الموضوع: أريد أن أشتري سيارة ماتريكس 2008 أو نصيحتكم

كدة يبقي حرام تشتري ماتريكس...لانها هاتتبهدل معاك..
ومتهيالي مافيش حاجة من الجديد هاتستحمل السفر والشغل والطرق الغير ممهدة غير عربية تويوتا هاي لوكس...او عربية شاهين..

و الميتسوبيشى ديه سعرها كام؟

هات شاهين استعمال الشرقية شوارعها ذى الزفت

اية يا جماعة انتو عايزين تركبوا الراجل نص نقل

الإخوة الأعزاء المحترمين المشرفين وأعضاء المنتدى
تحياتي لكم جميعا (هذه أول مشاركه لي في المنتدى
أود شراء سيارة جديدة على أن توفي لي الأغراض والمواصفات اللآتيه
- أعمل مهندس إنشاءات
- السيارة ستعمل على طرق بها مطبات (محافظة الشرقية) الى حد كبير وطرق ترابيه (مش كتير)
- ستعمل يوميا حوالي 120 كم
- أود شراءها بالقسط (معي منها 20 ألف)والباقي قسط
- أول مرة أشتري فيها سيارة (الخبره ض ج )
- حياكم الله وفي انتظار نصائحكم
وآسف للأسئلة الكثيرة وشكرا لكم

أولا أهلا بحضرتك
أنا بلدياتك من الزقازيق
و عندنا المطباط عادية مش للدرجة بس يمكن عندك حاجة تانية
و علي فكرة بلاش ماتريكس مش بتاعت بهدلة
يعني شوف مثلا الياريس او اللانسر الشكل القديم يعني عفشة عفية و موتور صحته طويلة و شياكة بردو

انما لو هتنزل للانوس او الفيرنا يبقي اللانوس عشان بحس انها بتستحمل البهدلة جامد
انما الفيرنا 1600 موتور جامد موت

انما لو مش يهمك الرفاهية و الراحة و الشكل الجديد و تستحمل ضيق الصالون و فقره يبقي شاهين..........

عموما شوف الفئة اللي تناسبك و قولنا و نفكر سوا

فى رايى حرام تجيب ماتريكس لانها هاتتبهدل معاك، انت عايز عربيه تتحمل المشقات فانا فى رايى تكون شاهين 1600 وياريت تحاول تتصرف فى اى مبلغ وتجيب واحده مستعمله كاش موديل جديد يعنى مثلا من 2003 وطالع او تاخد قرض من البنك وتجيب مستعمله للأسباب التاليه:

1) طبعا زى ما معروف الشاهين عاليه وعفشتها جامده جدا تتحمل الطرق الصعبه دى

2) فيها باور وتكييف وسنتر يعنى اكتر الكماليات اللى ممكن تحتاجها

3) هاتكون ارخص من الزيرو وفى نفس الوقت مش هاتحس ان قلبك بيتقطع وانت بتحك فى عربيه وللا بتاخدلك زلطه فى الزجاج وده وارد جدا جدا خصوصا انك بتقول انك لسه فى بداياتك

4) استهلاكها للبنزين اكتر من ممتاز

5) قطع غيارها ببلاش وموجوده فى كل حته

6) شنطتها واسعه (اعتقد هاتكون اوسع من الماتريكس)

طبعا ممكن برده تجيب دوجان او ريجاتا بس حاله كويسه .... وربنا يوفقك وابقى طمنا