ياجماعة حيرتونى اشترى ولا لأ ؟

**yasso77** · 22-04-2010 01:25 PM

بص يا باشا انا كان معايا a 516 موديل 2008 كانت عربيه حلوه علي قد فلوسها بس كان فيها مشاكل واللي يقولك غير كده يبقي بيضحك عليك او عايز يصبر نفسه علي مصيبته
المهم قررت ابيع العربيه بعد سنه من شرائها وكنت هاجيب ام 11 لكن بعد ما بعتها لقيت ان ال 76000 تمن ال ام 11 ممكن يجيبو النترا مانيوال كسر زيرو
وهوا ده اللي حصل انا معايا حاليا النترا 2008
وحقيقي لما تركب العربيه دي او اي عربيه غير الصيني هاتحس انك كنت راكب تكتوك وخصوصا لو كانت النترا
والله علي ما اقول شهيد

**meedoo69** · 22-04-2010 01:46 PM

هيما باشا انا معاك قلبا و قالبا العربيه زى الفل 10000 كم الحمد لله مفيش مشكله جوهريه

**yasso77** · 22-04-2010 01:51 PM

علي فكره انا قصدي انك لما تركب عربيه اسبيرانزا كانك راكب تكتوك
ده يمكن التكتوك احسن

**yasso77** · 22-04-2010 01:53 PM

اوعي تجيب صيني الا لو كنت عايز ترمي فلوسك في الارض
ياراجل حرام عليك شيل فلوسك لعيالك بدل ما تدفعهم في عربيه صيني

**hemaa_82** · 22-04-2010 01:55 PM

و الحمد لله اللي كرمني بواحد تاني زي samehsalem علشان مبقاش بوق دعائي لوحدي ... و يبقي اللي هيدعي يدعي دعوة عليا و دعوة عليه لو سمحت

:) بجد يا اخوانا انا مش قادر امسك نفسي من الضحك و مش متخيل اللي انت بتقولوه ..

زي اللي كان بيقول :-

يا باشمهندس هيما انتا ياباشا لو المقلبه عند البيت بتاعك انتا برده مش هتيجى اى مقابله خالص وانا ياسيدى مبزعلشى

؟؟؟؟؟؟؟؟

طب يا استاذ عماد هل انت عارف ظروفي ؟؟؟؟ انا علي فكرة بنتي مكملتش شهر غير من كام يوم و في يوم المقابلة كنت لسه بلبس بس للاسف مراتي تعبت شوية .. و مكنش في غيري يقعد مع البنت ....
المفروض ان انا انزل واسيبهم؟؟؟؟؟ مع كامل احترامي , الراجل اللي يبدي اي حاجة علي مسؤليات بيته يبقي ميعرفش اولوياته و ميستهلش كلمة راجل اساسا
و اظن دكتور احمد كلمني و اعتزرتله لاني كنت هواديهم للدكتور ...يبقي لو في عراف له من علم الله و الغائب ان المقابلة لو تحت بيتي مش هحضر يبقي ده نقوله سبحان الله ...

و برضه علشان التوضيح :-

(... ازعل بقي و تزعل و شغل الاطفال )

ياباشا احنا مش فى روضه ومفيش شغل اطفال ولا حاجه انتا راجل وانا ياسيدى طفل زى منتا بتقول وشكرا ليك يباشا

الرد الجميل و كأني بقول ان سعدتك لا قدر الله طفل ..... اظن كان الرد ده علشان كنت حضرتك بتقولي قبلها بدون زعل فكان ده ردي اني بقولك اني مبزعلش لان احنا مش اطفال و مكنش المقصود ان حضرتك طفل لان انا اساسا معرفش حضرتك زعلان ولا لا و معرفش اساسا زعلان ليه

انتا راجل عملت دعايه لابو الفتوح تيجى بملاين

انا ماليش فيه "ابو الفتوح يعني" انا بشرح ببساطة شديدة الواقع مابيني و بين عربيتي.. و اكيد شاهد الزور في بئس المصير .. فحسابي عند ربنا ....
ده غير ان انا لما جبت العربية كنت متوكل علي الله تماما و عملت استخارة فالحمد لله ربنا كرمني .... يجي حد ربنا مايردش يباركلوا ..طب انا اعمل ايه؟؟؟

هل لما يجي حد يسألني علي العربية اقول زبالة مثلا بناء علي تجربتك و انسي ان انا معايا العربية؟؟؟؟؟

انا لما حد من زملائي بيسألني بقوله هيه معايا زي الفل بس في ناس علي النت بتقول فيها كذا و كذا"بعد ما بدأتوا تشتكوا" انما برده بقوله انا معايا فلة ....

