الموضوع: خطة اوماترا المستقبلية ...عربيات من غير دريكسون !!!!!!

امبارح اتصلت بتوكيل اوماترا عشان سمعت ان البونتو كلاسيك سعرها نزل ل 69900جنية بعد ما كانت 73000 و دار بيني و بين ال SALESMAN هذا الحوار :
- مساء الخير .
ـ مساء النور يا فندم .
ـ انا كنت سمعت ان البونتو كلاسيك سعرها نزل .
ـ مظبوط يا فندم .
ـ بقت بكام ؟
ـ 69900 جنية يا فندم .
ـ طب اية ال OPTIONS اللي فيها ؟
ـ تكيف و باور و سنتر يا فندم .
ـ يا ترى فيها ABS و EBD ؟
ـ لا يا فندم .
ـ مرايات كهربا ؟
ـ لا يا فندم .
ـ طب ازاز كهربا ؟
ـ امامى.بس يا فندم .
ـ طب فيها جنوط سبور ؟
- لأ ، طاسات يا فندم .
- يبقى أكيد فيها كاسيت ؟؟!!!
- لأ ما فيهاش بس مجهزة لتركيب كاسيت يا فندم .
- مجهزة ؟؟!!! تصدق انا كده اطمنت .
- يبقى اكيد فيها انذار ؟
- لأ ما فيهاش بس مجهزة لتركيب انذار يا فندم .
- مجهزة بردو !!!! ربنا يطمن قلبك يا شيخ .
- ناقص تقولي كمان ان ما فيهاش مساند رأس .
- بص حضرتك .. الكدب خيبة .. هية مجهزة بردو يا فندم .
- طب سؤال اخير عشان اطمن اكتر . هي فيها FOG Lights ؟
- يعني اشمعنة ديه إللي هتكون موجوده . أكيدة مجهزة بردو يا فندم .
- لأ بصراحة عربية لقطة !!!!!!


الظاهر ان صاحب توكيل اوماترا كان عايز يعمل ناصح فشال من العربية معظم الحاجات الاساسية عشان يرخص تمنها طبعا و يقدر على منافسة العربيات الكورية و الصينية . اعتقد ان بكرة ان شاء الله هيخلوا العربية ب 60000 جنيه و هيشيلوا المرة دي الدركسيون ... و لو حد سأل عليه حيقلوا دي مجهزة يا فندم !!!!!!