الزجاج الأمامى ( البرباريز ) لقيته واكل طوبة محترمة !!!!!

**NeeMoo** · 19-04-2010 03:02 AM

السلام عليكم ورحمة الله وبركته
مساءات الخير على كل الشباب

بدون مقدمات كبيرة أنا هحاول كل فترة إن شاء الله أطرح مشكلة قابلتنى فى عربيتى ( أسترا 2005 سيدان ) والحل اللى عملته علشان نتناقش ونستفيد .

يوم السبت وأنا راجع من الشغل ومسافر حوالى 500 كيلو متر علشان أوصل القاهرة وأخد عربيتى من الجراج ومكمل سفر بيها ..... لقيت السايس بيقولى هو حضرتك صاحب الأوبل الزيتى ..... قلتله أيوه خير فى حاجة ..... قالى أصل فى شوية عيال رموا طوب على العربية وكسروا الزجاج الأمامى ..... مسكت أعصابى وقلتله بكل هدوء .... خلينى أشوف العربية الأول
وشوفت العربية لقيت الزجاج الأمامى مخبوط من المنتصف بالضبط وطبعا خلى الزجاج ميسواش شلن .... وكمان لقيت خبطة بس صغيرة حوالى 2 سم فى القايم اللى شمال السواق .
صاحب الجراج طلع زوق وقالى إنه هيتحمل التكاليف كلها
عمل بلاغ فى القسم اتهم فيه الشباب اللى رموا الطوب .
وسبته أنا بعد كده بدور على حد يغيرلى البرباريز
كلمت عبد الله أولا رد عليا واحد تانى .... وسألته عن حد بيركب قزاز للعربية الأوبل
قالى فى واحد فى كفر طهورمس اسمه أحمد أوبل وخدت النمرة وكلمته ..... قالى والله مش عندى لكن فى واحد اسمه الحاج فؤاد شاكر فى أول فيصل عند البرباريز ده .
كلمته طبعا وسألته عن السعر قالى مش بيدى أسعار فى التليفون .
كلمت بقية أصحابى دلونى عى واحد اسمه الحاج دقدق فى شارع شهاب فى المهندسين .
قالى البرباريز بالتركيب هيكون بـ 350 جنيه .
قلتله تمام أنا جايلك دلوقتى حالا .
وفعلا روحت ليه .... البرباريز الأصلى كان إنتاج د/ جريش ومفيش عليه علامة الأوبل .... لكن لقيت عنده 3 أنواع
الأول DOK وكله فاميه أخضر .... والتانى DOK بس فيه شماسه من فوق بعرض 10 سم بس فاميه .
وبعدين لقيت النوع التالت DOK فيه الشماسه الفاميه وعليه علامة الأوبل .
اخترت التالت على بركة الله وبدأت الصنايعية .... شغل ممتاز .... ونظيف ... وطبعا فاهمييين .
ماخدش الموضوع أكتر من نص ساعة بالضبط .
وقالى بلاش تجيب ميه على البرباريز لمدة يومين علشان السيليكون يلزق .
وكانت التكلفة 340 جنيه تمن البرباريز بالتغيير .... و10 جنيه بقشيش للصنايعية .
والحمد لله قدر الله وما شاء فعل .
وسافرت تانى يوم بيها الحمد لله .
للعلم صاحب الجراج دفع الفلوس كلها ...بس أنا خليته يدفع 250 وأنا دفعت 100 علشان أشاركه .... والله طلع راجل محترم .
يا رب احفظ عربيانا من الطوب الطائش ومن كل شر .
سلام يا شباب .
الشاى للشباب يا عثمااااااااااااااااااااان

**tamertamer** · 19-04-2010 04:48 AM

على فكرة انت كان ممكن تروح مصنع جراش قلى فى العبور كنت هتعملة بنص الثمن وهيتعملك شغل بجد كنت هتتفرج على حجات مشفتهاش ابل كدة وبيديك ضمان على ما بسمع كمان
وربنا يعوض عليك ويحفظلك على الجديد

**abdelaziz-waleed** · 19-04-2010 05:02 AM

المشاركة الأصلية كتبت بواسطة tamertamer

على فكرة انت كان ممكن تروح مصنع جراش قلى فى العبور كنت هتعملة بنص الثمن وهيتعملك شغل بجد كنت هتتفرج على حجات مشفتهاش ابل كدة وبيديك ضمان على ما بسمع كمان
وربنا يعوض عليك ويحفظلك على الجديد

فين بالظبط المصنع ده يا تامور

**hostook** · 19-04-2010 07:45 AM

الف مبروك يا باشا على البرباريز الجديد وربنا يكفيك شر الطوب وإلى تامر فين المصنع ده يا ريت العنوان ياباشا لاني عامل فيل وارد كاتب فيه شوية ارقام ميكانيكية وعاوز اطعمه بموضوع مصنع الزجاج ده الأمر ميسلمش وشكراً للجميع.

**NeeMoo** · 19-04-2010 12:03 PM

ألف مليار شكر للشباب اللى ردت
وسؤالى يا تامر ..... فين عنوان أو تليفون مصنع جريش اللى فى العبور
علشان تبقى معلومة معروفة للناس كلها
وشكرا مرة تانية

**Ahmed A Rahman** · 19-04-2010 12:19 PM

مصنع دكتور جريش اللي في العاشر من رمضان بسمع عنه كلام خيالي من زمان

واحد صاحبي راحه وغير ازاز ال 132 الوراني ب 60 جنيه في 10 دقايق

والعمال كانوا شغالين بما يرضي الله ومن غير ومش مستنيين بقشيش
وبيقولي انه كان واقف وميكروباصات واتوبيسات وملاكي كله جاي يغير الازاز بتاعه في سرعة ونظافة

بس مش متاكد ان يكون عنده تريبلكس ولا لأ؟؟؟