المشاركة الأصلية كتبت بواسطة خالد
معاك حق وكلامك مظبوط تماماً
بس فى نقطة مهمة ، مش كل المساجد فيها فلوس وتبرعات كتير زى ماحضرتك متخيل
أسرتى وهبت الدور الأول من العمارة أنه يكون مسجد ، وتم تشطيبه وأفتتاحه من 3 سنوات فى شهر رمضان ولله الحمد
وهوة غير منضم للأوقاف أو أى جمعية شرعية مثلاً ( وليس له خادم معين للمسجد )
وطبعاً يحتاج مصاريف بأستمرار ( أجر شهرى للخطيب يوم الجمعة - أستبدال وزيادة حصر للفرش يوم الجمعة - مظلة لحماية المصلين من الشمس أو الأمطار - منظفات ومطهرات للحمامات - معطر وشامبو للسجاد - شباشب للحمامات- صيانة المسجد كل سنة كدهان الحوائط أو أعمال سباكة - تغيير مايك وميكرفون بايظ - لمبة محروقة - شراء بخور - زيت فواحة لتعطير المسجد...ألخ)
وكثير من المصلين دائماً يعتقدوا أن صندوق التبرعات مليان مع أنه ممكن يكون أول واحد مابيحطش حاجة فى الصندوق !!!!
المهم أنا وأخويا ربنا يكرمه دايماً أول الشهر نكمل مرتب الخطيب من جيبنا لأن الصندوق مابيكملش ولا نص الأجر حتى !!!! وعمرنا ماقولنا لحد أن المسجد محتاج تبرعات لأن الناس كلها فاهمة وعارفة كل حاجة بس كل واحد بيعمل مش واخد باله !!! ألا من رحم ربى ، طبعاً فى ناس محترمة كتيييييير جداً من غير ماحد بيقولها بيجيب لوحده كولمان للمياه الساقعة - شاحن للطوارئ - ساعة حائط - حصيرة .....ألخ
وكتييييييييير من المصلين يكسر حنفية الحمام أو يخلع الخرطوم أويشوف أن لمبة محروقة او مكسورة مثلاً ّّ!!!! وعادى جداً يخرج من المسجد ولا كأنه فى حاجة أو يصلح حتى اللى كسره !
ناهيك عن النظافة للمسجد !! مفيش ولا واحد قال أساعدك أو أنظف معاك أو حتى الفرش للحصر يوم الجمعة كله بيبص ومطنش !!! مع أنى تعمدت أنى أنظف المسجد قدامهم علشان مثلاً حد ييجى فى يوم وينظف هوة ولكن لامجيب !!
طبعاً الحمد لله كله بثوابه وربنا بيكافئنا كتيييييييييييييييير جداً وأكتر مما نتوقع ، بس أنا كنت برد على حضرتك