الموضوع: اخيرا .. جنوط نيو اكسنت :)

السلام عليكم,
ازيكم جميعا؟ ... انا اول مره اكتب موضوع هنا لكن بقالى حوالى 6 شهور مشترك من ساعه ما قررت اشترى عربيه جديده .. وفعلا المنتدى نفعنى جدا الحمدلله ... و دلوقتى قررت احاول ارد الجميل على اد ما اقدر باللى اعرفه :)

اولا اعرفكوا بنفسى .. انا كريم من حلوان .. مهندس كمبيوتر .. معايا نيو اكسنت 2010 فضى اوتوماتيك :)

كانت تقريبا الحاجه الوحيده اللى مضايقانى فى العربيه هى الثبات .. العربيه فى الطرق المستويه ممتازه حتى على السرعات الكبيره .. لكن المشكله الكبيره فى مطبات الهوا او لو خدت مطب على سرعه عاليه حبه (40 مثلا او 30) هتلاقى العربيه بتنط جامد جدا لدرجه انك ممكن تتحرك من على الكرسى ... و لو حد مسك نيو اكسنت على الطريق و مشى وراها بمسافه معقوله هيلاحظ اد ايه العجل صغير عليها كانها ماشيه على دبابيس (ارتفاع العربيه كمان بيزود المشكله دى)

المهم بعد تفكير (و بعد ما فرده كاوتش اتقطعت من حديده على الطريق) قررت انى هجنط .. تفاديا للمشاكل و تعديل العفشه و العك ده قررت اجيب الجنوط الموجوده فى الكتالوج (15 195/55) ... و لفيت لفه حلوه كده عشان نشوف احسن اسعار و انواع و احسن سعر عشان ابيع العجل اللى معايا ... و خلصت الموضوع كله فى اشرفكو اللى فى مدينه نصر اخر شارع الطيران.
الجنوط 15 تايلاندى اتكلفت 1800 جنيه, العجل (15 195/55) اكسيريلا سرعات الفرده ب 325 .. و بعت الاربع جنوط القدام و ال3 عجلات (عشان فى واحده مقطوعه) ب 500 جنيه (العجل كان عامل 11000 كم) .. و احتفظت بالاستبن بتاعى .. يعنى الموضوع كله اتكلف 2600 جنيه بالتركيب و النياكل و الترصيص و النيتروجين و كله ..
نقطه مهمه كمان, ان زى ما اتقال فى مواضيع كتير هنا .. القطر الكلى للعجله الجديده بيساوى القطر الكلى للعجله القديمه و عشان كده عداد السرعه و عداد الكيلومترات لسه مظبوط و مش محتاج تعديل

النتيجه بقى ... تحسن رهييييييييييب ماشاء الله فى ثبات العربيه .. انا كنت متردد كتير قبل التغيير عشان خايف احط فلوس و الاداء ميتحسنش اوى (بالذات انى حساس اوى فى موضوع الثبات ده و بحس باى تغيير او اهتزاز فى العربيه) ... لكن فعلا العربيه ماشاء الله مسكت فى الارض جدااااااا, مبقتش تنط تماما, الفرامل بقت اقوى, العربيه عموما بقت اتقل الحمدلله ... لكن طبعا عشان سمك العجله الجديده اقل (55 مقارنه ب 65 فى القديمه) فالموضوع محتاج حرص اكبر فى النقر و الحفر عشان العجله متعملش بالونه

عموما انا بانصح اى حد انه يعمل الموضوع لانه فعلا هيحس بفرق كبير اوى و هيحب النيو اكسنت اكتر ما كان بيحبها فى الاول :)

المشاركة الأصلية كتبت بواسطة hdabawy

ربنا يباركلك فيها
وياريت لو فيه صور للجنوط الجديدة

ربنا يخليك ... هنزل الصور حاضر ان شاء الله .. بس انا دلوقتى عايز انام جدا :) .. بكره ان شاء الله

المشاركة الأصلية كتبت بواسطة hamdymsr

ألف مبروك على الكاوتش والجنوط ... على فكرة انا بردوا من حلوان ومعايا نفس العربية بس موديل 2010 نبيتى منيوال ... وقربت اعمل بيها 1000 كيلو... وبرضوا مهندس كمبيوتر ...واحب اتعرف عليك لو مش هضايقك

الله يبارك فيك يا باشا .. طبعا ليا الشرف انى اتعرف عليك .. راسلنى على الخاص يا باشا و اعملك اد على المسنجر :)

المشاركة الأصلية كتبت بواسطة shiko85

لو انا عايز اركب كاوتش عريض لازم اغير الجنط كمان ولا ينفع على القديم ؟؟

لا مادام نفس القطر (14 برضه يعنى) يبقى مفيش مشكله .. بس طبعا ممكن يعمل مشكله لعفشه العربيه

المشاركة الأصلية كتبت بواسطة د.محمود صلاح

المشكلة ان نقشة الجنوط ممكن تحلي أو تبهدل شكل العربية

انا بصراحه مكنتش مهتم بالشكل على اد ما كنت مهتم بالثبات .. بس بعد ما ركبوا شكلهم عاجبنى فعلا .. على العموم دى اذواق

المشاركة الأصلية كتبت بواسطة osos_lion

الف مبروك
بس العجل القديم خساره انك بعتو ب 500 دكده لسه جديد مش مشكله بقا
علفكره ممكن كمان يركبلها 16 حسب كلام الكتالوج
والف مبروك
انا اول مره اخد بالي من موضوع القطر ده يعني انتا لو وقفت الاوريجنال جمب الجنط بتاعك هيبقو نفس العلو عن الارض
طبعا لازم تنزلنا صور الجنوط الجديده
ويارب تكون جبتهم خفاف عشان ميتعبوش العفشه

العجل القديم انا متاكد انه ميجبش اكتر من كده ... هو بس اللى كل المحلات كانوا متفقين عليه انى اخليه عندى عشان لما اجى ابيع العربيه .. بس انا قلت 500 جنيه حلوين برضه و لسه فيه و بيع العربيه فين .. و ممكن لو شيلتهم يبوظوا و لا يحصلهم حاجه .. هم كمان نوعهم ماكانش حلو اصلا .. فمزعلتش عليهم بصراحه d:
موضوع العجل ال16 ده انا مشفتوش فى الكتالوج خالص ... ممكن تقولى مكتوب فين بالظبط؟ .. ده حتى الاستيكر اللى على القايم مكتوب فيه مقاسين 14 و مقاس 15 بس زى الكتالوج!!
موضوع الارتفاع .. بالظبط زى ما انت قلت .. انا مكنتش اعرف برضه غير من موضوع هنا فى المنتدى كان بيشرح الموضوع ده و لما حسبتها على المقاسين الموجودين فى الكتالوج لقيتها كده فعلا ..
و ان شاء الله هنزل الصور على طول

المشاركة الأصلية كتبت بواسطة sss2000

تسلم ايايك ياباشا وفي انتظارالصور

ربنا يخليك يا باشا .. قريبا ان شاء الله :)