و مش هغير كلامي علشان حد ...

و انا اسف للي فهمني غلط ...

و حسبي الله و نعم الوكيل في اللي بيظلمني ..

و برضه احنا اخوات ..

و اتمسوا بالعافية

**yasso77** · 22-04-2010 01:56 PM

دا انا شوفت الويل وشربت المر علي بال ما اتخلصت من عربيتي ال 516 وخسرت فيها دم قلبي وبعتها ب 49000 وكانت عامله 19000 كيلو
يا راجل بلا صيني بلا قرف هوا في عربيه لسه زيرو بتزييق في المطبات ولا بتغيير تيل الفرامل الخلفي قبل الامامي
والله دي عربيات تشوف معاها العجب زي افلام خالد يوسف كده

**hemaa_82** · 22-04-2010 02:57 PM

[QUOTE=medoragab;3872581944]

المشاركة الأصلية كتبت بواسطة hemaa_82

انا بعتلك رسالة يا أخ هيما وقلتلك انا محمود ودة رقمي واعدت ثلاث ايام ارن عليك بعديها و للأسف بردة لم ترد ولم تتصل بيا

اكيد كنت كاتب عربي

علي فكرة انا معايا تليفون-من غير متضحك- 8210 انجليزي غير معرب ... ولا بيقرا رسايل عربيي ولا بيشيل اكتر من 10 ارقام missed ..... و اكيد لو كل حد رنلي ولا عتلي رساله من غير معرفه كلمته هيتخرب بيتي .... و والله انا اسف اني متشرفتش بسماع صوتك بس دقني مش قصدي

**SAYD_NASR** · 22-04-2010 05:21 PM

السلام عليكم يا رجالة
الواحد طبعا أول مشاركة ليه ولولا إحساسى بالذنب أنى يبقى عندى حاجة أقولها و أبخل بيها مكنتش شاركت إعتمادا يعنى أن الناس قالت كل حاجة عن العربية سواء سلبى أو إيجابى .. نقطتين ومن أول السطر

أول هام يا رجالة أنا أستلمت العربية ورخصتها يوم السبت اللى فات اللى أتقابلته فيه كان نفسى أحضر المقابلة بس الوقت مسمحش .. يلا خيرها فى غيرها ، العربية عملت معايا 500 كيلو فى مشوار كبير للصعيد و مشوارين لمصر الجديدة .

بالنسبالى دى أول عربية تكون ملكى بس مش أول مرة أسوق ، أنا شغلى بسافر فيه برة مصر كتير و الشركة بتأجرلى برة عربيات فليا خبرة ظريفة مع السيفيك 2008 (أوتو)و الكورولا 2009 (مانيوال)و التيدا(أوتو) و المزدا 3(أوتو) دى عربيات سوقتها لمسافات طويلة فقدر أستخدمها Reference ليا لما أحكم على M11 على أساس يعنى أنها نظريا و عمليا فئات أعلى منها .

المشاكل اللى مش ظريفة اللى قابلتنى لحد دلوقت حاجتين قريت عنهما هنا من ناس فى المنتدى : 1- موضوع تنك البنزين اللى بيعلق و اللى بقيت أنزل من العربية فى البنزينة علشان أفتحة بنفسى وأنا مبتسم لحد م أروح صيانة 1000 و أعمله إن شاء الله..حلوة الدماغ دى

2- تانى حاجة حوار عضة الفتيس فى النقل أول و تانى ، عضة سخيفة و فى ناس قالت أنها بتتصلح فى الصيانة وأنا مبتغاشمش على الفتيس لحد مصلحها إن شاء الله .

غير كده مفيش حاجة ظهرت معايا.

الحقيقة أنا أحب أقول أنى أستفدت من اللى ناس هنا كتبته و علشان كده لقيت أنه واجب عليا أشاركهم ( الناس اللى قالت على عيوب قبلتها و الناس اللى شكرت فى العربية)
حاجة أخيرة أنا قبل ما أشترى العربية كانت جاتلى حمى البحث عن السيارة الكاملة Error- Free ، اللى مشاكلها صفر وبرده فى حدود المبلغ اللى أنا عايز أدفعه بس الحمد لله رجعت للمنطق أن العربيات زى أى حاجة تانية فى الدنيا فيها عيوب ولازم يكون عندك أولويات تحدد على أساسها تشترى إيه و تقدر تتعامل مع عيوبها ولا لأ .

