لا قدر الله - لو خبطت حد من المشاة بالعربية

**Amrrr** · 20-04-2010 03:12 PM

السلام عليكم

كان في كذا موضوع اتفتح خاص بالحكاية دي

وانا ماكنتش عارف اخد قرار في الموضوع دا لحد امبارح
الحمد لله مش انا اللي خبطت لكن الحادثة حصلت ورايا ولما نزلت اشوف لقيت اخو اللي اتخبطت وواحد تاني معرفشي يقربله ايه كانوا عاملين زي المجانين - حقهم طبعا - مقدرشي الوم عليهم في حاجة
اخوه بيحاول يعمل اي حاجة عشان ينقله مستشفى او يجيب عربية اسعاف لدرجة انه كان بيفتح ابواب العربيات اللي بتعدي وكان في أمين شرطة واقف كان معدي بالصدفة الراجل كان بيوطي ع الأرض يبوس رجله يتصرف وبصراحة الأمين مانزلشي الموبايل من ايده وكان بيحاول يفتح الطريق على أد مايقدر !!
التاني بقى مسك العربية - كانت فيات 128 سليمة - خلاها مفيهاش حتة ازاز كاملة حتى الاشارة اللي في الجنب ومكفاهوش !!! فتح الأربع ابواب بتوع العربية وجابهم بالعكس لحد ماعوج الابواب والقوايم وكان هيكمل على الشنطة والكبوت بس لما لقى الناس هتتلم عليه ورايحين ناحيته قعد يشتم في الحكومة واللي راكبين عربيات وسب دين وسب كل حاجة وراح على الشارع يخبط عالعربيات اللي ماشية ويرزع برجله في الفوانيس -عشان يمشوا بسرعة عشان الاسعاف ييجي - بيوجب مع الميت بقى شكله كان بيعزه اوي !!! مش عارف ليه ماللي خبطه وقف ومجريش تقوم تعمل كدة في عربيته وطبعا ساعتها صاحب العربية اختفى
المهم العشر دقايق اللي وقفتهم يتكتب فيهم كتاب من المواقف اللي شفتها وردود الأفعال
- عربية اسعاف عدت - الناس تتحايل عليه يشيل الراجل مرضيش وقاللهم هاركن على جنب وانزل - وطبعا جري
- ناس بتعدي بهداوة وبالراحة وكلهم تأني وهدووووووء بيبصوا في ايه على عكس ناس تانية بتدخل وعايزة تعدي بسرعة وايدهم على الكلاكس مش بتتشال
- ناس كتير ملمومة فوق الراجل اللي متكوم عالأرض وانا نفسي لما قربت اديهم ازازة مياه اتخنقت من اللمة واحاول ابعد في الناس حاسس اني باكلم نفسي انا واللي بيحاولوا يعملوا زيي
- آخر حاجة اثرت فيا تكسير العربية اللي بصراحة خلاني لو اتحطيت في الموقف دا مش هاقف !! وهاروح اركن في اي حتة وارجع انقذ الراجل باي طريقة على اساس اني كنت ماشي في الشارع وشفت الحادثة ولو لقيت حد بيجري ورايا هاروح على اقرب قسم او نقطة امنية اكون عارفها - اذا في اعصاب للتفكير ساعتها وبس
لكن وقوف في موقف زي دا مستحيل !!! رأيكوا ايه يا جماعة حد يقول - انا من امبارح الموضوع معلم معايا اوي وكل شوية يعدي قدامي الموقف زي ماكون لسة واقف في الحادثة

**M.Osama** · 20-04-2010 03:22 PM

والله انا كنت اتكلمت برده مع صحابي في الموضوع ده قبل كده وكانت النتيجه اللي اتفقنا عليها انك تجري ومتقفش !! عشان كذا حاجه اولا سواء الراجل غلطان او مش غلطان انت اللي حتتضرب وكده كده بايت في القسم،، ولما تمشي او متقفش تطلب الاسعاف وربك يلطف بقي

**Amrrr** · 20-04-2010 03:26 PM

اه دا غير بهدلة القسم !!! والله ماجتشي على بالي خالص لأن البهدلة اللي شفتها في الشارع اكيد ابشع واشنع من بهدلة القسم كفاية بوظان العربية بالمنظر الوحشي دا !!! دا كان في دبش وطوب بحجم مسند الراس بتاع الكرسي كدة على كراسي العربية وعالكنبة الورانية

طب ماهو احتمال اللي بيعدي كان هو اللي غلطان

**M.Alshafie** · 20-04-2010 03:30 PM

المشاركة الأصلية كتبت بواسطة m.osama

والله انا كنت اتكلمت برده مع صحابي في الموضوع ده قبل كده وكانت النتيجه اللي اتفقنا عليها انك تجري ومتقفش !! عشان كذا حاجه اولا سواء الراجل غلطان او مش غلطان انت اللي حتتضرب وكده كده بايت في القسم،، ولما تمشي او متقفش تطلب الاسعاف وربك يلطف بقي

