن من التقفيل المصري ، ولكن العربيات الي في نفس الفئة المتقفلة في مصر مفيهاش كم الشكاوى والتعليقات الي موجودة في اللوجان. ده غير ان العربيات الي متقفلة في مصر 80% من مكوناتها بتكون كوري، ماليزي، صيني، تيواني - فالمكون المصري ممكن يقتصر على شوية مفصلات - صواميل - فرش إلخ ... من الاشياء الغير مؤثرة على أداء السيارة كسيارة الهدف منها الاول هو الانتقال من مكان لمكان في سهولة ويسر. واكيد المصنع المغربي حديث جدا نسبيا للبلاد الي انا ذكرتها والي بقلها سنين في سوق السيارات.

أنا حاسس انه مبدأ "الي نعرفه احسن من الي منعرفوش" هو المبدأ الأنجح في مصر حيث ان ده مبدء البلد ككل في جميع مناحي الحياة، علشان كده بدأت الكفة عندي تميل الي المركات الاقدم عمرا في مصر الي في نفس الفئة السعرية - والي انا عارف ان فيها مشاكل ولكن مش بنفس حدة المشاكل الي طلعت مع اللوجان - طيب نقطة التوكيلات؟ انا شايف ان بقت هي هي والواحد المفروض "في مصر" يشوف التوكيلات الاكبر في حجم الاستثمار والانتشار والقوة في السوق والقدم ، ده بصراحه الي انا شايفه وحاسه بعد الفترة الطويلة من البحث في السوق المصرية.

أنا حبيت أفكر معاكم بصوت عالي علشان كلنا نستفيد من بعض لان دي روح الموقع هنا الي فيه ناس فاهمة ومحترمة كتير

انا مش باقارن مركات ببعض ولا توكيلات انا باتفكر في مشاهدتي لسوق السيارات المصرية وحاله وقد ايه عنصر القدم والاسم الرنان مهم فيه جدا

تقبلوا تحياتي لقسم مالكي اللوجان وشكرا جزيلا على المعلومات القيمة الي عرفتها منكم ولكني تراجعت عن قرار شراء هذه السيارة للاسباب الي ذكرتها فوق ولقلة مواردي المالية.

ربنا يباركلم في سيارتكم والمشاكل كلها تتحل والدنيا تبقى تمام معاكم ان شاء الله

تحياتي للجميع

**frhateg** · 17-04-2010 01:35 AM

تحياتي اخي محمد
طبعا كل واحد وله وجهة نظر ووجهة نظرك وصلت لي . لكن احب اقول لك ان معظم المشاكل اللي ملاك اللوجان بيتكلموا عنها مشاكل فردية يعني مش كلهم . يعني بدال البنزين مسقطش غير عند واحد بس مش 10 او 20 . انا معايا العربية ما شاء الله من 2 ديسمير يعني اكتر من 4 شهور و الحمد لله عامل بيها 4 آلاف كيلو و رحت عملت صيانة الأف في التوكيل و مبسوط منها و هذا فضل من الله . و علي فكرة العربيات دي حظوظ ممكن تجيب مرسيدس فوق النصف مليون و متقعدشي معاك اقل من سنة و تظهر فيها عيوب متلقهاش في اقل العربيات . وفيه واحد معاه مرسيدس 230 ماتورها فوت و هي في الضمان و التوكيل غلبه .و قصته معروفه في المنتدي . وحتي قطع الغيار برغم من جودتها و الضمان اللي عليها ففيه احد الأعضاء بشرنا بان سعرها نزل النصف فيارب ده يحصل و تتحل اكبر مشاكل اللوجان و التوكيل يفكر صح في مصلحة عملائه .

**mohamedhmk** · 17-04-2010 01:43 AM

المشاركة الأصلية كتبت بواسطة frhateg

تحياتي اخي محمد
طبعا كل واحد وله وجهة نظر ووجهة نظرك وصلت لي . لكن احب اقول لك ان معظم المشاكل اللي ملاك اللوجان بيتكلموا عنها مشاكل فردية يعني مش كلهم . يعني بدال البنزين مسقطش غير عند واحد بس مش 10 او 20 . انا معايا العربية ما شاء الله من 2 ديسمير يعني اكتر من 4 شهور و الحمد لله عامل بيها 4 آلاف كيلو و رحت عملت صيانة الأف في التوكيل و مبسوط منها و هذا فضل من الله . و علي فكرة العربيات دي حظوظ ممكن تجيب مرسيدس فوق النصف مليون و متقعدشي معاك اقل من سنة و تظهر فيها عيوب متلقهاش في اقل العربيات . وفيه واحد معاه مرسيدس 230 ماتورها فوت و هي في الضمان و التوكيل غلبه .و قصته معروفه في المنتدي . وحتي قطع الغيار برغم من جودتها و الضمان اللي عليها ففيه احد الأعضاء بشرنا بان سعرها نزل النصف فيارب ده يحصل و تتحل اكبر مشاكل اللوجان و التوكيل يفكر صح في مصلحة عملائه .

