مشكلة غيربة مش عارف سببها ؟؟؟؟؟

**das1328** · 18-04-2010 09:23 PM

السلام عليكم بعد التحية
عندي يا إخواني عيب غريب في عربيتي الجنتو 2010
الباب بتاع السواق والبابين إلي ورا بيفتحو أول تكة لوحدهم والعربية ماشية وحصلت مرات كتيرة مش مرة أو إثنين , حصلت معايا المشكلة ده قبل ما أعملها صيانة الألف وقلت للتوكيل عليها وعلى كلامهم إنهم صلحوها بس للأسف رجعت المشكلة ده للظهور مرة تانية ياترى المشكلة ده حصلت مع حد منكم يا إخواني ؟ طيب إيه حل المشكلة ده ؟

**mahmoud_magdy** · 18-04-2010 09:34 PM

حضرتك متأكد ان ده صوت التكه دي فتح ابواب ؟؟
في اوبشن في العربيه

وهو كالاتي
اول ما حضرتك تركب عربيتك وتتحرك مع اول دوسة فرامل اقفال الابواب بتقفل اوتوماتيك
وبتسمع صوت تكه بتدل على ان اقفال الابواب اتقفلت

لو كلامي ده مبيحصلش عند حضرتك وبيحصل اللي بتقول عليه فعلا لازم تروح للتوكيل طبعا
عشان دي مشكله كبيره جدااا
ازاي امشي والباب مفتوح
هو في حد بيمشي بنص هدومه ؟؟

**Raul_7** · 18-04-2010 11:01 PM

إزاي الأبواب بتفتح أول تكة لوحدها؟! ده كلام غريب جدا!!

**ahmed_h_g** · 19-04-2010 12:06 AM

ازاى ؟؟؟
ياريت توضيح .

**Galilioz** · 19-04-2010 01:58 AM

بيتهيالى انت ممكن يكون قصدك على السنتر لانه بيقفل لاوحده وانت ممكن تكون تشابه عليك النقطه دى

**das1328** · 20-04-2010 12:25 AM

musiccairo وبقية إخواني إلي شاركوني في الحوار هوضحلكو أكتر شوية
طبيعي في العربية أوبشن إن الأبواب تقفل السنتر وإنت بتنزل الهاند بريك مع دوسة الفرامل في الطلعة الأولى للعربية
ده أوبشن طبيعي مفهوش أي مشكلة والسنتر ده مش بيفتح خالص طول ما العربية ديرة وبيفتح بس لما تبطل العربية
المشكلة بقى
مش دلوقتي يا جماعة أبواب العربية بيكون ليها تكتين في القفل أول تكة بيكون الباب بيلق ونور الصالون ونور الباب إلي في الطبلون منور التكة الثانية نور الصالون ونور الطبلون بيطفو وبيكون ساعتها الباب مغلق بإحكام
أنا عندي الباب بيفك من التكة الثانية لوحده كده من غير أي سبب ونور الصالون بينور وعلامة غلق الباب إلي في الطبلون هيه كمان بتنور

أرجو إني أكون وضحت أكتر وأرجو منكم الإفاده وشكرا ليكم جميعا

**ahmed_h_g** · 20-04-2010 08:49 AM

مشكله حلها بسيط
عارف الكلاتش اللى بيمسك فى كالون الباب لما بتقفل الباب (الحلقه الحديد)
الجزء ده مربوط بمسمارين أو ثلاثة مسامير
كل اللى هيحصل المسامير ديه هتتفك والكلاتش ده هيخرج لبره شويه والمسامير تتربط تانى
ممكن تعملها خارج التوكيل عند أى حد بتاع كوالين ومش هياخد أكتر من 10 دقائق .