الموضوع: صيانة ال1000كم للواجا

السلام عليكم،،

مش عارف أبدأ منين المرة دي..
أول حاجة ألف شكر لأيمن ومهاب لأنهم قابلوني في التوكيل وكانوا معايا لحد مستلمت العربية (على انها المفروض مشاكلها اتحلت)
فجزاهم الله عني خيرا.
تاني حاجة بقا مش لاقي أفضل من "حسبي الله ونعم الوكيل في التوكيل ده"
العربية فضلت طول اليوم عندهم ولما رحت أستلمها طلع معايا المهندس سيد عشان يجربها ويورني انها مش بتحدف يمين
وفعلا طلع معايا وجربها في حتة كام متر كده فعلا العربية منكتش بتحدف
ومضاني على ورقة في التوكيل ان المشكلة اتحلت (للأسف الشديد)
بعد ما سبت التوكيل وانا مروح لاقيت العربية بتحدف شماااااااااااال؟!!!!!
قلت يا واد يمكن الطريق
مشيت من التوكيل لحد المعادي ومن المعادي للتجمع والعربية بتحدف شمال طول الطريقة!!
قلت يبقا أكيد المشكلة في الكوتش لأنها الأول كانت بتحدف يمين وهم بعد ما ظبطوا الزوايا (زي ما قالوا) بدلوا العجلة اليمين مكان الشمال
رحت طالع النهارده على أحسن واحد بيظبط زوايا في مدينة نصر (محطة موبيل اللي في شارع النادي الأهلي) وقلت أتأكد من الزوايا بنفسي من الجهاز (جهاز ليزر)
وللأسف لاقيت العربية
1- المشكلة اللي كانت في رجلاش العجلة الخلفية شمال زي ما هي والزوايا ورا مش مظبوطة
2- العجلة اللي ادام يمين مقلوبة لبرة حوالي 2سم !!!!
يعني لازم أ ب توكيل يغير المساعد ادام يمين

مش عارف أقول ايه الصراحة لكن بإذن الله رايح الأسبوع الجي وهعملهم فضيحة محترمة
وبكرة ان شاء الله رايح عند بريدجستون العبور زيادة تأكيد على موضوع الزاويا وهصور فيديو كمان عشان أحط الفيديو في وشهم.

حسبي الله ونعم الوكيل..