بصمـة الغضـب - شوية فضفضة

**pro_samir** · 22-04-2010 10:11 PM

سلام عليكم

الصراحة مش عارف إية اللي بيحصلي بقالي كام يوم وقلت افضفض معاكم

لخبطة في الشغل علي ارهاق علي دور برد علي العربية قعدت يحصل فيها كذا حاجة ورا بعض في خلال يومين فقط زي ما اكون واخد عين محترمة مع انها كلها حاجات خايبة بس بتعكنن وبتضيع وقت

واخرها انهاردة ماشي في شارع البحر في طنطا كافي خيري شري تاكسي ماشي في نص الشارع وانا كنت داخل اعدي من شمالة راح مرة واحدة مشغل اشارة شمال وقافل عليا علشان ياخد يوتيرن ... ما علينا هديت واستنيتة وحدفت يمين علشان اعدي من يمينة راح مرة واحدة حادف عليا يمين هو كمان وانا جنبة طبعا نتشت الدركسيون يمين علي الأخر ومن ستر ربنا ان مكانش جنبي عربية

وببص في المراية لاقيت البية شغل اشارة يمين وبيقف علشان ياخد زبون حسبي الله ونعم الوكيل

طبعا دمي اتحرق الصراحة الأول كنت ناوي اعدي الموضوع ومشيت وبعد شوية صغيرين الشيطان لعب في دماغي تاني قلت اهو الشارع واقف وهتلاقية جاي دلوقتي اديلة كلمتين

وكنا داخلين علي مطب وماشيين بطئ خالص فا بصيت ورايا علشان اشوفة روحت لابس في عربية اوبترا قدامي كانت وقفت علي المطب ،، اكصدامي من اليمين اتحك والأشارة اتكسرت وحكيتلة اكصدامة من ورا شمال

طبعا ركن و ركنت ونزلت سلمت علية واعتذرتلة طلع ذوق وقالي خلاص محصلش حاجة ومشي

الحكات كلها تطلع بالبوليش عندي أو عندة الخسائر فقط الأشارة الحمد لله

دة اخر موقف حصلي خلال اليومين تلاتة اللي فاتو مش عارف في اية بجد

حتي طول مانا ماشي في الشارع بيحصلي حاجات غريبة :S مش عارف دة بجد ولا تهيؤات

وبصمة الغضب طبعا هو البوسة الحلوة اللي علي العربية في الأتاتش

**mmffor** · 22-04-2010 10:26 PM

when this happen to me simply i take a day or two off and i close my mobile and i isolate my self completly from people and specially from my wife!!!!! and everything gets better

**pro_samir** · 23-04-2010 12:11 AM

المشاركة الأصلية كتبت بواسطة Eng:mohamed

سبحان الله...ز
يا أستاذ محمد...يعنى انت راجل طيب..و ده من طبعك..
شفت ربنا بيقولك خليك طيب....تكسب..
لما حاولت تعمل حاجه مش من طبعك..
حصل اللى حصل..
الحمد لله على كل .شيء..خليك واثق فى ربنا.و متعتقدش انها معقده أو منحسه فى وشك..
و خلينا نشوفك...

جري اية يا هندسة انت جاي تقطمني هههههه

والله الحمد لله علي كل حال هي ملطشة بقالها كام يوم بس بجد دة اكتر موقف ضايقني لأن اول مرة اعلم علي عربية بالطريقة دي

وخلينا نشوفك انت ، المشروع لسة بينفث ولا إية النظام ؟

المشاركة الأصلية كتبت بواسطة mmffor

when this happen to me simply i take a day or two off and i close my mobile and i isolate my self completly from people and specially from my wife!!!!! and everything gets better

بصراحة انا لسة محتار اعمل كدة كالعادة ... ولا اعمل العكس واسافر بكرا أقضية في أي مكان ، مع الفارق اني مش متجوز الحمد لله :))

**M.Osman** · 23-04-2010 01:06 AM

حمد لله على السلامة... للأسف السواقة هنا تعمل اكتر من كدا..بس فداك .. ولا يهمك

**romeo_6887** · 23-04-2010 02:33 AM

العيشه في مصر بقت تقصف العمر
معلش يا باشا و روق كده
و ان شاء الله خير

**hugan** · 23-04-2010 02:56 AM

القياده في الشارع المصري والقاهره الكبري علي وجه الخصوص عباره عنمعركه حربيه من اول ماتنزل بيتك لحد ماتروح بل السلامه المعركهممكن تشتمل علي الاتي ابسطشي الشتيمه ودي بتبقي سهله وتعدي واهي الشتيمه مش بتلزق تاني شي الاشتباك اليدوي والناس ولاد الحلال يدخلو وينفض الموضوع تالت شيء الا شتباك اليدوي مع الا صابات في الجسم والسياره ودي ممكن توصل للشرطه فرجاء كل واحد ينزل من بيته الصبح يتسلح عفوا اللسان البذيء مفيش مانع من شومه صغيره نعور وماتكسرش الشي التالت انك لو جامد يعني السلا ح علشان ترهب بيه الا عداء المصريين اللي حظك السيء بتقابلهم في طريقك دي نظره تشائميه حلزونيه للشارع المصري والسواقه فيه

**pro_samir** · 23-04-2010 04:48 AM

الله يسلمكم جميعا ويكفيكم شر الشارع المصري

قدر الله وما شاء فعل ... الحمد لله عملتها بالبوليش وطلعت كلها علي طول مفيش غير خربوش واحد صغير

لو خدتو بالكو من الخربوش العريض اللي فوق مكان الفوج دة علي طول كان اخويا واخد العربية و واحد بموتسيكل طلع قدامة في نص الطريق مرة واحدة وطبعا شاطة والراجل اتبهدل ، حاجة فل يعني

بس الصراحة برضو متضايق اني سيبت بتاع التاكسي دة كدة لأنة طول ما هو ماشي بيلطش في خلق الله والله اعلم أذي كام واحد بالطريقة بتاعتة دي ولا لو قفل علي حد وملحقش يلم نفسة يطيرلة جنب العربية زي ما كان هيعمل فيا