الشلل الخماسي هو شلل رباعي + شلل في التفكير من كتر الغيظاقتباس:
وبعدين إيه حكاية الشلل الخماسي ده ؟؟؟؟؟؟؟
عرض للطباعة
الشلل الخماسي هو شلل رباعي + شلل في التفكير من كتر الغيظاقتباس:
وبعدين إيه حكاية الشلل الخماسي ده ؟؟؟؟؟؟؟
و الله ياجماعة أنا شايف إنكوا قاسيين جداً على بلدنا إلي متاويانا و معلمانا و محدش بص على فلسطين و السودان و العراق و غيرهم.. و الحقيقة أنا عندي رأي عارف إن أغلبكم هاتعترضوا عليه...
أنا رحت سول في كوريا و شفت النظام في الشوارع و السواقة و البني أدمين سألت جماعة كوريين هناك عن السبب قالولي إن قبل دورة الألعاب الأوليمبية كانت الدنيا مبهرجة و فوضى و عنف و الناس agressive جداً في السواقة قلتله و طب و إيه اللي حصل قالي الدولة علشان المظهر الحضاري حطت قوانين صارمة جداً للمخالفين و شجعت الناس و حطتلهم هدف قومي إنهم يظهروا بمظهر مشرف أمام العالم و قد كان و من ساعتها النظام و الإحترام لسة موجود.
و الدليل إن نفس اللي بيخلوها فوضى هنا بيسوقوا كويشش بره في قطر و الإمارات و لندن...
و ما حدش يقللي إن هي دي الشخصية المصرية لإن في لندن أو دبي الناس عامة عصبيين في السواقة من الزحمة بس في إطار النظام ما فيش فوض..
ده جانب الدولة و مش موجود عندنا... ما ننساش بقى دورنا إحنا.. حد فيكم جرب يقف في الإشارة قبل الخط الأبيض و شاف اللي واقف وراه إتضايق إزاي.... حد جرب يمشي في الصحراوي على 100 و شاف اللي طاير من جنبه و بيبصله بإحتقار إزاي ... حد طيب جرب يهدي أو يقف علشان فيه حد بيعدي الشارع على رجليه و شاف اللي وراه هيعملوا إيه...
أنا عارف إني هسمع تريقة و المدينة الفاضلة و الذي منه بس انا لما شفت الحاجات دي بره و الله الدنيا بتكون جميلة جداًَ و مش هنحس إن فيه زحمة و لا فوضى..
البلد دي تحفة لو سقت فيها الساعة 3 أو 4 الفجر و مافيش أحلى منها في العالم...بس بقى تعالى الساعة 8:30 الصبح أو 3 الصر لحد 10 بالليل بتكون...
.
.
.
.
.
.
عايزة الحرق..:)بس برضه بلدنا
النظام واحترام قوانين المرور مش طبع ممكن يكون عند ناس أة وناس لأ
يعني الناس المنظمين اللي في كوريا او قطر او السعودية او اي مكان مش احسن مننا وعاداتهم احسن من عادتنا
الموضوع هو مين اللي يطبق القانون و يجبر الناس علي احترامه
انا كنت عايش في السعودية سنة 1974
كانت فوضي مرورية وكنا بنرجع مصر في الاجازات نقول عمار يا مصر يا ام الدنيا والحضارة والمدنية
وبعدين بدأوا يشددو المخالفات بقي كسر الاشارة ب 500 ريال
لكن ظهرت فئة من الشباب لما يكسر الاشارة يوقفه العسكري يروح رامي ال500 ريال في وشه ويمشي
راحو عامين ان اللي يكسر الاشارة يتاخد المخفر ( القسم ) ويتمد علي رجلية ( ينضرب ) والامر تطور الي ان اصبح الآن يتحبس لمدة 3 ايام و العقوبة تزيد في حالة التكرار ده غير الغرامة وقدرها حوالي 900 ريال
يعني الموضوع مش انهم منظمين واحنا لأ
هما عندهم الدولة بتجبر الناس علي اتباع النظام واحنا بتوع المرورعندنا تحولو الي مناديين بيحرسو السيارات المخالفة لغاية ما صاحبها يرجع و كل سنة وانت طيب يا باشا وده طبعا علشان يعرف يأكل عياله ويعلمهم لأن مرتبه ما يكفيش يشرب بيه مية من الحنفية ( مش معدنية لا سمح الله )
وانتم طبعا شايفين وعارفين باقي المنظومة
البلد دى حلها ان المصريين يتقسموا فترتين: مصريين فترة صباحية و دول بيصحوا الصبح ينزلوا شغلهم الصبح و يرجعوا المغرب و يناموا بالليل ... و مصريين فترة مسائية و دول يبدؤوا يصحوا وقت رجوع المصريين الصباحيين من أشغالهم و ينزلوا من بيوتهم على العشاء و يروحوا شغلهم و يرجعوا منه قبل الفجر بشوية و يناموا على الشروق ...
