الفرق بين أفيو 2006 و أفيو 2007؟

**user73** · 21-01-2008 03:16 PM

أولا أود إبلاغ تحياتي لأعضاء هذا المنتدي الرائع
فأنا معلوماتي عن السيارات قليلة وكنت اود شراء سيارة أفيو وكنت متردد بينها وبين عدد من السيارات الأخري, وبعد الإطلاع علي المواضيع الموجودة بالمنتدي إستقر رأيي علي شيفرولية أفيو.
وعند سؤال الوكيل وجدت ان الحجز يستلزم من 3 الي 4 شهور وهي تعتبر مدة طويله بالنسبة لي.
المهم وبدون تطويل قررت أن أشتري مستعمل كسر زيرو...وعند البحث يوم الجمعة الماضي في سوق السيارات لم اجد اي سيارة افيو للبيع ..فلجأت لإعلانات النت وقد وفقني الله في سياره أفيو كوري موديل 2006 عاملة 12000 كم بحالة الزيرو فقط يوجد الخدوش المعتادة في شوارعنا الجميله.
وكان سعرها بعد الفصال 63500 جنيه.
وحيث أنني كنت اريد سياره افيو موديل 2007 ولم اتوفق...فأرجو من أهل الخبرة إفادتي عن الفروق بين الأفيو 2006 و الأفيو 2007 وهل هي فروق في الشكل الخارجي فقط ام في ميكانيكا السيارة ايضا...بمعني هل قطع الغيار واحده في الموديلين ام لا...وارجو افادتي هل السعر جيد ام لا.
وشكرا لكم

**goodwave** · 21-01-2008 04:12 PM

في فرق مهم وهو إن الافيو 2006 إشتغالة والافيو 2007 إشتغالة أكبر منها!!!!

ياعم دي لانوس متخفية في شكل خارجي(فقط) جديد ..... وفر ال 8000 جنية فرق والدوخة والانتظار 3-4 شهور وإشتري لانوس! او فكر في حاجة تانية.... منصور لن يفلح ولن يصدق ابدا ولن يصل حتى لاتقان الكذب مثل غبور! والدليل:

1- إرتفاع سعر الافيو 2000 جنية في اقل من سنة والناس لسة ما أستلمتش
2- تقفيل مصري نص كم وينقصة بعض الكماليات الاساسية مقارنة بالسعر المغالى فية لا يوجد زجاج كهربا خلفي ولا ريموت بالسنتر) في الكاملة
3- مدة الحجز زادت من شهر ونص إلى 3-4 شهور
4- العربية لم يضاف لها شئ جوهري يذكر من ناحية الموتور او العفشة بالرغم من وجودها (اقصد الانوس) لما يقرب من 10 سنوات
5- منصور كان شغال تمام على قد مبيعاتة من فئة سيارات الاوبل وشيفرولية النص نقل..... لكنة الان فتح على نفسة فتوحة عربيات ستنتشر بشدة في السوق المصري ولا أعتقد أنه أعد العدة لصيانة هذا الكم الهائل من السيارات او اضاف مراكز خدمة جديدة
6- اخيرا العربية موجودة وبتتباع في السوق السودا 4-5 الاف جنية زيادة عن سعرها الحالي!!!
7- العربية التقفيل المصري منها بيتباع بنفس سعر التقفيل الكوري......... طب إزااااي؟

شوفت بقى الاشتغاله؟!!!!!!!!!

**running_man** · 21-01-2008 05:34 PM

اللى يقول انها لانوس ما ركبهااااااااش
في فرق تقفيل
و فرق سحب
وفرق توب سبيد
وفرق بسيط فى الثبات
و فرق شياكة
وفرق توكيل

يمكن العيب الوحيد هو استهلاك البنزين عالى سنة

و بصراحة المصرى كدة استهبال فى الأسعار...... غير كلام مش حلو على التقفيل سمعته..

لكن طالما لقيت الكوى امسك فيها باديك و سنانك... العربية دى كفاءه

**amr fahmy** · 21-01-2008 09:19 PM

كلام الاخ Wave خطا و يدل على انه لم يركب السيارة من قبل............., بلاش نفسنة و حقد

**Ahmed Anwer** · 21-01-2008 10:10 PM

المشاركة الأصلية كتبت بواسطة amr fahmy

بلاش نفسنة و حقد

مالهوش لازمة الكلام ده ،،، يا أخي الفاضل ،،

الأخ صاحب الموضوع ،،

لو الأفيو الكوري الشكل اللي بيتجمع في مصر حاليا و اللي كان بيتباع كوري السنة اليي فاتت ،،

يبقي أفضل ،، لأن الشكل بتاع 2006 اتغير بسرعة ،،

صراحة أنا معرفش هل في فروقات فنية اخري غير شكل الفوانيس ، و لا لأ ،،

بس اعتقد الشكل الحالي أفضل لأنه في طريقة للإكتساح و الإنتشار غير الشكل القديم نادر شوية

**user73** · 23-01-2008 09:09 AM

شكرا لكل من قام بالرد
أنا اتصلت امبارح بالتوكيل وكلمت المهندس المختص..وأفادني بالأتي:
1- الافيو 2006 و الافيو 2007 نفس المحرك ونفس قطع الغيار وميكانيكا السياره واحده.
2- الإختلاف فقط في تصميم الشكل الخارجي و الفوانيس و في شكل التابلوه (وانا شايف ان دي مسأله ازواق وبالنسبه لي ماتفرقش كتير قوي).
3- الأفيو 2006 صناعه كوري كامله أما الافيو 2007 من أول شهر 9 فهي صناعة كوري وتجميع مصري...(ملحوظه: الافيو 2007 قبل شهر 9 كانت صناعة كوري بالكامل).
4-كل الأفيو الكوري المرايات مانيوال وليست كهرباء..بينما التجميع المصري تم وضع المرايات الجانبية بالكهرباء.

وفي النهايه بعد قيادة السياره انا بصراحه عجبتني جدا رغم اني كنت متخوف في الاول..وكتير كانوا بيقولولي خليك في الياباني...بس بعد ما سقتها كانت كويسه جدا وفي فرق كبير بينها وبين الدايو من حيث مستوي الفخامه وهي اعلي في ارتفاعها عن الارض وانعم في القيادة..بس علي العموم انا سواقتي كده كده هاديه جدا.
المهم زي ما قلتلكوا في الاول ..انا مش متخصص دي مجرد انطباعات..بس لحد دلوقتي ماحدش قاللي سعرها كده كويس ولا لأ...
وتاني شكرا لكل من قام او سيقوم بالرد.

**user73** · 23-01-2008 09:17 AM

أه نسيت اقولكم ..باركولي أنا اشتريتها خلاص...افيو موديل 2006 جميع الكماليات عامله 12000 كم بحاله الزيرو ماعدا بعض الخدوش البسيطه...بالكاسيت الأصلي ب 63500 جنيه .
وشكرا ليكم تاني...انتو اللي ساعدتوني اختار لما كنت باقراء الموضيع الخاصه بيكم في المنتدي.