يا ريت كل واحد يقولنا اسوأ الطرق ال مشى عليها فى مصر
الاخوة الكرام
يا ريت كل واحد يحكي لنا عن تجربته مع اسوأ طريق سريع سافر عليه ، علشان الناس تعرف وتاخد بالها - بس خلينا موضوعين اكتر وبلاش نتكلم عن الشوارع العادية والطرق الداخيلة - خلينا نتكلم عن الطرق السريعة بين المدن من حيث المطبات والخدمات والملفات وتغطية المحمول
هبدأ بنفسى
اسوأ طريق سوقت فيه طوال حياتى كان الطريق العرضى فى سيناء (دهب - كاترين - فيران - ابو رديس)
صور الطريق من هنا
الطريق لعنة بكل المقاييس
-اتجاهين طبعا رايح جاى فى طريق عرضه حارة ونص تقريبا
-مفيش صريخ بن يومين على الطريق ولا جاى ولا رايح طوال مدة الطريق ساعتين - رعب بجد
-مفيش اى خدمات ولا بنزينة وكاوتش ولا حتى تليفون و لا الدموع
-مفيش تغطية اى شبكة محمول ولا حتى سيجنال واحدة ولا موبينل ولا فودا فون ولا اتصالات طبعا
-طريق وعر بكل المقاييس - بين جبال شاهقة
-هناك ما يزيد عن 100 ملف وكيرف يعنى مفيش قيادة على طريق مستقيم - ملفات على طول الخط
-فى حوالى 3 ملفات عبارة عن حاجة كده زى يو تيرن (ملفات موت) تقريبا كنت هتقلب فيها كذا مرة
-مفيش كات ايز ولا خطوط فى الارض ولا اسهم ولا اى علامات ارشادية - فجاء تلاقى ملف موت فى وشك وانت على سرعة 100 وانت وحظك بقى مش هتشوف الطريق اساسا
-كنت مسافر فى ليلة سودا مفهاش قمر والطريق مفهوش ولا حتى اى اشارة نور من بعيد - وقفت اريح فى نص الطريق وطفيت نور العربية مكنتش شايف نفسى ولا العربية يعنى لو عطلت على الطريق محدش هينجدك ولا يقولك انت فين والجو هناك تلج بكل المقاييس
-الطريق منسوبه عالى وهناك وديان كثيرة اسفل الطريق - يعنى لا قدر الله لا قدر الله خرجت بره الطريق العربية هتنقلب فى الوديان المنخفضة دى وتشحور ال جواها
فى حياتى مشفتش طريق وعر كده والمشكلة انه مفروض طريق سياحى بيمشى عليه سواح وباصات راحة سانت كاترين
ياريت كل واحد يحكى لنا عن تجربته على اسوأ الطرق