و بكدة البلد تتوزع الزحمة فيها على جميع فترات اليوم ... و يراعى اضافة خانة تصنيف جديدة فى شهادات الميلاد بجوار النوع و الديانة و هى خانة "الفترة" و يتكتب فيها صباحى أو مسائى و لا يجوز تغييرها من الميلاد الى الوفاة ... و يراعى منع تجول "الصباحيين" بعد العاشرة مساءً و يراعى منع تجول "المسائيين" بعد السادسة صباحاً
و يراعى كذلك عند الزواج منع زواج الصباحيين بالمسائيات و العكس، حرصاً على التكافؤ الفترى (نسبةً الى التكافؤ الاجتماعى)، و يراعى كذلك ... معلش أنا شكلى خلاص بأخرف -- الظاهر انى نمت فى الاشارة كتير :)
وانا كمان و الله علشان اروح من المهندسيين لمدينة نصر او الحرفين باخد بتاع 3 ساعات وبيعيط و الله العظيم و خد عندك البنزين الي بيروح في الوقفه ديه مش بيروح ده بيطير او بيتشم باين مش عارف اعمل ايه بجد انا تعبت من الموضوع وانا ليسه كمان ناقل في الشغل الجديد الي في المهندسيين في الاول كنت في مدينة نصر و الله العظيم كانت حلوه بالنسبه ليا و الله العظيم
قلبي معاكم جميعا.... و ربنا يستر على الجميع... أنا باسوق في القاهرة من ١٩٩٠ ...إسمحولي بكام ملاحظة صغيرة
-أنا في كندا بقالي سنتين و نص.... تورنتو تحديدا ...وقت الذروة زحمة بس مفيش شدة أعصاب لان الناس محترمة.... بس خلاص
-الأخ الفاضل اللي بينصح بابدا بنفسك أولا.... للاسف يا باشا ماينفعش في القاهرة... عمري ما حانسي لما رجعت من اليابان ٢٠٠١ و كنت ماشي زي الروبوت لمدة ٣ اسابيع قافل الشباك و ببتسم للبني أدمين اللي بيشتموني عشان ماشي صح..... لحد ما مرة قدام مديرية أمن الجيزة قررت أقف عشان الاشارة قلبت أحمر و هوب سمعت زييييييء و طااااخ..... الافندي اللي ورايا لبس فيا و نزل من العربية و قعد يشتم عشان أنا وقفت مع إن التقاطع فاضي ساعتها فقت من حالة الروبوت و قلبت قاهري شمحطجي تاني
-بيتي في الرماية و كنت باروح قصر العيني مرتين في الاسبوع.... على طول على الدائري... كيلومترات و إستهلاك أكتر لكن شدة أعصاب أقل و ببعد عن المنغصات في شارع الهرم و ميدان الجيزة:mad:
- المنيل المعادي المهندسين دائري
- مصر الجديدة مرتين السبت الدنيا هادية نسبيا السواقة معقولة ... يوم التلات تاكسي لاقرب مترو و تاكسي تاني من المترو الوقت أقل و أعصابي أهدى وانا مروح ممكن أمشي للمترو و أهي رياضة
- زميل ليا في الرماية بعيد عني ب-١٠ دقايق مشي Car pooling مرة أنا و مرة هو
-أي فرصة أخد حد في طريقي و أنا مروح حتى لو ساعي باخده ثواب و صدقة و صحبة في الزحمة (و لو مش عايز أتكلم بشغل قرأن و أردد وراه و أهو كله ثواب)
