السلام عليكم..
الفترة اللي فاتت دي كانت المساعدين عندي بعافية شوية.. و بقوا خفاف جدا.. وفي نفس الوقت بيدبوا و يخبطوا..
قولت مش عايز اركب حاجة ستوك بتاعتها.. عشان مش هتستحمل وخاصة ان العربية فيها جنوط 17..فكرت اركب حاجة ناشفة شوية تكون رياضية..
دورت علي املونرو.. لكن للأسف ملقتش غير جوز واحد بس امامي..و الخلفي مفيش.. مش موجود..
المهم بعد البحث و المشورة.. واخد رأي ناس افاضل كتير.. منهم من المنتدي هنا الاخ الفاضل ايمن مومو.. استقريت علي الكوني.. و توكلت علي الله.. جيبتهم من ارابكوم.. هما موزع معتمد و مستورد..
المهم هاقولكم الموديلات اللي بتركب عليها.. عشان في اكتر من موديل بيركبوا عليها.
82-2488 Sport دول امامي بتوع الباسات.. من موديل 96 لحد 2000
82-2502 Sport دول برضه امامي بتوع الاودي الموديل نفسه بقي من 94 لحد 98
الخلفي بقي..
80-2749 Sport دول برضه الصح بتوعها.. بتوع الموديل ده نفسه.. بتركب من غير اي تعديل.. اما الموديل اللي بعده بقي..
80-2800 Sport ده بتاع موديل 98 لحد 2001 وده بيحتاج تعديل بسيط بتتقصر البطاحة الكاوتش شوية.. و بيتركب طبق اعرض شوية للبطاحة..
بالمناسبة المساعدين دي كلها adjustable يعني ممكن تتحكم في نشوفيه او نعومة المساعد.. بس طبعا الموضوع ده بيتعمل قبل التركيب.. و كل الموديلات دي زيت بس.. مش زيت علي غاز.. و بالتالي ناشفين شوية..
الصح انهم يتعملوا ناعمين علي الاخر.. عشان لو ناشفين هيبوظوا من حفر و مطبات الشوارع عندنا..
النتيجة الحمد لله حلوة جدا جدا.. المساعدين ناشفين شوية لكن ثبات رهيب.. علي الملفات و الغرز.. و الحمد لله..
التركيب كان الجوز الامامي ركبتهم عند فادي.. المهندس اللي باتعامل معاه من زمان.. بس الخلفي عشان كان في تعديل.. عملته عند وشرة اسمها car boys جنب ياسين توكيل اودي و حمدي لادا اللي تحت كوبري التجنيد..
ارجو اني اكون افدتكم..
المفضلات