الموضوع: قلقانه من شراء الاوبترا 2008

ملحوظة سريعة من مالك سيارة صانى وادعى انى الى حد ما بفهم فى السيارات

بلاحظ ان ناس كتير جدا لما بتيجى تقارن بين الأوبترا والصنى بتحط كلمة (تكنولوجيا قديمة) مرتبطة بالعربية الصنى

فهل يتفضل واحد ويقول لى ايه القديم فى تكنولوجيا الصنى؟

هل هو المحرك ؟ لا اعتقد لأن محركها الجيل الحالى من الصنى المسمى Qg16de احدث فى التصميم من محرك الأوبترا اللى هو محرك الفيكترا من الجيل السابق،

هل هو كارت تشغيل المحرك؟ لا اعتقد لأنه يعمل بنظام Obd 2 وهو نظام كل السيارات من نفس الفئة حتى الآن فالأنظمة الأحدث مثل Can غير مطروحة سوى فى السيارات الفاخرة جدا

هل هو نظام الجر ، برضه لا اعتقد ان الأوبترا تمتلك نظام جر احدث فأنظمة الجر لم تطرأ عليها تطويرات جذرية فى هذة الفئة منذ الثمانينات، واذا كنا بنتكلم عن الجير الأوتوماتيك فالإتنين بنظام الجير الأوتوماتيكى ذو التروس الكوكبية اللى متغير من خمسينات القرن الماضى سوى فى زيادة عدد النقلات ونظام التحكم الإلكترونى وهو موجود فى العربيتين، لكن لا دى ولا دى فيها الجير بوكس الcvt وبالتالى فنظام الجر واحد فى الإتنين

هل هو نظام التعليق؟ المكفرسون اللى فى الصنى ميفرقش كتير عن المكفرسون اللى فى الأوبترا ميفرقش كتير عن المكفرسون اللى فى ال128

يبقى لنا فى النهاية ان الأوبترا تحمل شكلا اقرب للموضة الحالية فى التصميم، وانا شخصيا لما اكون بقارن بين عربيتين كل الفرق فى التكنولوجيا بينهم ان واحدة فيهم فوانيسها على شكل الدمعة والتانية فوانيسها حوافها حادة، هذا لا يعطينى الجرأة انى اقول ان تكنولوجيا واحدة فيهم احدث من التانية، وإلا اكون مبالغ جدا

تبقى لدينا ملاخظة بسيطة، ان الصنى الحالية اول ظهورها 2002 بتكنولوجيا جيلها ، والأوبترا اول ظهورها سنه 2004 تحت اسم دايو لاسيتى بتكنولوجيا الجيل السابق من اوبل

انا شايف ان الفرق بين العربيتين هو فرق مدارس، يعن الصنى تنتمى الى المدرسة اليابانية قلبا وقالبا، والأبترا تنتمى الى مدرسة جنرال موتورز اوروبا مع لمسة كورية ، وبالتالى الميال للمدرسة اليابانية الصنى افضل له والميال لمدرسة جنزال مورتورز اوروبا عليه بالأوبترا

اما حكاية فرق التكنولوجيا دى فلا محل لها من الإعراب نهائيا

المشاركة الأصلية كتبت بواسطة hoko_mosha

ارجوا انك ما تكونش زعلت من كلامى و تقبل خالص مودتى

انا مزعلتش ولا محل للزعل فى الموضوع، انا بس حبيت احط بعض النقط فوق الحروف لأن الناس عمالة تردد كلمة تكنولوجيا قديمة بدون ما حد يقول لنا قديمة فى أيه بالضبط، وبرضه انا مقلتش ان تكنولوجيا الصنى احدث من الأوبترا، انا كل اللى قلته ان تكنولوجيا الإتنين تنتمى الى جيل واحد تقريبا بدون فروق اطلاقا ، ففى ميكانيكا السيارات لا تظهر فروق جوهرية سوى كل 10 سنوات تقريبا يحدث تغير واحد اساسى فى كل السيارات (مثلا احلال الجر امامى مكان الخلفى او احلال الحقن الإلكترونى مكان الكاربراتير وهكذا)اما فى المنظومة الواحدة داخل السيارة (المحركك مثلا او التعليق او الفرامل) فالآمر يستغرق اكثر من ذلك بكثير لظهور فروق تكنولوجية

الذى يتطور ويتغير هو الشكل الخارجى وشكل الصالون والفوانيس وطاسات العجلات وهو ما تلعب عليه شركات السيارات لاقناع المستهلك ان هناك شئ ما جديد بالسيارة

لكن يكفى انى اقول لك ان سيارة مثل الريجاتا موديل 1984 لا تختلف فى كثير او قليل عن اللانوس 1998 فى تكنولوجيا المحرك والتعليق والجر، اللهم إلا استبدال الحقن الإلكترونى مكان الكاربراتير ، حتى القدرة الحصانية للسيارتين فهى واحدة 85 حصان

لكن طبعا فى عين الناس دى ريجاتا مربعة من بتاعة زمان ودى لانوس حلوة من بتاعة اليومين دول