مافيش حلول سحرية بس كنت باحاول على قد ما أقدر... و ربنا يستر من الشلل الخماسي و رطوبة الركبة و القعدة الطويلة ;)
مشكلة المصرى انه فهلوى... مش حيتبع النظام الا اذا كان فيه عقاب شديد... دا غير انك مش حتاخد حقك لو كنت على حق لو حصل حادث
MMamdouh
إنت عارف يا أستاذ جندى إن كلام حضرتك علمياً صح
فى ناس ساعتهم البيولوجية بتخليهم يبقوا أنشط فى الفترة الصباحية و ناس بيبقوا أنشط فى الفترة المسائية (أنا من النوع ده :))
ده مش كلامى ده كلام دكتور سيكولوجى كان قاعد بيدردش معانا
و على فكرة مش هينفع الواحد يغير الفترة اللى بيبقى نشيط فيها.......هو ممكن ينام بدرى و يصحى بدرى و يعود نفسه على كده لكن برضه مش هيبقى فى كامل تركيزه و نشاطه و أكيد جربتوها فى وقت الإمتحانات.
عشان كده بيفكروا فى أوروبا (تقريباً مش فاكر البلد) إنهم يعملوا فترة مسائية فى الشغل للناس اللى مبتعرفش تصحى بدرى.... و بكده يكونوا إستفادوا 24 ساعة يومياً بدل ما الناس كلها تشتغل نص اليوم بس.
inapplicable
حل طبعا غير عملى و فكر فيها هاتلاقى إن كل شركة محتاجة 2 موظفين فى نفس الوظيفة واحد يغطيها بليل و واحد الصبح
ده ينفع فى بعض الوظايف لكن الكل لأ و محتاجة 2 مديرين و 2 رئيس مجلس إدارة و 2 وزراء و و و و ماينفعش :)
الحل إللى ممكن يتنفذ بسهولة
هو نقل جميع المصالح و الشركات من داخل القاهرة لأماكن جديدة موزعه على مدن جديدة و موزعه بإتقان و المدن الجديدة دى يربطها بالقاهرة طرق من العيار الثقــــــــيل 5 حرات فى الإتجاه الواحد بدون خوانق ولا أعناق زجاجة
و عمل فروع من كل المصالح و الوزارات فى كل الجمهورية
و مكان كل الشركات و المصالح إللى هاتتنقل يبقى جراجات
و يتوقف منح تراخيص بناء داخل القاهرة حتى إشعار آخر
و صاحب أى أرض الحكومة تعرض عليه يا يعملها حق إنتفاع للحكومة أو ياخد بدلا منها أرض مساحتها الضعف فى مدينة جديدة و يتصرف ليه قيمة متفق عليها من الدخل إللى هايعود من الأرض دى لما تتحول لجراج
و طبعا الحكومة مش هاتابع و تنفذ الجراجات لأ تعملها حق إنتفاع لشركات كبيرة
و حلول كثير أوى من ضمنها عمل خطوط مترو تربط جميع أطراف القاهرة و عمل سلسلة من الطرق الدائرية المفتوحة و الضخمة تحيط بالقاهرة فى صورة دوائر متفرقة متتالية تغطى القاهرة من كل الجهات و تفعيل المخالفات و تظبيطها و وضع شبكة مراقبة مرورية و عمل محطة على الراديو ال FM يبث من خلالها توجيهات للطرق و السائقين
حاجات ياما بس لو حد عايز يفكر و ينفذ لكن محدش عايز