((الحمدلله علي كل حال)) : اتقلبت بالاكسل و اتكتبلي عمر جديد

**mynameh** · 17-04-2010 07:10 PM

قبل اي شيء طبعا الحمدلله اني لسة عايش

من حوالي اربع خمس اسابيع طلعت انا و جماعة اصحابي اسكندرية كنت طالع طبعا بالاكسل و معايا واحد جنبي و اتنين ورا و العربية التانية كانت جين 2 نفس العدد تقريبا

و بعد الاستراحة :
انا بطبيعتي مبحبش الشد و الجري بس الراجل بتاع الجين 2 سخني "طبعا حقة مكنتة مكنة محترمة"
لقيتة طار قلت اشد شوية جبت ال 130 و شايفة من بعيد قلت مش مهم اديني شايفة و كنا قربنا نوصل وكنت ماشي علي الشمال و كان الطريق فاضي و مفتوح و مفيش مشاكل و فجأة الاقي عربيتين جنب بعض تقريبا 132 و حاجة شبهها واحد علي الشمال و التانية جنبها و كانو تقريبا ماشين بسرعة 60 كيلو في الساعة " كأننا علي الكرنيش و هو زحمة مش علي طريق سريع " و فجأة الاقي دول في وشي و مجمع تقريبا 130 , 140 . " لحد هنا دا اللي انا فاكرة و متأكد منو"

اللي فاكرة طشاش اني حاولت اخدها من اخر اليمين خالص مع تهدأه بالفرامل رحت بس العربية مرجعتش تاني و ....... " دا اللي فاكرة طشاش "

اما بالنسبة للي سمعتة ان العربية تقريبا مردتش تاني و اللي متأكد منو ان العربية اتقلبت بينا

:::: بعض شهود العيان بيقولوا انها اتقلبت مرتين و البعض الاخر بيقول تلاتة :::: الله اعلم

و كانت النتيجة الأربعة ركاب جميعهم جرحي واحد كان حالة خطرة .. مش اوي يعني بس خطرة .. و الباقي خدوش و كدمات و جروح

لكن العبدلله امتاز عنهم بان رجلي اتكسرت

و تم بيع العربية بعد الحادث فورا و اثناء تواجدي باليوسبتاليا بمباركة الحاج ابويا و اتباعت بحوالي 15 الف من الجنيهات

::::: الخلاصة :::::

1) العربية دي كويسة جدا و امكانياتها كويسة جدا لكن ياريت اللي يركبها و بيحب الشد بلاش يزود عن 100

2) الشد في حد ذاتة مش حاجة حلوة و مبيجيش من وراه اللا وجع الدماغ

3) مهمة اوي : ربك بيسترها كتير مع اللي ممكن يتعظ و يغير من نفسو
اما اللي مش بيتعظ ربنا يسهلو

4) الحمدلله اني لسة عايش

**mahamedaraby** · 17-04-2010 07:17 PM

اولا الف سلامه عليك وعلى اللى كانوا معاك فى العربيه

وانت شكلك اتعلمت الدرس و المشكله اننا بنجرى وخلاص طيب هل الطريق يساعد هل امكانيه العربيه مساعده هل السواق متحكم دى مشكلتنا واللى للاسف بيروح بسببها ناس كتير والمشكله الاكبر منظر الاهل بعد الحادثه منظر بشع يارب ما حد اهله يشوفه وللاسف انا شفته على الطريق الرحاب بعد حادثه بشعه والاهل لما وصل مكان الحادثه

طبعا حمد لله على سلامتك انت واصحابك وارجو ان يكون الموضوع ده عظه للناس

**mynameh** · 17-04-2010 07:22 PM

الله يسلمك و فعلا دة درس و الواحد اتعلم مع اني اساسا مش من هواة الشد لكن اقول اية
و ياريت فعلا الناس تتعظ

**ابو فرح** · 17-04-2010 07:27 PM

الف سلامه عليك وعلى اللى كانوا معاك

**د.محمود صلاح** · 17-04-2010 07:27 PM

حمداً لله على سلامتك اولاً واخيراً ,, وربنا يقينا شر السرعة بدون داعي ,, وأحسن والدك صنعا ببيع العربية وهي كده عشان وجع الدماغ والقرف

**eagle2009** · 17-04-2010 07:39 PM

حرام عليك تعمل كده فى نفسك وفى الناس اللى حواليك
الطريق اخره 100 كيلومتر ساعة ، تديها 140
المفروض انك تتعامل مع الطريق باحتراس ، فيه ناس لسه مش بتسوق زى سعادتك وفى ناس ممكن تكون على الشمال وفجاة حصل مشكلة خليته يهدى ، الاحتراااااااس واجب
ممكن تاذى غيرك بسرعتك المتهورة دى ، وتيتم اطفال او اسر وساعتها مش هتسامح نفسك
وارجوا ان الوالد قبل مايجيب لك العربية الجديدة ، بتأكد ان سواقتك بقت هادية
معلش اذا كان كلامى قاسى شوية عليك
لكن اللى بيحبك يقول لك فى وشك
والف سلامه
تحياتى

**mostafa55** · 17-04-2010 07:51 PM

اولا الحمد لله على سلامتك وسلامة اللى كانو معاك وفداك 100 عربية
واهم حاجة انكم لسة عايشين عشان لا قدر الله لو كان حصل حاجة لحد حتبقى مشكلة وممكن تتعقد من السواقة بسبب الشعور بالذنب

المشاركة الأصلية كتبت بواسطة mynameh

وكنت ماشي علي الشمال و كان الطريق فاضي و مفتوح و مفيش مشاكل و فجأة الاقي عربيتين جنب بعض تقريبا 132 و حاجة شبهها واحد علي الشمال و التانية جنبها و كانو تقريبا ماشين بسرعة 60 كيلو في الساعة " كأننا علي الكرنيش و هو زحمة مش علي طريق سريع " و فجأة الاقي دول في وشي و مجمع تقريبا 130 , 140 .

اولا انا مش بحب الشد عشان لا الشوارع ولا العربيات ولا حتى الناس اللى سايقة تساعد على كدا

بس ليا ملاحظة على الناس اللى بتبقى سايقة وكإن مافيش غيرها فى الشارع

يعنى ايه 2 يبقوا ماشيين اقل من سرعة الطريق وجنب بعض و اقصى الشمال ( سادين السكة ) ولا مراعة لحد عنده ظروف او عاوز يعدى لأى سبب

دول لو ماشيين 100 كان ممكن تلحق تقلل السرعة بدون حوادث

عموما قدر الله وما شاء فعل و الحمد لله على سلامتك