اه صحيح العربية بتكركر معايا لو خفيت رجلى من على البنزين و أنا طالع زى أى عربية مانيوال ودى بالنسبالى حوار تعود على الدبرياش مش أكتر، زائد حته مش فاهمها هو لو العيب البنزين ليه تكركر فى الطلعة بس ولو حطيت حتى بنزين 95 و خفيت رجلى فى الأول مش هاتعمل صوت ؟

**hemaa_82** · 22-04-2010 07:08 PM

المشاركة الأصلية كتبت بواسطة yasso77

دا انا شوفت الويل وشربت المر علي بال ما اتخلصت من عربيتي ال 516 وخسرت فيها دم قلبي وبعتها ب 49000 وكانت عامله 19000 كيلو
يا راجل بلا صيني بلا قرف هوا في عربيه لسه زيرو بتزييق في المطبات ولا بتغيير تيل الفرامل الخلفي قبل الامامي
والله دي عربيات تشوف معاها العجب زي افلام خالد يوسف كده

انا عارف يا عم ..صيني ايه و بتاع ايه ... دول ولا عملو صواريخ و لا دخلوا في كل العالم و لا اي بتاع ... احنا كلنا نبيع العربيات الزبالة دي و نلم من بعض و نجيب حتة جاجور و كل واحد ياخد لفة و نرجعها للمعرض و ناخد فلوسنا و نقعد في البيت نقزز لب و نحلف ان احنا كان عندنا جاجور و معجبتناش و رجعناها.....

عربيات تشوف معاها العجب زي افلام خالد يوسف كده فيها و فيها .... علشان قلة الضمير اللي عندنا مش اللي عند الصينين للاسف

**ahmeddarhos** · 22-04-2010 08:17 PM

يا جماعة اهدوا كده وصلوا على النبى...
الموضوع مش عافية.. الراجل محتار و عاوز نصيحة من ملاك العربية...
و كل الملاك اتكلموا معاه بكل امانة عن العيوب و المميزات....
الموضوع هنا مش مين مع الصينى ومين ضده... أكيد كل اللى اشتروا العربية مع الصينى..
و أنا أولهم... ماينفعش نبقى احنا مابنعرفش نعمل حاجة خالص و نتريق على بلد فيها صناعة محترمة بدليل ان العالم كله بيعملهم ألف حساب و بقوا أكبر منتج للسيارات فى 2009..
و الكلام ده مش كلامى ده جه فى ملحق السيارات بتاع الأهرام...
كلنا (ملاك ال M11) قلنا و لسه بنقول ان المشاكل اللى فى عربياتنا مشاكل تجميع...
شوف ازاى احنا مش عارفين نجمع عربية هم اللى صنعوها...
و بعد كل ده بنتريق عليهم...
نصيحة أخيرة للأخ epico لو انت مصر تشترى اسبيرانزا اشترى 516 ...
لأن ال 516 أول لما نزلت كان فيها مشاكل كتير فى موديلات 2006 و 2007
لكن من أول 2008 و هى زى الفل.. و الكلام ده مش رأيى الشخصى ده كلام عرفته من ناس شغالين فى اسبيرانزا...
و غالبا هو ده نفس اللى حاصل مع الام11 .. هيبدأوا يظبطوا المشاكل اللى بتظهر فى العربية واحده واحده... فالموضوع هياخدله سنة ولا اتنين لغايه لما العربية تنزل perfect
و الله أعلم..

الموضوع: ياجماعة حيرتونى اشترى ولا لأ ؟

LinkBack

أدوات الموضوع

عرض

-

-

-

-

المواضيع المتشابهه

حيرتونى والله العظيم

ياجماعة محتاج رايكم عاوز اشترى عربية

ياجماعة عايز اشترى جنيهات دهب اجيبها منان عشان ما يدحكش على

ياجماعة محتاج اشترى غطاء للعربية ؟ رجاء المساعدة

ياجماعة ياريت سرعة الرد عشان نازل اشترى انهارضة

الكلمات الدلالية لهذا الموضوع

المفضلات

المفضلات

ضوابط المشاركة