الموضوع: أسباب نقصان عزم السيارة

آسف إني معلقتش من كام يوم رغم إني صاحب المشكلة بس كل الحكاية إني قولت أستنى لغاية ما أروح للميكانيكي.
وفعلا روحتله وطلع الموضوع كله جاي من طقم البوجيهات وفلتر البنزين لما غيرتهم العربية بقت حاجة تانية خالص.
الميكانيكي طلع فلتر البنزين وطلع منه زفت والبوجيهات كانت عدمانة رغم إنها من نوع ngk بمجرد تغيير الحاجات دي حسيت بفرق في العربية

وده بالإضافة - ولو إنه ملوش دعوة بالموضوع - ركبت ترموستات الكوعة بعد ما كنت شايله قبل كده طبعا فرق في السحب مع الوضع في الاعتبار إني حطيت ميه خضرا سعودي نظيفة بعد ما نضفت الريداتير بمية بـ (خل) ومقلكوش ع اللي طلع من جواه من صدا.
ومتصدقش أي ميكانيكي يقوللك شيل الترموستات ده لأن الموتور بيبرد مع السرعات العالية ود بيزود فعلا من استهلاك البنزين.
بالإضافة إني اشتريت منظف دورة بنزين وناوي أحطه إن شاء الله مع أول تفويلة وعموما هو لو مفادش مش هيضر.
ملخص الكلام إن علشان يبقى عزم العربية كويس باستهلاك بنزين كويس لازم الأشياء التالية:
1- لازم ترموستات الكوعة يبقى راكب مع مية خضرا من نوع كويس.
2- تغيير فلتر البنزين كل 5000 كيلو بالكتير
3- الكشف على البوجيهات كأول احتمال لما تلاقي العزم أو السحب قل.
4- حاول تبص على طرمبة المية والبنزين واتأكد إنهم في حالة جيدة.
5- اعمل تنظيف لدورة البنزين بواسطة منظف الدورة كل 10000 كيلو.
6- حط بنزين 92 على الأقل بالنسبة للدايو علشان ده بيطول فترة تغيير فلتر البنزين وحاول إنك تشوف بنزينة جديدة ونظيفة تمون منها.
7- متقارنش استهلاك البنزين أو العزم بتاع عربيتك دايما بالزيرو منها لأن كل حاجة ليها عمر افتراضي ومبتفضلش كويسة بنفس الكفاءة طول العمر الافتراضي بتاعها إنما لازم أدائها بيقل بمرور الوقت وكل اللي بنحاول نعمله إننا نحافظ على الحاجة بحيث إنها متبوظش قبل العمر الافتراضي المقرر ليها والدليل على كده إن بره لازم العربية تتغير كل عدد من السنين علشان متقلش مع صاحبها ومتقنعنيش إن الصنايعية اللي عندهم أقل في الذمة والضمير من اللي عندنا وأكيد برضه كفاءة قطع الغيار بتاعتهم أعلى من كفاءة قطع الغيار بتاعتنا ورغم كل ده بيغيروا العربية كل عدد معين من السنين بمجرد ما تفتح بقها لأنهم مؤمنين بإن كل حاجة ليها عمر والأولى إننا نكون مؤمنين بالمبدأ ده أكتر منهم لكن اللي بيخلينا نقاوح هو الفقر لأن الواحد عندنا مبستحملش يجيب عربية ويصرف عليها كتير واللي بيجيب زيرو غالبيتهم بيبقى قسط مش كاش وبرضه مبيبقاش نفسه يصرف عليها ومفيش عربية كده ، طبعا ناهيك عن التقفيل المصري للعربيات فحدث ولا حرج وعن اللي بيحصل في مراكز الخدمة المعتمدة وكلنا عارفينه سواء بالتجربة أو السمع.
وكمان اللي بيزود الموضوع إن بره بيجيبوا عربياتهم من فياضة فلوسهم إنما عندنا بنعصر نفسنا علشان نجيب تمن العربية ونحاول إننا نجيب أحسن ماركة بدون ما نبص حتى للصيانة الدورية مش حتى التصليحات.

وأرجو أن أكون قد ساهمت ولو بالقليل وأنتظر إفاداتكم أيضا..
وجزاكم الله خيرا...........