عفشة ابيزا 1994

**Ahmed Mubarak** · 17-04-2010 05:13 PM

السلام عليكم
اخوانى كنت عايز اظبط عفشة العربية هى سيات ابيزا 1994 راكب عليها مكنة جولف 3 1600 سى سى وجنوط 16
المهم روحت لواحد بتاع عفشة معرفة قالى هفور العفشة كلها ورا وقدام وهنشوف اية سليم يركب واية بايظ يتغير مش عارف هل كدة مظبوط ولا لا
لو ممكن اعرف سعر قطع ومكونات العفشة جديدة - استيراد واية المفروض يتغير فيها واية ميتغيرش
شكرا

**tareksakr** · 17-04-2010 10:53 PM

العفشجي من غير ما يفك بيقدر يعرف حالة العفشة عامة سواء حالة المساعدين الخلفي أو الامامي وحالة البطاحات وعلبة الدركسيون وبارات الطرف ممكن تروح لوحد تاني وتسأله العفشة عندك محتاجة ايه وعموما انت بتستكي من ايه في العفشة

**dragon_devil** · 18-04-2010 01:14 AM

المشاركة الأصلية كتبت بواسطة m_o_b_i

السلام عليكم
اخوانى كنت عايز اظبط عفشة العربية هى سيات ابيزا 1994 راكب عليها مكنة جولف 3 1600 سى سى وجنوط 16
المهم روحت لواحد بتاع عفشة معرفة قالى هفور العفشة كلها ورا وقدام وهنشوف اية سليم يركب واية بايظ يتغير مش عارف هل كدة مظبوط ولا لا
لو ممكن اعرف سعر قطع ومكونات العفشة جديدة - استيراد واية المفروض يتغير فيها واية ميتغيرش
شكرا

دة كدا بتاعت بليلة حضرتك مش فاهم وعاوز يفكك العربية كلها عشان يعرف ويخليك تدفع كتير جدا ويقولك انتة شايف الشغل كان عامل ازاى نصيحة شوف حد تانى بيفهم والناس تعرفة وبتتعامل معاة من اصحابك او اهل المنطقة عندك

**Ahmed Mubarak** · 18-04-2010 11:18 AM

المشاركة الأصلية كتبت بواسطة tareksakr

انت بتستكي من ايه في العفشة

السلام عليكم
العربية لما اخد مطب بحس ان العربية ناشفة مش ذى العربيات الجديدة بتاخد المطب ومتحسش ان فى حاجة ولما امشى بسرعى ويقبلنى حاجة ذى المطب (جزء عالى بس مش قوى ) اللى قاعد ورا بيطلع بيسلم على السقف وينزل ولما امشى فى حتة مكسرة العربية بتترج وتتهز زيادة عن اللزوم والمفروض العربية دى مش كدة
على فكرة انا نسيت اقول ان العربية متهبطة من ورا قوى قوى
جزاكم اللة خيرا على الرد والاهتمام

**ehab_mansour** · 18-04-2010 12:21 PM

أولا انت محتاج عفشجي بيفهم كويس يركب العربية وهو هيعرف ايه اللي فيها من غير ما يفك كل حاجه
ثانيا عشان تظبط العربية صح لازم ترجع العربية لوضعها الاصلي يعني تظبط موضوع التهبيط ده وتشوف ايه اللي مهبطها وتغيره (سوست ولا مساعدين ....)
وربنا يوفقك

**Ahmed Mubarak** · 18-04-2010 05:11 PM

المشاركة الأصلية كتبت بواسطة banky

بس اولى يا باشا الموتور دة كام حصان و جيبتو منين

والله انا شاريها كدة بس معلوماتى ان الموتور بتاع جولف 3 لكن كام حصان انا مش عارف
لو ممكن تقولى اعرف اذى هو كام حصان
العفشه الكونى تتكلف كام

**windofchange** · 20-04-2010 04:12 AM

تعرف كام حصان ونزل في عربيات ايه فولكس وسيات وسكودا كل ده تعرفه وموديلات العربيات كمان اللي نزل فيها من رقم الموتور وده تلاقيه في جنب الموتور من ناحيه السواق عالبلوكة اللي تحت العمة وهو 3 حروف انجليزي وممكن كمان تلاقيه علي غطا سير الكاتينة البلاستيك قول الكود ونقلك ان شاء الله النظام ايه
عفشة الكوني علي ماعتقد تخشلها ف1000 او اكتر والله اعلم بس هي بتهبط العربية سنة