الموضوع: سوزوكى سيلاريو ولا شيفروليه سبارك ولا بيكاتو

بص يا باشا انا الحمد لله ركبت البيكانتو و السبارك و سقتهم كمان و هقلك على ملاحظاتي
نبدأ بالبيكانتو حبيبة قلبي:
العربية جميلة جدا و توكيلها محترم و موتورها جميل و هادية و تكييفها و باورها رائعين بس لما التكييف بيشتغل بيموت العربية شوية بدل ما تنقل على 3 rpm هتنقل على 3.5 بس كثبات و استهلاك للبنزين حلوة جدا و كفاية وكيلها زي ما قلت لحضرتك
نيجي بقى لعيوبها هنلاقي في المقام الاول سعرها اللي بعتبرو مستفز بالنسبة لعربية في الحجم ده
تاني حاجة يعتبر مفيش شنطة بمعنى الكلمة ضيقة جدا
بالنسبة لقطع الغيار و الصيانات مش هقدر افيدك في البيكانتو علشان ماحتكتش بيهم

نيجي بقى للسبارك:
العربية دي ما شاء الله عليها عربية حلوة بمعنى الكلمة فبالرغم من ان الموتور 1000 سيسي بس فعلا موتور محترم و تجميعو حلو و العربية ثباتها انا مكنتش مصدقوا لأني كنت قاعد جنب صاحبها و كان ماشي 130 على الدائري و مكنتش حاسس بأي حاجة غير لما بصيت على العدادات و اللي تعتبر رخمة جداااااااااااااااا لأنها في النص و اول ما سقتها بصيت عادي تحت الدريكسون ملقتش العدادات حسيت ان العربية في الحتة دي متركبة غلط بس بمجرد ما هتتعود عليها خلاص
التكييف بتاعها حلو جدا و مبيأثرش على سحب العربية على عكس البيكانتو
الكاسيت بتاعها بصراحة مش عاجبني و شكله مش حلو خالص في وسط الطابلوه و بتبقى نازلة بسماعتين 2 بس قدام و صوتهم تعبااااااااااااااااااااان و حلها جوز سماعات ورا من ماركة كويسة و ظبط
العربية تعتبر وسعها كويس مش بطال و تحس لما تقعد على الكنبة ورا ان العربية عالية من ورا
فرامل السبارك لا يعلى عليها و بالمناسبة البيكانتو بردو فراملها كويسة بس حاسس ان السبارك احسن منها
استهلاك البنزين في السبارك حاسس انو عالي شوية و ده يمكن راجع لصغر حجم تانك البنزين بتاعها لأن صاحبي لما بيمون 10 لتر و بيبقى باقي ربع التانك نلاقي المؤشر رفع لبعد النصف
الباور بتاع العربية دي ناعم و ماسك نفسو في نفس الوقت
الشنطة بتاعتها اوسع من البيكانتو
بس عيوبها في ان العربية مش منتشرة اوي و ده مخلي منصور مبيستوردش قطع الغيار البسيطة بتاعتها يعني انا صاحب عمل حادثة و غير فيها رفرف و فانوس و اكصدام و كان فيه حاجة اسمها مجمع الهواء السفلي وقعت من العربية بسبب الحادثة (حتة خرطوم بينظم الهواء اللي داخل للموتور) ده سعره 115 جنيه و مش موجود و بقالهم فترة مجبهوش و بعد عذاب و خناق مع التوكيل الحمد لله جابوه و صاحبي رايح بكرة يركبو
واحد تاني ريش التكييف اتكسرت بيدور عليها مش لاقيها و التوكيل مش جايبها
قطع غيار سعرها غالي حبتين يعني حادثة صاحبي دي اتكلفت 3250 في اكصدام و رفرف و فانوس و زودو ال115 جنيه بتوع بكرة يعني من الاخر منصور نزل عربية رخيصة و غلى قطع الغيار بتاعتها
ده تقييمي للعربيتين و ربنا يهديك للخير ان شاء الله