طبعا انا معاك في كل كلمة قولتها ، وانا على فكرة مش بقلل من اللوجان دي عربية شديدة جدا، كل الحكاية اني مش عايز اجيب حاجه تتعبني مع اني مقتنع تماما بانها مسالة حظ وتوفيق من عند ربنا - لكن اهو الواحد بيحاول يشوف اقل نسبة خسارة فين

وربنا يباركلك في عربيتك ويحرسها وتعمل بيها 1000000 كيلو، بس ساعتها هتعمل صيانة المليون فين؟

**ahmedbakr50** · 17-04-2010 02:06 AM

حضرتك بتكلم على حالات فردية
وأنا معايا العربية وبفضل الله تمام أوى

**mohamedhmk** · 17-04-2010 02:10 AM

المشاركة الأصلية كتبت بواسطة ahmedbakr50

حضرتك بتكلم على حالات فردية
وأنا معايا العربية وبفضل الله تمام أوى

انا عارف يا استاذ احمد انها حالات فردية انا مش بعمم - بس الموضوع يقلق من الجانب المادي لان لو لا قدر الله فيه حاجه لازم تكون عامل حسابك على مبالغ محترمة مع الرينو

وربنا يباركلك في عربيتك ويحفظهالك

**ahmedbakr50** · 17-04-2010 02:18 AM

لا تقلق
الضمان 3 سنين وتوكيل محترم يعنى مافيش أى داعى لأى خوف

**amr.elsayed** · 17-04-2010 02:18 AM

المشاركة الأصلية كتبت بواسطة mohamedhmk

انا عارف يا استاذ احمد انها حالات فردية انا مش بعمم - بس الموضوع يقلق من الجانب المادي لان لو لا قدر الله فيه حاجه لازم تكون عامل حسابك على مبالغ محترمة مع الرينو

وربنا يباركلك في عربيتك ويحفظهالك

توكل على الله يا باشا واشترى شيفورليه لانوس فهى الاكثر مناسبة ليك وقطع غيار رخيصة
ولو ظهر معاك اى شيئ حيتحل بمبالغ زهيدة
لكن اللوجان كسيارة لا غبار عليها

**mohamedhmk** · 17-04-2010 02:33 AM

المشاركة الأصلية كتبت بواسطة ringoo

توكل على الله يا باشا واشترى شيفورليه لانوس فهى الاكثر مناسبة ليك وقطع غيار رخيصة
ولو ظهر معاك اى شيئ حيتحل بمبالغ زهيدة
لكن اللوجان كسيارة لا غبار عليها

الف شكر لحضرتك على النصيحة الغالية

وربنا يبارك لحضرتك ويحفظك

تحياتي

**waelgabr** · 17-04-2010 02:59 PM

على فكرة أنا لسه مستلم إمبارح و ظهر معايا شوية عيوب زي لمبة البيبان إللى شغالة على طول
نور العربية ( الإشارات ) ما بتنورش مع قفل و فتح العربية بالريموت و الكاوتشة إللى تحت فرامل اليد مقطوعة و وواقعة جوه و حته في فرش كرسي السواق مش مظبوطة بس ده كله لا يذكر جنب مشاكل العربيات إللى كل يوم بتسمع عنها في الجرايد ثانيا و ده مهم جدا أنا لما إستلمت العربية حمدت ربنا إني ماجبتش فيرنا أو لانوس أو أفيو أنا ركبت التلاتة و سقت الإتنين الأوليين في سفر و كتير و جوه البلد ، الأوروبي حاجه تانية خالص فعلا حاجة تانية خالص .
عامة حاول تجرب كل العربيات إللى بتقارن ما بينها و ياريت يبقوا موديل واحد أو قريبين من بعض و ربنا يكرمكم بالصح إن شاء اللة .

**ahmadalsattar** · 17-04-2010 03:35 PM

المشاركة الأصلية كتبت بواسطة waelgabr

على فكرة أنا لسه مستلم إمبارح و ظهر معايا شوية عيوب زي لمبة البيبان إللى شغالة على طول
نور العربية ( الإشارات ) ما بتنورش مع قفل و فتح العربية بالريموت و الكاوتشة إللى تحت فرامل اليد مقطوعة و وواقعة جوه و حته في فرش كرسي السواق مش مظبوطة بس ده كله لا يذكر جنب مشاكل العربيات إللى كل يوم بتسمع عنها في الجرايد ثانيا و ده مهم جدا أنا لما إستلمت العربية حمدت ربنا إني ماجبتش فيرنا أو لانوس أو أفيو أنا ركبت التلاتة و سقت الإتنين الأوليين في سفر و كتير و جوه البلد ، الأوروبي حاجه تانية خالص فعلا حاجة تانية خالص .
عامة حاول تجرب كل العربيات إللى بتقارن ما بينها و ياريت يبقوا موديل واحد أو قريبين من بعض و ربنا يكرمكم بالصح إن شاء اللة .

مبروك عليك اللوجان
انا مستلم من حوالى شهر ما فيش عندى عيب من اللى حضرتك قولتهم غير موضوع البلاستيكه اللى بتاعت فرامل اليد لكن اجمالا العربيه ممتازه معايا فى كل الجوانب الى الان و قيادتها ممتازه