الموضوع: صيانة ال1000كم للواجا

حاول تقولهم علي اي حاجه وان شاء الله سوف يتم اصلاحها
والف مبروك

شكرا يا شباب على مشاركاتكم،
وغدا أخبركم بالنتيجة بإذن الله تعالى.

1000 مبروك صيانة ال1000 و إن شاء الله كل المشاكل اللى قلتها تختفى و تتحل إن شاء الله

السلام عليكم ورحمة الله وبركاته،

للأسف الشديد كان يوم سيء جدا يا شباب ..
أنا رحت هناك في معادي بالضبط الساعة 9:30 وسلمت العربية الساعة 9:50
عارفين استلمتها متى؟؟؟
الساعة 5:15
يعني 7 ساعات تقريبا
انا زي ما وضحت قبل كده الحاجات اللي كنت عايز أضبطها في العربية
1- الزوايا
2- الفرامل
3- الدبرياج
4- التنتيش أو التقطيع اللي بيحصل وانا على غيار أعلى من المطلوب (يعني بدل ما العربية تصقف بتنتش)
5- زاد عليهم ظبط مستوى النور الواطي

انا سبت العربية الساعة 10 وقلت أرجع لهم الساعة 1 أو 2 مثلا أكيد تكون خلصت طبعا رجعت لا كانت خلصت ولا حاجة، وكان لسه بيعملوا الزوايا وقالوا أصل فيها مشكلة.

خير يا جماعة فيها ايه، محدش عارف حاجة.,
دخلت لمدير الفنيين تقريبا اسمه "سيد"
قالي ان في وردة بس بنظبط عليها في الجهاز عايزين نغيرهالك ومش هينفع النهاردة للأسف عشان لسه قطع الغيار اللي جتلنا في كراتينها ومترصتش !!!!!!!!!!!!!!!!!!!!!!
يعني العمل ايه مش فاهم؟
ان حضرتك تيجي تاني خلال الأسبوع الجي ونضبطلك الزوايا
طب أمال انتوا بتعملوا ايه من الصبح؟
عملنا صيانة 1000 والحاجات اللي انت طلبتها ومش باقي الا ضبط الأنوار،
ولما تخلص هطلع أجرب العربية مع حضرتك.

خلصوا وطلع يجرب العربية معايا،
1-الفرامل اتحسنت شوية بس مش اللي كنت منتظره
2-الدبرياج زي ما هو
3- التنتيش اتعملت ولله الحمد
4- النور بليل وعليك خير (بس الحمد لله تم ضبطه)

قلت له من فضلك اضبط لي الفرامل والدبرايج (عاليهم يعني)
قالي هعليهملك والعربية تتغسل وتخدها على طول ان شاء الله.

خدت العربية وما مشيت لقيت الدبرياج علي زيادة عن اللزوم،
والفرامل برده زيادة عن اللزوم لدرجة اني حاسس انها أفشه على العربية شوية وسحبها قل عن الأول
ناهيكم عن الزوايا،
بقيت أسوأ من الأول ألف مرة،
والحدفة زادت جدا

طبعا في موضوع برده اتعرضت له هناك
موضوع الEBD
المفروض ان العربية في مواصفتها abs و ebd
طبعا هناك المهندسة اللي استقبلتني قالت لي مفيهاش ebd
ودخلتني لسيد مدير الفنيي قال طبعا مفيهاش ebd وفيها abs فقط
قلتلهم انها بتتباع على أساس ان فيها ebd محدش رد علي
وأكدوا لي ان مفيهاش ebd !!!!!

معلش صدعتكم بالقصة الطويلة دي.
بس انا اليوم ده رجعت عيان من المشوار (رجعت العشاء)
ومقدرتش أكتب لكم عن الهم اللي شفته.

وان شاء الله هحجز المفروض على يوم الاتنين عشان موضوع الزوايا.

أسف مرة أخرى على الإطالة.

ألف مبروك و عقبال صيانة الـ 100000 و حاجة غريبة اللى أنا متأكد منه فنياً أن abs & ebd وحدة واحدة و ميكانيزم واحد بصفة عامة فى كل العربيات بإختلاف أنواعها تأكد من هذه المعلومة من متخصصى هذا القسم المحترم

معلش انت حتتعب شوية في الاول, وبعدين كل حاجة حتتظبت. العربية فعلا ممتازة ومش حتندم انك جبتها, وربنا ما يحوجنا لأي توكيل في مصر