و ضميرك هيبقى مستريح لما تجرى و انت ممكن تكون موت انسان
و ممكن تعيش طول عمرك فاكر انك موته و هو بقى سليم
منطق ايه دى اللى يخليك تجرى انت عملت غلطه تحمل عواقبها بس هو ممكن فعلا تركن العربيه بعيد و ترجعله ده يكون احسن و خللى بالك اللى هو عمله ده كله مجرد حقد و غل ضد اللى راكبين عربيات مش اكتر ممكن تلاقيه لا بيطيق اللى مرمى على الارض و لا يعرفه بس هو ساعات الزعيق فيهم بيجيب نتيجه كويسه و فهمه انك معاه و مش هتجرى و متحمل كل حاجه

**M.Osman** · 20-04-2010 03:30 PM

انا حصل مع ابن عمي ان واحد خبطه و جري و سابه ينزف في الشارع لحد ما عربية خدته للمستشفى

و من ساعتها مش عارف برضه لو لاقدر الله خبطت حد ... هقف ولا لأ ؟؟!!!

لأن فعلاً لو وقفت حتى لو انت مش غلطان هتتبهدل اخر بهدلة ...

ربنا يستر

**M.Mosaad** · 20-04-2010 03:41 PM

يارب ما تكتب علينا الموقف دة ابدا

موقف ملوش حل سواء غلطان او لأ بس فعلا موضوع الوقوف مش عارف لو انا في الموقف دة لا قدر الله هعمل ايه بس الواحد لما بيقف فعلا بيتبهدل و عربيته بتتبهدل حتي لو مش غلطان الناس مش بيبقي عندها استعداد للسماع بيحاولا يوقوموا باي واجب مع الشخص المصاب الا انهم ينقذوة يعني هيكسروا عربيتك و يكسروك و يعطلوا الشارع لحد ما المصاب يموت

**Amrrr** · 20-04-2010 03:45 PM

المشاركة الأصلية كتبت بواسطة m.alshafie

و ضميرك هيبقى مستريح لما تجرى و انت ممكن تكون موت انسان
و ممكن تعيش طول عمرك فاكر انك موته و هو بقى سليم
منطق ايه دى اللى يخليك تجرى انت عملت غلطه تحمل عواقبها بس هو ممكن فعلا تركن العربيه بعيد و ترجعله ده يكون احسن و خللى بالك اللى هو عمله ده كله مجرد حقد و غل ضد اللى راكبين عربيات مش اكتر ممكن تلاقيه لا بيطيق اللى مرمى على الارض و لا يعرفه بس هو ساعات الزعيق فيهم بيجيب نتيجه كويسه و فهمه انك معاه و مش هتجرى و متحمل كل حاجه

بأمانة لو كنت شفت منظره وهو بيزعق وبيكسر في العربية عمرك ماهتقول ان الكلام يجيب نتيجة !! دا عايز سلاح ياباشا توقفه بيه دول كانوا عمال او بتوع الكشك - اللي قريب من المنطقة دي عشان في واحد راح ندهلهم وجم كلهم جري بعد كدة
وعموما انا فكرتي انك تجري آه بس مش هروب من المسئولية لأ هارجع تاني كأني واحد معدي وشاف الحادثة وكأني راكب ميكروباص او تاكسي ونزلت اشوف في ايه
ولو في حد بيجري وراك بقى على أقرب قسم واسلم نفسي عالأقل في القسم الواحد اسمه عامل حادثة لكن برة بالمنطق والمفهوم بتاع العالم دي زائد الغل والحقد اللي جواهم ممكن الواحد يتشرح في الشارع بعربيته اللي هي شقى عمره

**Amrrr** · 20-04-2010 03:47 PM

المشاركة الأصلية كتبت بواسطة mohamed_momi88

يارب ما تكتب علينا الموقف دة ابدا

موقف ملوش حل سواء غلطان او لأ بس فعلا موضوع الوقوف مش عارف لو انا في الموقف دة لا قدر الله هعمل ايه بس الواحد لما بيقف فعلا بيتبهدل و عربيته بتتبهدل حتي لو مش غلطان الناس مش بيبقي عندها استعداد للسماع بيحاولا يوقوموا باي واجب مع الشخص المصاب الا انهم ينقذوة يعني هيكسروا عربيتك و يكسروك و يعطلوا الشارع لحد ما المصاب يموت

بالظبط هو دا اللي حصل زي مايكون هيرجع المصاب او هيصحي القتيل

**aly_hosny** · 20-04-2010 03:50 PM

مش عارف هعمل ايه برضو
بس الموقف حصل قدامي كتييييييييييييييييير وكل مرة كان ال خبط بيقف وياخد ال خبطه المستشفى باستثناء مرة واحدة كانت اختي وموقفش بس جبت #%# وطلعت @%@%# عشان موقفش
بتهيالي تقف احسن لان انت لو مشيت في 100 واحد هيجيبو رقم العربية وهيجيبوك في الاخر والناس مش هتبقى متسامحة معاك
انما لو وقفت هيحترموك