أنسب ميعاد لغزو القاهرة من الأسكندرية امتى ...؟؟؟

**mido777** · 21-04-2010 04:07 PM

السلام عليكم ورحمة الله ....
ازيكم يا شباب نايل موتورز

كنت عايز اغزو القاهرة بكرة انا والعائلة واقعد يومين من غير ما اتقل عليكم (القاهريين)
فكنت عايز اعرف انسب وقت لدخول القاهرة من على طريق المحور بحيث يكون الطريق مش زحمة قوى

ان شاء الرحمن حتحرك من اسكندرية حوالى الساعة 3 عصرا ... ومع ظروف الطريق والأستراحة والكلام ده قول حدخل القاهرة على الساعة 6 مساء ...
فهل كده مناسب ولا اغير مواعيدى ....

ان شاء الله انا رايح دار الدفاع فى مدينة نصر لو أمكن برضه حد يقولى مكانه فين بالضبط ...

وشاكر لردكم مسبقا

**هيثم** · 21-04-2010 07:06 PM

بعد ما توصل بالسلامه هتاخد الدايرى حتى مخرج موقف العاشر ( مدينه السلام )
المخرج هيطلعك يمين اجبارى هتمشى لمسافه 2 ك هتلاقى كوبرى هتطلعه
بعد الكوبرى ب 7 ك هتدخل شمال و هيكون سور الكليه الحربيه
على يمينك هتكمل على طول لمسافه 1 كم و بعد ما تعدى من
تحت كوبرى المطار هتلف من اول فتحه شمال هتقابلك
و هتحط نفسك فى اقصى اليمين عشان هتلف تانى
يمين من اول فتحه بردو و كده انته على
الاوتوستراد هتفضل ماشى لحد ما
تقابل كوبرى 4.5 هتطلع
الكوبرى و هتكمل على طول لمسافه 4ك
و هتشوف ساحه انتظار سيارات كبيره على يمينك
و هتلف بعدها مباشره يمين ( ميدان الساعه ) و بعد ما تلف
هتمشى لمسافه 2 او 3 ك هتلاقى دار الدفاع على الجانب الاخر
من الطريق هتلف من اول فتحه شمال ........... و حمد الله على السلامه

( المسافات المذكور تقريبيه)

**mido777** · 22-04-2010 02:48 AM

شكرا يا هيثم على الأهتمام
بس مش الدائرى ده عمى ما اتعاملت معاه ... مش عايز اجرب وانا معايا المدام والبنات

**Ahmed Selim** · 22-04-2010 02:49 PM

محمد بك الطويل.....القاهرة هتنور يا باشا

بص الميعاد اللى هتوصل فيه ده ميعاد الذروة.....يعنى يستحسن تأخر ميعاد وصولك ساعتين أو ساعة على الأقل.

و بما أنك مش عاوز تجرب الدائرى....و معاك حق فيها يبقى مفيش قدامك غير كوبرى 6 أكتوبر لحد أخره.....هتنزل المنزل الشمال خالص هتلاقى نفسك عند المنصة
هتعدى أو تقاطع و تانى تقاطع و تفضل ماشى هتلاقى على يمينك مرور مدينة نصر و بعده الحرية مول....كمل على طول لحد أول عباس العقاد.....و خد أول يو ترن بعد عباس العقاد و بعدها أول يمين......هتمشى حوالى كيلو و هتلاقى دار الدفاع على شمالك....هتفضل ماشى لحد ما تلاقى كوبرى ما تطلعش عليه....لف من تحته يوترن و هتلاقى الدار على يمينك بعد حوالى 200 متر

هتدخل من الشارع اليمين اللى قبل الدار و الدار واخدة ناصيته و فيه باركنج تحت الأرض بتاع الدار.

كان نفسى أشوفك بس أنا فى الأمارات دلوقتى.....تتعوض إن شاء الرحمن